বিজয় দেৱৰকোণ্ডা

দেৱৰকোণ্ডা বিজয় সাই (Deverakonda Vijay Sai; জন্ম: ৯ মে' ১৯৮৯), পেছাগতভাৱে বিজয় দেৱৰকোণ্ডা নামেৰে পৰিচিত,^১ এগৰাকী ভাৰতীয় অভিনেতা আৰু চলচ্চিত্ৰ প্ৰযোজক। তেওঁ প্ৰধানকৈ তেলেগু চলচ্চিত্ৰত অভিনয় কৰে।^২৩ তেলেগু চলচ্চিত্ৰৰ সৰ্বাধিক পাৰিশ্ৰমিক প্ৰাপ্ত অভিনেতাসকলৰ ভিতৰত অন্যতম, তেওঁ ২০১৮ চনৰ পৰা বৰ্তমানলৈকে ফৰ্বছ ইণ্ডিয়াৰ "চেলিব্ৰিটি ১০০" তালিকাখনত অন্তৰ্ভুক্ত হৈয়ে আছে। তেওঁ এটা ফিল্মফেয়াৰ বঁটা, এটা নন্দী বঁটা, আৰু দুটা সাইমা বঁটাকে ধৰি অসংখ্য বঁটা-বাহন তথা স্বীকৃতি লাভ কৰিছে।

দেৱৰকোণ্ডাই নুভভিলা (২০১১) ছবিৰে অভিষেক ঘটায় আৰু য়েৱাড়ে সুব্ৰমণ্যম (২০১৫) ছবিত অভিনয়েৰে অভিনেতা ৰূপে নজৰলৈ আহে। ব্লকবাষ্টাৰ ছবি পেল্লি চৌপুলু (২০১৬) আৰু অৰ্জুন ৰেড্ডী (২০১৭)ত অভিনয় কৰি তেওঁ এজন আগশাৰীৰ চলচ্চিত্ৰ অভিনেতা হিচাপে পৰিচয় লাভ কৰে। অৰ্জুন ৰেড্ডী ছবিখনত এগৰাকী অস্থিৰ অস্ত্ৰোপচাৰ বিশেষজ্ঞৰ চৰিত্ৰত অভিনয় কৰাৰ বাবে শ্ৰেষ্ঠ অভিনেতাৰ ফিল্মফেয়াৰ বঁটা – তেলেগু লাভ কৰে। মহানটী (২০১৮), গীতা গোবিন্দম (২০১৮), আৰু টেক্সিৱালা (২০১৮) আদি ব্যৱসায়িকভাৱে সফল ছবিৰে তেওঁ নিজকে আৰু অধিক প্ৰতিষ্ঠিত কৰে।^৪ এই সফলতাৰ পিছত বিগ বাজেটৰ একচন ছবি লাইগাৰ (২০২২)ৰ দৰে ছবিসমূহ বক্স অফিচত ধাৰাবাহিকভাৱে বিফল হয়।

২০১৯ চনত দেৱৰকোণ্ডাই নিজাকৈ প্ৰডাকচন হাউচ কিং অৱ দ্য হিল এণ্টাৰটেইনমেণ্ট মুকলি কৰে, য’ত মীকু মাথ্ৰামে চেপ্তা (২০১৯) আৰু পুষ্পক বিমানম (২০২১) শীৰ্ষক ছবি দুখন প্ৰযোজনা কৰা হয়।^৫৬ চলচ্চিত্ৰ জীৱনৰ বাহিৰেও দেৱৰকোণ্ডাই নিজৰ ফেশ্বন ব্ৰেণ্ড ৰাউডি ৱেৰ ডিজাইন কৰিছে, যিটো ২০২০ চনত মিন্ত্ৰাত আৰম্ভ হৈছিল,^৭ আৰু ভলীবল দল হায়দৰাবাদ ব্লেক হকছৰ সহ-মালিক।^৮ অসংখ্য সামগ্ৰী তথা ব্ৰেণ্ডৰ চেলিব্ৰিটি এণ্ডাৰছাৰ হোৱাৰ উপৰিও দেৱৰকোণ্ডাই বিভিন্ন মানৱীয় কাম-কাজত সহায়-সহযোগিতা কৰে।

