কাশ্মীৰি শইকীয়া বৰুৱা

কাশ্মীৰি শইকীয়া বৰুৱা (Kashmiri Saikia Baruah) এগৰাকী অসমৰ চলচ্চিত্ৰৰ অভিনেত্ৰী আৰু কণ্ঠশিল্পী। অসমৰ মঙলদৈত ৩০ নৱেম্বৰ তাৰিখে তেওঁৰ জন্ম হৈছিল। মংলদৈত প্ৰাথমিক শিক্ষা গ্ৰহণ কৰাৰ পাছত ১৯৮১ চনত কটন বিশ্ববিদ্যালয়ৰ পৰা স্নাতক উপাধি লাভ কৰে। চলচ্চিত্ৰৰ উপৰিও তেখেতে ভালেমান দিন গুৱাহাটী দূৰদৰ্শন কেন্দ্ৰত বাতৰি পৰিবেশক হিচাপে কাম কৰিছিল। তেওঁ দূৰদৰ্শনৰ বিভিন্ন অনুষ্ঠানত আঁতধৰোঁতাৰ (anchor) কামো কৰিছে।^১

শিক্ষা আৰু কৰ্মজীৱন

গৃহনগৰ মঙলদৈতে তেওঁৰ স্কুলীয়া জীৱন আৰম্ভ হৈছিল। ১৯৮১ চনত তেওঁ গুৱাহাটীৰ কটন বিশ্ববিদ্যালয়ৰ স্নাতক ডিগ্ৰী লয়।^২ তেওঁ অৰণ্য (১৯৭১) ছবিৰ এই পূৰ্ণিমা ৰাতি শীৰ্ষক এটা বিখ্যাত গীতৰ দৃশ্যত এজনী নৃত্যশিল্পী হিচাপে প্ৰথম ভুমুকি মাৰে। মূল নাৰী চৰিত্ৰত অভিনয় কৰা তেওঁৰ প্ৰথম চিনেমা সমৰেন্দ্ৰ নাৰায়ণ দেৱ পৰিচালিত পুতলা ঘৰ (১৯৭৬) মুক্তি পাওঁতে তেওঁ এজনী স্কুলীয়া ছাত্ৰী। এবছৰ পিছত ভাৰতীয়া পেনোৰামত প্ৰদৰ্শিত প্ৰথম অসমীয়া ছবি ভবেন্দ্ৰ নাথ শইকীয়া পৰিচালিত সন্ধ্যাৰাগত এটা গুৰুত্বপূৰ্ণ চৰিত্ৰত অভিনয় কৰে। '৮০ৰ দশকটো তেওঁৰ অভিনয় জীৱনৰ বাবে এক গুৰুত্বপূৰ্ণ সময়। এই সময়চোৱাতে তেওঁ 'অগ্নিস্নান' (১৯৮৫), 'ময়ুৰী' (১৯৮৬), 'এণ্টনী মোৰ নাম' (১৯৮৬), 'এই দেশ মোৰ দেশ' (১৯৮৬) আৰু পিছলৈ 'সাগৰলৈ বহু দূৰ'ত (১৯৯৫) অভিনয় কৰে। ^৩

'৯০ৰ দশকত তেওঁ গুৱাহাটী দূৰদৰ্শনৰ বাতৰি পঢ়ুৱৈ হিচাপে জড়িত হৈ পৰিছিল। তেওঁক দূৰদৰ্শনৰ বহুতো কাৰ্যসূচী বা টকশ্ব'তো আঁতধৰোঁতা বা অংশগ্ৰহণকাৰী হিচাপে দেখা গৈছে।

অভিনীত চলচ্চিত্ৰ