আয়ুষ্মান খুৰানা

আয়ুষ্মান খুৰানা (Ayushmann Khurrana; জন্ম: নিশান্ত খুৰানা; ১৪ ছেপ্টেম্বৰ ১৯৮৪) এগৰাকী ভাৰতীয় অভিনেতা আৰু কণ্ঠশিল্পী। তেওঁ হিন্দী চলচ্চিত্ৰত কাম কৰে। তেওঁৰ চলচ্চিত্ৰসমূহত, সততে তেওঁক সাধাৰণ ব্যক্তিৰ চৰিত্ৰত বিভিন্ন সামাজিক অনুষঙ্গৰ বিৰুদ্ধে সংগ্ৰাম কৰি থকা দেখা যায়।^১২ তেওঁ এটা ৰাষ্ট্ৰীয় চলচ্চিত্ৰ বঁটা আৰু চাৰিটা ফিল্মফেয়াৰ বঁটাকে ধৰি অসংখ্য বঁটা-বাহন তথা স্বীকৃতি লাভ কৰিছে। ২০১৩ চনৰ পৰা ২০১৯লৈকে তেওঁ ফৰ্বছ ইণ্ডিয়াৰ চেলিব্ৰিটি ১০০ শীৰ্ষক তালিকাত তেওঁ স্থান লাভ কৰিছিল আৰু ২০২০ চনত, টাইম পত্ৰিকাই তেওঁক বিশ্বৰ ১০০গৰাকী প্ৰভাৱশালী ব্যক্তিৰ ভিতৰত অন্যতম বুলি অভিহিত কৰিছিল।^৩

২০০৪ চনত, খুৰানাই ৰিয়েলিটি টেলিভিছন শ্ব’ এমটিভি ৰ’ডিজৰ দ্বিতীয় ছিজনত জয়ী হৈছিল আৰু টেলিভিছন এংকৰিঙেৰে অভিনয় জগতত পদাৰ্পণ কৰে। তেওঁ সুজিত সৰকাৰৰ দ্বাৰা পৰিচালিত, ৰোমাণ্টিক কমেডীধৰ্মী ছবি ভিকি ড'নাৰ (২০১২)ত অভিনয়েৰে চলচ্চিত্ৰত অভিষেক ঘটায়, ʼ'ত তেওঁ এগৰাকী শুক্ৰাণু দাতাৰ চৰিত্ৰত অভিনয় কৰিছিল। ছবিখনৰ বাবে তেওঁ শ্ৰেষ্ঠ নৱাগত অভিনেতাৰ ফিল্মফেয়াৰ বঁটা লাভ কৰিছিল।^৪৫ কিছু সময়ৰ বিপৰ্যয়ৰ পিছত তেওঁ ব্যৱসায়িক আৰু সমালোচনামূলকভাৱে সফল ছবি দম লগা কে হাইছা (২০১৫)ত অভিনয় কৰে। পৰৱৰ্তীকালত খুৰানাই আৰ্থিকভাৱে সফল হাস্যৰসাত্মক ছবি বৰেলী কী বৰ্ফী (২০১৭), শুভ মংগল সাৱধান (২০১৭), বাধাই হো (২০১৮), ড্ৰিম গাৰ্ল (২০১৯), বালা (২০১৯) আৰু শুভ মংগল জ্যাদা সাৱধান (২০২০) আদিত অভিনয়েৰে নিজকে প্ৰতিষ্ঠিত কৰে।^৬৭ থ্ৰিলাৰধৰ্মী ছবি অন্ধাধুন (২০১৮)ত এজন অন্ধ পিয়ানোবাদকৰ চৰিত্ৰত আৰু অপৰাধমূলক নাট্যধৰ্মী ছবি আৰ্টিকেল ১৫ (২০১৯)ত এজন সৎ পুলিচৰ চৰিত্ৰত তেওঁৰ অভিনয়ে তেওঁক একেৰাহে দুটাকৈ শ্ৰেষ্ঠ অভিনেতাৰ ফিল্মফেয়াৰ সমালোচক বঁটা লাভ কৰে। লগতে অন্ধাধুন নামৰ ছবিখনৰ বাবে তেওঁ শ্ৰেষ্ঠ অভিনেতাৰ ৰাষ্ট্ৰীয় চলচ্চিত্ৰ বঁটাও লাভ কৰে। কেইবাটাও বাণিজ্যিকভাৱে বিফল ছবিত অভিনয় কৰাৰ পিছত তেওঁ আধ্যাত্মিক ছিকুৱেল ছবি ড্ৰিম গাৰ্ল ২ (২০২৩)ত অভিনয় কৰে।