প্ৰাৰম্ভিক জীৱন

অন্ধ্ৰপ্ৰদেশৰ হাইদৰাবাদ (বৰ্তমান তেলংগানা)ত গোবৰ্ধন ৰাও আৰু মাধৱীৰ গৃহত দেৱৰকোণ্ডা বিজয় সাইৰ জন্ম হৈছিল।^৯১০ তেওঁৰ পৰিয়ালটো পূৰ্বৰ মাহবুবনগৰ জিলাৰ (বৰ্তমান নগৰকুৰনুল)ৰ থুম্মানপেটা গাঁৱৰ বাসিন্দা।^৯১১ তেওঁৰ পিতৃ এজন টেলিভিছন ধাৰাবাহিক পৰিচালক আছিল যিয়ে সফলতাৰ অভাৱত সেইবোৰ কাম এৰি দিছিল।

বিজয়ে পুত্তপাৰ্থীৰ শ্ৰী সত্য সাই উচ্চতৰ মাধ্যমিক বিদ্যালয়ৰ পৰা স্কুলীয়া শিক্ষা সমাপ্ত কৰে।^১২ ইয়াৰ পিছত তেওঁ হাইদৰাবাদৰ লিটিল ফ্লাৱাৰ জুনিয়ৰ কলেজত ইণ্টাৰমিডিয়েট শিক্ষা গ্ৰহণ কৰে।^১৩ তেওঁ বদ্ৰুকা কলেজ অৱ কমাৰ্চ এণ্ড আৰ্টছৰ পৰা বাণিজ্য শাখাত স্নাতক ডিগ্ৰী লাভ কৰিছে।^১১১৪ তেওঁৰ কনিষ্ঠ ভাতৃ আনন্দ দেৱৰকোণ্ডাও তেলেগু চলচ্চিত্ৰৰ এগৰাকী অভিনেতা।^১৫

কৰ্মজীৱন

কৰ্মজীৱনৰ আৰম্ভণি (২০১১–২০১৫)

ৰবি বাবুৰ পৰিচালনাত নিৰ্মিত ৰোমাণ্টিক কমেডী ছবি নুভভিলা (২০১১)ত অভিনয়েৰে দেৱৰকোণ্ডাই ছবিজগতত আত্মপ্ৰকাশ কৰিছিল।^১৬ পিছলৈ তেওঁ ছেখৰ কম্মুলাৰ লাইফ ইজ বিউটিফুল (২০১২) ছবিখনত এটি সৰু চৰিত্ৰত অভিনয় কৰে।^১৭ পৰিচালক নাগ অশ্বিনৰ সৈতে চিনাকি হোৱাৰ পিছত, তেওঁ অভিনেতা নানীৰ সৈতে ২০১৫ চনৰ অশ্বিনৰ কমিং অফ এজ ছবি য়েৱাড়ে সুব্ৰমণ্যমত সহযোগী চৰিত্ৰ এটিত অভিনয় কৰিছিল।^১৮ তেলেগু চলচ্চিত্ৰ জগতৰ প্ৰযোজক অশ্বিনী দত্তৰ কন্যা, প্ৰিয়ংকা দত্তই প্ৰযোজনা কৰিছিল এই ছবিখন; প্ৰিয়ংকাই তেওঁক সমৰ্থন কৰিছিল আৰু এবাৰ ছবিখনৰ শ্বুটিং আৰম্ভ হোৱাৰ পিছত প্ৰিয়ংকাৰ ভগ্নী স্বপ্না দত্তই তেওঁক নিজৰ কোম্পানীত চুক্তিবদ্ধ কৰিছিল।^১৯২০

বিৰাট সাফল্য অৰ্জন (২০১৬–২০১৮)

ফেন ফেষ্টত দেৱৰকোণ্ডা]]

