দীপক শৰ্মা

দীপক শৰ্মা (Dipak Sarma, ২৩ আগষ্ট, ১৯৬৮ – ৩ নৱেম্বৰ, ২০২৫) অসম, ভাৰতৰ এগৰাকী বাঁহী বাদক।^১২ তেওঁ ২০১৩ চনলৈ ৩খন অসমীয়া চলচ্চিত্ৰৰ সংগীত পৰিচালনা কৰাৰ লগতে জী টিভিত সম্প্ৰচাৰিত হোৱা কৰ্ম এণ্ড ৱাজিৰৰ সংগীত পৰিচালনা কৰিছিল। আকাশবাণী গুৱাহাটীৰ হাইগ্ৰেডেড আৰ্টিষ্টৰ মৰ্যাদাপ্ৰাপ্ত দীপক শৰ্মাই নিজৰ দেশৰ লগতে ৪২ খন বৰ্হিদেশতো বহুবাৰ বাঁহীবাদন প্ৰদৰ্শন কৰিছিল৷^৩

প্ৰাৰম্ভিক জীৱন আৰু শিক্ষা

১৯৬৮ চনৰ ২৩ আগষ্ট তাৰিখে দীপক শৰ্মাৰ অসমৰ অবিভক্ত কামৰূপ জিলাৰ পানীগাঁৱত জন্ম হয়৷ যি বৰ্তমান নলবাৰী জিলাৰ অন্তৰ্গত। তেওঁৰ পিতৃ প্ৰয়াত প্ৰমোদ শৰ্মা। ১৯৮৪ চনত তেওঁ হাইস্কুল শিক্ষান্ত পৰীক্ষাত উত্তীৰ্ণ হয় আৰু উচ্চ শিক্ষা গ্ৰহণ কৰিবলৈ গুৱাহাটীলৈ যায়। ১৯৮৯ চনত গুৱাহাটী বাণিজ্য মহাবিদ্যালয়ৰ পৰা তেওঁ বাণিজ্য বিভাগত স্নাতক ডিগ্ৰী লাভ কৰে।^৪

সংগীত শিক্ষা

• ইনষ্ট্ৰুমেণ্টেল মিউজিক (বাঁহী) বিষয়ত স্নাতকোত্তৰ ডিগ্ৰী লাভ, (ৰবীন্দ্ৰ ভাৰতী বিশ্ববিদ্যালয়, কলিকতা)
• সংগীত বিশাৰদ, ভাটখাণ্ডে সংগীত বিদ্যাপীঠ, লক্ষ্ণৌ
• পণ্ডিত হৰিপ্ৰসাদ চৌৰসিয়াৰ তত্ত্বাৱধানত সংগীত শিক্ষা (১৯৯২ চনৰ পৰা)
• অল ইণ্ডিয়া ৰেডিঅ', গুৱাহাটীৰ বি. হাই গ্ৰেডেড আৰ্টিষ্ট (বাঁহী বাদন)

হৰিপ্ৰসাদ চৌৰসিয়াৰ অধীনত বাঁহী শিকি থকাৰ সময়তে তেওঁ কেইখনমান হিন্দী চলচ্চিত্ৰৰ সংগীতত বাঁহী বজাইছিল। পৰৱৰ্তী সময়ত দীপক শৰ্মাই জুবিন গাৰ্গৰ কেইবাটাও জনপ্ৰিয় গানত বাঁহীৰ সুৰ দিছিল। মুম্বাইত থকাৰ সময়তে দীপক শৰ্মা দক্ষিণ আফ্ৰিকালৈ বাঁহী বাদনৰ বাবে আমন্ত্ৰিত হৈছিল। ইয়াৰ পিছত তেওঁ ছুইজাৰলেণ্ড, জাৰ্মানী, পোলেণ্ড, ফ্ৰান্স আদিকে ধৰি ৪২খন দেশত অনুষ্ঠান পৰিৱেশন কৰিছিল। ^৫

তেওঁ আকাশবাণী গুৱাহাটীৰ স্বীকৃতিপ্ৰাপ্ত সংগীত পৰিচালকো আছিল। তেওঁ কেইবাখনো অসমীয়া চিনেমাৰ সংগীত পৰিচালনা কৰিছিল।

কৰ্মৰাজি

সংগীত পৰিচালনা

• জংকি পানৈ
• জাতিঙ্গা ইত্যাদি (২০০৭)
• লুইতক ভেটিব কোনে (২০১৩)

সংগীতপঞ্জী

• ষ্টৰী অৱ ল'ভ (ৰাগ এণ্ড ৰক্স ইণ্টাৰনেশ্যনেল কো. লি.)
• বিয়ণ্ড দা হ'ৰাইজন

দূৰদৰ্শন

• জী টিভিত সম্প্ৰচাৰিত হোৱা কৰ্ম এণ্ড ৱাজিৰৰ সংগীত পৰিচালনা
• ষ্টাৰ প্লাচ যোগে সম্প্ৰচাৰিত হোৱা কেলেইদোস্কোপৰ আৱহ সংগীতৰ মুখ্য বাঁহী বাদক^৬

সন্মান আৰু স্বীকৃতি

• বছৰটোৰ শ্ৰেষ্ঠ সংগীতকাৰ, ২০০৬ চন (ফ'কাছ এন.ই. প্ৰাইভেট চেনেল)
• সংগীত প্ৰভা বঁটা, ২০০৭ চন
• আসাম স্পোৰ্টছ কালচাৰেল জুৰী এৱাৰ্ড, ২০০৭ চন
• জেমচ অৱ আছাম, ২০০৮ চন
• আজিম হাজৰিকা বঁটা (শিৱসাগৰ প্ৰেচ ক্লাব)
• টেলিভিছন চেটেলাইট চেনেল অসম লাইভ ২৪ৰ প্ৰথম জুবিন গাৰ্গ বঁটা, ২০২৫

মৃত্যু

২০২৫ চনৰ ৩ নৱেম্বৰ তাৰিখে দীপক শৰ্মাৰ মৃত্যু ঘটে। তেওঁ ৫৭ বছৰ বয়সত চেন্নাইত চিকিৎসাধীন অৱস্থাত পুৱা ৬ বাজি ১৫ মিনিটত শেষ নিঃশ্বাস ত্যাগ কৰে। দীপক শৰ্মাই যকৃত ৰোগত আক্ৰান্ত হৈ কেইবছৰ ধৰি অসুস্থ হৈ আছিল।^৭৮

দীপক শৰ্মাৰ নশ্বৰদেহ ৪ তাৰিখে বিমানেৰে অসমলৈ অনা হয়। বিমানবন্দৰত বাঁহী বাদকৰ দলে শিল্পীগৰাকীক বাঁহীৰ সুৰেৰে শ্ৰদ্ধাঞ্জলি জনায়। ইয়াৰ পাছতে তেওঁৰ নশ্বৰ দেহ গুৱাহাটীৰ অম্বিকাগিৰী নগৰৰ বাসগৃহলৈ লৈ অহা হৈছে। নৱগ্ৰহ শ্মশানত বিয়লি ৰাজ্যিক মৰ্যাদাৰে শিল্পীগৰাকীৰ শেষকৃত্য সম্পন্ন কৰা হয়।^৫