টেছি থমাছ

টেছি থমাছ (ইংৰাজী ভাষা: Tessy Thomas, জন্ম: ১৯৬৩) এগৰাকী ভাৰতীয় বিজ্ঞানী তথা অভিযন্তা। তেওঁ ভাৰতৰ প্ৰতিৰক্ষা গৱেষণা আৰু বিকাশ সংগঠনত অগ্নি-৪ মিছাইল প্ৰকল্পটোৰ সঞ্চালক আছিল।^১ ভাৰতত মিছাইল প্ৰকল্পৰ দায়িত্ব লোৱা তেৱেঁই প্ৰথম মহিলা বিজ্ঞানী। তেওঁক ভাৰতৰ ‘মিছাইল মহিলা’ হিচাপে গণ্য কৰা হয়।

প্ৰাৰম্ভিক জীৱন

১৯৬৩ চনৰ এপ্ৰিল মাহত কেৰালাৰ আলাপ্পুঝা নামে ঠাইত এটা ছিৰিয়ান খ্ৰীষ্টান পৰিয়ালত টেছি থমাছৰ জন্ম হৈছিল।^২৩ মাডাৰ টেৰেছাৰ নামেৰে তেওঁৰ নামকৰণ কৰা হৈছে।^৪ টেছিৰ ১৩ বছৰ বয়সত দেউতাক পক্ষাঘাতত পীড়িত হয় যাৰ বাবে তেওঁৰ দেহৰ সোঁফাল অচল হৈ পৰে। টেছিৰ মাক আছিল এগৰাকী শিক্ষয়িত্ৰী।^৪৫ টেছিৰ চাৰিজনী ভনী আৰু এজন ভায়েক আছিল। থুম্বা বিষুৱীয় ৰকেট উৎক্ষেপণ কেন্দ্ৰৰ আশে-পাশেই টেছি ডাঙৰ-দীঘল হৈছিল যাৰ বাবে ৰকেট আৰু মিছাইলৰ প্ৰতি তেওঁ বাৰুকৈয়ে মুগ্ধ হৈছিল। ইয়াৰোপৰি তেওঁ উৰাজাহাজ উৰণৰ দ্বাৰাও মুগ্ধ হৈছিল।^৬৪৪৭

শিক্ষা

টেছি থমাছে ছেইণ্ট মাইকেলছ হায়াৰ ছেকেণ্ডাৰী স্কুল আৰু ছেইণ্ট যোছেফছ গাৰ্লছ হায়াৰ ছেকেণ্ডাৰী স্কুলত শিক্ষা গ্ৰহণ কৰিছিল। গণিত আৰু পদাৰ্থ বিজ্ঞানৰ প্ৰতি তেওঁৰ সহজাত প্ৰবৃত্তি আছিল। স্কুলত একাদশ আৰু দ্বাদশ বছৰৰ সময়ছোৱাত গণিত বিষয়ত তেওঁ এশ শতাংশ নম্বৰ পাবলৈ সক্ষম হৈছিল। সেই একে সময়তে তেওঁ বিজ্ঞান বিষয়ত ৯৫ শতাংশতকৈ অধিক নম্বৰ পাবলৈ সক্ষম হৈছিল।^৪৩৫ থ্ৰীছুৰত অৱস্থিত চৰকাৰী অভিযান্ত্ৰিক মহাবিদ্যালয়ত অধ্যয়ন কৰাৰ উদ্দেশ্যে তেওঁ ভাৰতীয় ষ্টেট বেংকৰ পৰা প্ৰতি মাহে এশ টকীয়া এটা ঋণ লৈছিল। ইয়াৰোপৰি তেওঁ এটা ছাত্ৰবৃত্তিও লাভ কৰিছিল আৰু এই বৃত্তিৰেই তেওঁৰ টিউচনৰ মাচুল পৰিশোধ কৰিছিল। বি টেক কৰি থকা সময়ছোৱাত হোষ্টেলত থকাৰ বাবে বেংকৰ পৰা লোৱা ঋণটোৱে ভালেখিনি সহায় কৰিছিল।^৪৮ স্কুল আৰু কলেজ দুয়োতে টেছি থমাছে ৰাজনৈতিক আলোচনাকে ধৰি আন বহুতো পাঠ্যক্ৰমৰ বাহিৰৰ কাৰ্যকলাপত যোগদান কৰিছিল। তেওঁ ক্ৰীড়াত, বিশেষকৈ বেডমিণ্টনত, উৎকৰ্ষ লাভ কৰিছিল।^৯ তেওঁ পুনেত অৱস্থিত ইনষ্টিটিউট অৱ আৰ্মামেণ্ট টেকন’লজিৰ (বৰ্তমানৰ ডিফেন্স ইনষ্টিটিউট অৱ এডভাঞ্চড টেকন'লজি) পৰাও গাইডেড মিছাইল বিষয়ত এম টেক ডিগ্ৰী অৰ্জন কৰিছে। ইয়াৰোপৰি তেওঁ অভিযান ব্যৱস্থাপনা বিষয়ত এম বি এ ডিগ্ৰী লাভ কৰিছে।^৮ প্ৰতিৰক্ষা গৱেষণা আৰু বিকাশ সংগঠনৰ পৰা তেওঁ গাইডেড মিছাইল বিষয়ত পি এইচ ডি লাভ কৰিছে।^৩