তৰুণ ভাস্কৰৰ পৰিচালনাত নিৰ্মিত ৰোমাণ্টিক কমেডী ছবি পেল্লী চৌপুলুত দেৱৰকোণ্ডাই প্ৰথমবাৰৰ বাবে মুখ্য চৰিত্ৰত অভিনয় কৰিছিল। ব্যৱসায়িকভাৱে সফল হোৱা ছবিখনে ৬৪তম ৰাষ্ট্ৰীয় চলচ্চিত্ৰ বঁটাত শ্ৰেষ্ঠ ছবি – তেলেগু আৰু তেলেগু ভাষাৰ শ্ৰেষ্ঠ বৈশিষ্ট্যপূৰ্ণ ছবিৰ ফিল্মফেয়াৰ বঁটা লাভ কৰে।^২১২২ ২০১৭ চনত মছলাধৰ্মী ছবি দ্বাৰকাত অভিনয় কৰিছিল। ইয়াৰ পিছত তেওঁ ৰোমাণ্টিক ছবি অৰ্জুন ৰেড্ডীত অভিনয় কৰিছিল। ছবিখনত তেওঁৰ চৰিত্ৰটো সাহসী তথা উগ্ৰ হোৱাৰ বাবে তেওঁ সমালোচকৰ প্ৰশংসা লাভ কৰিছিল।^২৩ কিন্তু তেওঁৰ আত্মবিনাশকাৰী, চুটি স্বভাৱৰ আৰু মদ্যপায়ী অস্ত্ৰোপচাৰ বিশেষজ্ঞৰ চিত্ৰণৰ বাবে সমালোচকৰ পৰা ব্যাপক প্ৰশংসা লাভ কৰাৰ লগতে তেওঁ শ্ৰেষ্ঠ অভিনেতাৰ ফিল্মফেয়াৰ বঁটা – তেলেগু লাভ কৰিবলৈ সক্ষম হয়।^২৪২৫ ২০১৯ চনত ফিল্ম কম্পেনিয়নে অৰ্জুন ৰেড্ডীত দেৱৰকোণ্ডাৰ অভিনয়ক "১০০ গ্ৰেটেষ্ট পাৰফৰ্মেন্স অৱ দ্য ডিকেড"ত স্থান দিছিল।^২৬

২০১৮ চনত একাধিক ছবিত অভিনয় কৰিছিল দেৱেৰাকোণ্ডাই, ইয়াৰে প্ৰথমখন আছিল পলমকৈ মুক্তিপ্ৰাপ্ত ছবি মন্ত্ৰম ভেছাভে, যিখন প্ৰথমতে ২০১৩ চনত মুক্তি পাবলগীয়া আছিল। অভিনেত্ৰী সাৱিত্ৰীৰ জীৱনৰ আধাৰত নিৰ্মিত উল্লেখযোগ্য জীৱনীমূলক ছবি মহানটীত তেওঁ গুৰুত্বপূৰ্ণ ভূমিকা পালন কৰিছিল। ২০১৮ চনত দেৱৰকোণ্ডাৰ সফল ছবিখনে মুক্তি লাভ কৰিছিল। ছবিখন আছিল গীতা আৰ্টছৰ ৰোমাণ্টিক কমেডী ছবি গীতা গোবিন্দম, য’ত তেওঁ ৰশ্মিকা মন্দান্নাৰ বিপৰীতে এগৰাকী কলেজ অধ্যাপকৰ চৰিত্ৰত অভিনয় কৰিছিল। মুক্তিৰ লগে লগে ছবিখনে মিশ্ৰিত-ইতিবাচক সমালোচনা লাভ কৰে, আৰু তেওঁৰ কেৰিয়াৰৰ সৰ্বাধিক উপাৰ্জনকাৰী ছবি, বিশ্বজুৰি ১৩০ কোটি টকা উপাৰ্জন কৰা বুলি প্ৰমাণিত হয়। ইয়াৰ পিছত তেওঁ আনন্দ শংকৰৰ পৰিচালনাত নিৰ্মিত তামিল ৰাজনৈতিক থ্ৰিলাৰধৰ্মী ন'টা ছবিখনত অভিনয় কৰিছিল, যিখন বক্স অফিচত বিফল হৈছিল।^২৭ ২০১৮ চনত তেওঁৰ অন্তিমখন ছবি আছিল ইউভি ক্ৰিয়েচনছৰ অতিপ্ৰাকৃতিক কমেডী থ্ৰিলাৰধৰ্মী ছবি টেক্সিৱালা, যিখনে বক্স অফিচত ভাল ফলাফল দেখুৱাইছিল।^২৮

কেৰিয়াৰৰ মন্দাৱস্থা (২০১৯–বৰ্তমান)