অভিনয়ৰ উপৰিও খুৰানাই তেওঁৰ কেইবাখনো চলচ্চিত্ৰৰ গীতত কণ্ঠদানো কৰিছে যেনে "পানী দা ৰং" শীৰ্ষক গীতটি। গীতটিত তেওঁ কণ্ঠদান কৰাৰ লগতে সহযোগীভাৱে ৰচনাও কৰিছিল। ইয়াৰ বাবে তেওঁ শ্ৰেষ্ঠ নেপথ্য গায়কৰ ফিল্মফেয়াৰ বঁটা লাভ কৰিছিল। ২০২৩ চনৰ ফেব্ৰুৱাৰী মাহৰ পৰা তেওঁ ভাৰতৰ বাবে ইউনিচেফৰ ৰাষ্ট্ৰীয় সদিচ্ছা ৰাষ্ট্ৰদূত হিচাপে কাৰ্যনিৰ্বাহ কৰি আহিছে।^৮৯

প্ৰাৰম্ভিক জীৱন আৰু শিক্ষা

১৯৮৪ চনৰ ১৪ ছেপ্টেম্বৰ তাৰিখে, চণ্ডীগড়ত পুনম আৰু পি. খুৰানাৰ ঘৰত, এটি পঞ্জাবী খাত্ৰী পৰিয়ালত^১০ নিশান্ত খুৰানা ওৰফে আয়ুষ্মান খুৰানাই জন্মগ্ৰহণ কৰিছিল।^১১১২ ৩ বছৰ বয়সত তেওঁৰ পিতৃ-মাতৃয়ে তেওঁৰ নাম সলনি কৰি আয়ুষ্মান ৰাখে। অভিনেতা অপাৰশক্তি খুৰানা তেওঁৰ এগৰাকী কনিষ্ঠ ভাতৃ।

তেওঁৰ পিতৃ পি. খুৰানা, এগৰাকী জ্যোতিষী^১৩ আৰু জ্যোতিষ বিষয়ৰ লেখক, ২০২৩ চনত তেওঁৰ মৃত্যু হয়।^১৪ আনহাতে তেওঁৰ মাতৃ পুনম এগৰাকী গৃহিণী; অৰ্ধ বাৰ্মিজ বংশৰ,^১৫ আৰু তেওঁ হিন্দীত এম. এ. ডিগ্ৰী লাভ কৰিছে।[ উদ্ধৃতিৰ প্ৰয়োজন ]

আয়ুষ্মান খুৰানা গুৰু নানক খালছা মহাবিদ্যালয়ৰ অংশ আছিল। তেওঁ চণ্ডীগড়ৰ ছেইণ্ট জন'ছ হাইস্কুল আৰু চণ্ডীগড়ৰ ডিএভি কলেজত অধ্যয়ন কৰিছিল।^১৬ তেওঁ ইংৰাজী সাহিত্যত সন্মানসহ স্নাতক ডিগ্ৰী লাভ কৰিছিল আৰু পাঞ্জাব বিশ্ববিদ্যালয়ৰ স্কুল অৱ কমিউনিকেচন ষ্টাডিজৰ পৰা গণ যোগাযোগ বিষয়ত স্নাতকোত্তৰ ডিগ্ৰী লাভ কৰিছিল।^১৭ তেওঁ পাঁচ বছৰ থিয়েটাৰতো অভিনয় কৰিছিল।