জীৱিকা

১৯৮৮ চনত টেছি থমাছে প্ৰতিৰক্ষা গৱেষণা আৰু বিকাশ সংগঠনত যোগদান কৰে।^১০ তেওঁক নতুন প্ৰজন্মৰ ক্ষেপণাস্ত্ৰ “অগ্নি”ৰ ৰূপাংকণ আৰু উন্নয়ন বিভাগত নিযুক্ত কৰা হৈছিল। অগ্নি কাৰ্যসূচীৰ বাবে তেওঁক স্বয়ং এ পি জে আব্দুল কালামে নিযুক্তি প্ৰদান কৰিছিল।^৩ টেছি থমাছ তিনি হাজাৰ কিলোমিটাৰ পৰিসৰৰ অগ্নি-৩ মিছাইল প্ৰকল্পৰ সহকাৰী সঞ্চালক আছিল।^১১ ২০১১ চনত সফলতাৰে পৰীক্ষা কৰা অগ্নি-৪ মিছাইল প্ৰকল্পটোৰো তেওঁ সঞ্চালক আছিল।^১২ ২০০৯ চনত পাঁচ হাজাৰ কিলোমিটাৰ পৰিসৰৰ অগ্নি-৫ মিছাইল প্ৰকল্পটোৰ সঞ্চালক হিচাপে পুনৰ টেছি থমাছক নিযুক্তি দিয়া হৈছিল। ২০১২ চনৰ ১৯ এপ্ৰিল তাৰিখে সফলতাৰে মিছাইলটো পৰীক্ষা কৰা হয়। ২০১৮ বৰ্ষত প্ৰতিৰক্ষা গৱেষণা আৰু বিকাশ সংগঠনৰ বৈমাণিকী পদ্ধতিসমূহৰ সাধাৰণ সঞ্চালক হিচাপে তেওঁক নিযুক্তি দিয়া হয়।^১ টেছি থমাছে ভাৰতীয় ৰাষ্ট্ৰীয় অভিযান্ত্ৰিক একাডেমী (INAE), ইনষ্টিটিউছন অৱ ইঞ্জিনীয়াৰিং-ভাৰত (IEI) আৰু টাটা প্ৰশাসনিক সেৱাকে (TAS) ধৰি ভালেমান বিশ্ববিদ্যালয়ৰ অধিসদস্যপদ গ্ৰহণ কৰিছে।^৩

ব্যক্তিগত জীৱন

টেছি থমাছ বিবাহপাশত আৱদ্ধ হৈছিল ভাৰতীয় নৌসেনাৰ কমাণ্ডাৰ সৰোজ কুমাৰৰ সৈতে। তেওঁলোকৰ টেজাছ নামে এজন পুত্ৰ সন্তানৰ পিতৃ-মাতৃ।^১৩

বঁটা

মিছাইল প্ৰযুক্তিৰ ক্ষেত্ৰত ভাৰতক স্বনিৰ্ভৰশীল কৰাৰ উদ্দেশ্যে আগবঢ়োৱা গুৰুত্বপূৰ্ণ অৱদানৰ বাবে টেছি থমাছক লাল বাহাদুৰ শাস্ত্ৰী ৰাষ্ট্ৰীয় বঁটা প্ৰদান কৰা হৈছে।^১৪১৫

প্ৰকাশন

• থমাছ, টেছি. (২০০৫-০৭-০১). Guidance Scheme for Solid Propelled Vehicle during Atmospheric Phase. ডিফেন্স ছায়েন্স জাৰ্ণেল. পৃ. ২৫৩–২৬৪
• সুধাকৰ, আৰ.; ভেংকান্না, এম.; ৰাও, বি. ভি. পাপা. (২০১৭). Prediction of Real Gas and Non-Equilibrium Effects in the Gas Dynamics of Canister Launch Missile. 30th International Symposium on Ballistics
• Online Trajectory Reshaping for a Launch Vehicle to Minimize the Final Error Caused by Navigation and Guidance - ProQuest. search.proquest.com
• Quality Assessment of High Strength Metallic Rocket Motor Casings - A Non Destructive Testing Approach. 2015 International Journal of Engineering Development and Research
• ঘোগালে, শ্ৰীকান্ত; ভেংকান্না, এম.; ৰাও, বি. ভি. পাপা. (২০১৭). Developmental Challenges during Realization of High Progressivity Rocket Motor. 30th International Symposium on Ballistics