২০১৯ চনত ৰশ্মিকা মন্দান্নাৰ সৈতে ভাৰত কাম্মাৰ ডিয়াৰ কমৰেড নামৰ ৰোমাণ্টিক একচন ছবিত দেৱৰকোণ্ডাক দেখা গৈছিল। পিছত তেওঁ মালৱিকা মোহননে সহ অভিনীত, আনন্দ অন্নমলাই পৰিচালিত হিৰোত চুক্তিবদ্ধ হয় যদিও ছবিখন নিৰ্মাণ আৰম্ভ কৰাৰ পিছত শ্বেলভ্ড কৰাৰ খবৰ আহিছিল।^২৯ ২০২০ চনত ক্ৰান্তি মাধৱৰ ৰোমাণ্টিক ছবি ৱৰ্ল্ড ফেমাছ লাভাৰত তেওঁ ৰাশী খান্না, কেথেৰিন ট্ৰেছা, ঐশ্বৰ্যা ৰাজেশ, আৰু ইজাবেল লেইটেৰ বিপৰীতে অভিনয় কৰিছিল, ছবিখন নেতিবাচক সমালোচনাৰ সন্মুখীন হৈছিল।^৩০ ২০২২ চনত তেওঁ হিন্দী–তেলেগু দ্বিভাষিক ছবি লাইগাৰত অভিনয় কৰিছিল। ছবিখনৰ পৰিচালক আছিল পুৰী জগন্নাথ আৰু প্ৰযোজক আছিল কৰণ জোহৰ, এইখন ছবিও অতি নেতিবাচক সমালোচনাৰ সন্মুখীন হৈছিল।^৩১৩২ ইয়াৰ পিছত তেওঁ শিৱ নিৰ্বাণৰ পৰিচালনাত নিৰ্মিত কুশী ছবিখনত অভিনয় কৰে আৰু ইয়ো মিশ্ৰিত সমালোচনাৰ সম্মুখীন হয়।^৩৩ ছবিখন বক্স অফিচত এটি গড় উপাৰ্জনকাৰী ছবিত পৰিগণিত হয়।^৩৪ ২০২৪ চনত দেৱৰকোণ্ডাই বক্স অফিচত বোমা হিচাপে পৰিগণিত হোৱা দ্য ফেমিলি ষ্টাৰ ছবিত অভিনয় কৰে।^৩৫ পিছলৈ একে বছৰতে নাগ অশ্বিনৰ মহাকাব্যিক কল্পবিজ্ঞান চলচ্চিত্ৰ কল্কি ২৮৯৮ এডিত যোদ্ধা অৰ্জুনৰ চৰিত্ৰত তেওঁক কেমিঅ’ ৰূপত দেখা গৈছিল।^৩৬

অন্যান্য কৰ্মৰাজি

ফুড ডেলিভাৰী এপ জ'মাট'ৰ ব্ৰেণ্ড এম্বেছাদৰ আছিল বিজয় দেৱৰকোণ্ডা।^৩৭ ২০১৮ চনৰ ১৫ অক্টোবৰত তেওঁ নিজৰ ফেশ্বন ব্ৰেণ্ড ৰাউডি ৱেৰ মুকলি কৰিছিল।^৭ পিছলৈ ২০২০ চনত মিন্ত্ৰাত ৰাউডি ৱেৰ মুকলি কৰা হয়।^৩৮

২০১৯ চনৰ পুলৱামা আক্ৰমণত নিহতসকলৰ পৰিয়াললৈ আগবঢ়োৱা অনুদানকে ধৰি সাহায্য পুঁজিও আগবঢ়াইছে দেৱৰকোণ্ডাই।^{৩৯৪০৪১৪২}

দেৱৰকোণ্ডাই ২০১৯ চনৰ এপ্ৰিল মাহত দ্য দেৱৰকোণ্ডা ফাউণ্ডেশ্যন নামৰ এটা অলাভজনক সংস্থাৰ প্ৰতিষ্ঠা কৰে।^৪৩ ২০২০ চনৰ আৰম্ভণিতে ২০২০ চনৰ ভাকো ইণ্ডিয়ান অ’পেন আন্তঃৰাষ্ট্ৰীয় কিক বক্সিং চেম্পিয়নশ্বিপৰ খিতাপ জয় কৰা কিকবক্সাৰ গণেশ আমবাৰীক সহায় কৰিবলৈ ফাউণ্ডেশ্যনৰ জৰিয়তে তেওঁ ২৪,০০০ টকাৰ অনুদান আগবঢ়ায়।^৪৪