কলেজীয়া দিনবোৰত তেওঁ ছিমলাৰ গেইটি থিয়েটাৰত কেইবাখনো নাটকত অভিনয় কৰিছিল। চণ্ডীগড়ৰ সক্ৰিয় নাট্যদল ডিএভি কলেজৰ "আঘাজ" আৰু "মঞ্চতন্ত্ৰ"ৰ প্ৰতিষ্ঠাপক সদস্যও আছিল।^১৭ তেওঁ বাটৰ নাটৰ কল্পনা আৰু অভিনয় কৰিছিল। ৰাষ্ট্ৰীয় কলেজ উৎসৱ যেনে মুড ইণ্ডিগʼ (আইআইটি বম্বে), অএএছআইএছ (বিৰলা ইনষ্টিটিউট অৱ টেকন’লজি এণ্ড চাইন্স, পিলানি) আৰু ছেইণ্ট বেডেছ ছিমলা আদিত পুৰস্কাৰো লাভ কৰিছিল।^১৭ ধৰ্মবীৰ ভাৰতীৰ দ্বাৰা পৰিচালিত, অন্ধ যুগ নামৰ ছবিখনত অশ্বত্থামাৰ চৰিত্ৰত অভিনয় কৰি তেওঁ শ্ৰেষ্ঠ অভিনেতাৰ বঁটা লাভ কৰিছিল।^১৮

খুৰানা বৰ্তমান কৰ্মসূত্ৰে মুম্বাইত থাকে আৰু তেওঁৰ পৰিয়াল এতিয়াও চণ্ডীগড়তে থাকে। তেওঁৰ ভাতৃ অপাৰশক্তি খুৰানা দিল্লীৰ ৰেডিঅʼ মিৰ্চি ৯৮.৩ এফএমত ৰেডিঅ‍ʼ জকী আৰু ২০১৬ চনত আমিৰ খান অভিনীত ছবি দংগলত অভিনয়েৰে অভিনয় জগতত আত্মপ্ৰকাশ কৰে।^১৯২০ ঘৰৰ সাহিত্যিক পৰিৱেশে খুৰানাকো যথেষ্ট প্ৰভাৱিত কৰিছিল আৰু তেওঁ লিখা-মেলাৰ কামটো নিজৰ চখ হিচাপে লৈছিল। তেওঁ হিন্দী ভাষাত ব্লগ আদি লিখা-মেলা কৰে আৰু এই কাৰ্যৰ বাবে তেওঁৰ প্ৰশংসকসকলৰ পৰা তেওঁ অতিশয় সমাদৰ লাভ কৰিছে।^২১

ব্যক্তিগত জীৱন

২০০৮ চনত, খুৰানাই তেওঁৰ শৈশৱৰ বান্ধৱী, চলচ্চিত্ৰ নিৰ্মাতা তথা সাংবাদিকতাৰ শিক্ষয়িত্ৰী তাহিৰা কাশ্যপৰ সৈতে বিবাহপাশত আবদ্ধ হয়। দম্পতীহালৰ এটি পুত্ৰ আৰু এটি কন্যা সন্তান আছে।^২২

২০১৮ চনত, কাশ্যপৰ স্তন কেন্সাৰ ধৰা পৰিছিল যদিও ২০২০ চনত, তেওঁক কেন্সাৰমুক্ত ঘোষণা কৰা হৈছিল। খুৰানাই নিচিৰেন বৌদ্ধ ধৰ্মৰ প্ৰতি থকা বিশ্বাসৰ কৃতিত্ব দিয়ে কাৰণ ই তেওঁক কঠিন সময়ৰ মাজেৰে পাৰ হʼবলৈ সহায় কৰিছিল।^{২৩২৪২৫২৬২৭}

সংগীতপঞ্জী

গ্ৰন্থপঞ্জি

• Khurrana; Kashyap, Tahira. (2015). Cracking the Code: My Journey in Bollywood. Rupa & Co. ISBN 9788129135681