ক’ভিড-১৯ মহামাৰীৰ সংকটৰ সৈতে যুঁজিবলৈ তেওঁ এক পদক্ষেপ লৈছিল। ফাউণ্ডেশ্যনে তেওঁৰ মধ্যবিত্ত পুঁজি (এমচিএফ)ৰ সহায়ত ১৭ হাজাৰ মধ্যবিত্ত পৰিয়ালক তেওঁলোকৰ গেলামাল আৰু মৌলিক প্ৰয়োজনীয় সামগ্ৰীৰে সফলতাৰে সহায় কৰিছে, ১.৭ কোটি টকা ব্যয় কৰিছে। তেওঁৰ সামূহিক প্ৰচেষ্টাত যোগদান কৰিবলৈ ৮৫০০ৰো অধিক স্বেচ্ছাসেৱকে ১.৫ কোটি টকাৰো অধিক ধন আগবঢ়ায়।^৪৫৪৬ আয়োজকসকলে ২০২০ চনৰ ২ জুনত এই পদক্ষেপৰ অন্ত পেলোৱাৰ সিদ্ধান্ত লয়।^৪৭৪৮ দেৱৰকোণ্ডাই ২০২১ চনত মাহবুবনগৰত প্ৰথমটো মাল্টিপ্লেক্স থিয়েটাৰ মুকলি কৰে।^৪৯

সংবাদ মাধ্যমত

দেৱৰকোণ্ডাই কয় যে তেওঁৰ পৰিয়ালৰ লোকসকলে তেওঁলোকে অনুমোদন নিদিয়া কামবোৰৰ প্ৰতিবাৰেই তেওঁক ৰাউডি বুলি কয়। সময়ৰ লগে লগে তেওঁ এই শব্দটো নিজৰ লগতে অনুৰাগীৰ বাবে ব্যৱহাৰ কৰিবলৈ আৰম্ভ কৰে।^৫০৫১

দেৱৰকোণ্ডাই মঞ্চত বা সাক্ষাৎকাৰৰ সময়ত নিজৰ প্ৰকৃত, সৎ আৰু অফিল্টাৰকৃত মতামত প্ৰকাশ কৰাৰ বাবে জনাজাত, যাৰ বাবে তেওঁ বহু জনপ্ৰিয়তা আৰু সমালোচনা লাভ কৰিছে,^৫২ যিটো ২০১৭ চনত অৰ্জুন ৰেড্ডীৰ অডিঅ’ মুকলি অনুষ্ঠানত দিয়া ভাষণৰ সময়ত দেখা গৈছিল।^{৫৩৫৪৫৫}

২০১৮ চনৰ ফৰ্বছ ইণ্ডিয়াৰ "চেলিব্ৰিটি ১০০" তালিকাত দেৱৰকোণ্ডাই ৭২তম স্থান লাভ কৰে।^৫৬ ২০১৮ চনত দ্য টাইমছ মষ্ট ডিজায়াৰেবল মেনত ৪ৰ্থ, ২০১৯ চনত ৩য়, ২০২০ চনত ২য় স্থান লাভ কৰিছিল।^{৫৭৫৮৫৯} অতিৰিক্তভাৱে ফৰ্বছ ইণ্ডিয়াই তেওঁলোকৰ ৩০ বছৰ অনুৰ্ধৰ তালিকাত অন্তৰ্ভুক্ত কৰিছিল,^৬০ আৰু গুগলৰ বাৰ্ষিক প্ৰতিবেদন অনুসৰি তেওঁ সৰ্বাধিক অনুসন্ধান হোৱা দক্ষিণ ভাৰতীয় অভিনেতা হিচাপে পৰিগণিত হৈছিল।^৬১

চলচ্চিত্ৰপুঞ্জী

অভিনেতা হিচাপে

• সকলোবোৰ চলচ্চিত্ৰ তেলেগু ভাষাতেই আছে, অন্যথা উল্লেখ কৰা হৈছে

টিভি শ্ব’

বঁটা আৰু মনোনয়ন