কাজলীচকী

কাজলীচকী(𑜀𑜠𑜊𑜡𑜎𑜣,Kajali fort) আহোম ৰাজ্য (মু'ঙ দুন চুন খাম,𑜉𑜢𑜤𑜂𑜫 𑜓𑜤𑜃𑜫 𑜏𑜤𑜃𑜫 𑜁𑜪)ৰ সুৰক্ষাৰ বাবে স্থাপন কৰা আহোম সেনাছাউনী আছিল যি বৰ্তমান প্ৰত্নতত্ব বিভাগৰ দ্বাৰা এখন সংৰক্ষিত প্ৰত্নতাত্ত্বিক ক্ষেত্ৰ।^১ এই সেনা চাউনী কলং নৈৰ পশ্চিম মুখত স্থাপন কৰা হৈছিল।^২৩ কাজলীচকী কাজলিমুখীয়া গোহাঞি আৰু কাজলি ৰজাৰ দ্বাৰা পৰিচালিত হৈছিল, তেওঁ কাজলমুখত বসবাস কৰি তাত থকা সেনাবাহিনীৰ কোঠ আৰু ১০০০ জন সৈন্য পৰিচালনা কৰিছিল।^৪ শৰাইঘাটৰ ৰণত এই সেনাৰ চকীৰ যথেষ্ঠ প্ৰাধান্য আছিল।

ৰণত ব্যৱহাৰ

বান-তি কোঠৰ উদ্ধাৰ

কাজলীচকীতে চাওঁফা চ্যু-চেং-ফাৰ দিনত কাজলি ৰজা নামৰ এজন ৰজা দায়িত্বত ৰখা হৈছিল।^৫ লাকনি কাট-ৰাও বৰ্ষ (১৬৩৭ চনত) চাওফা চ্যু-চেং-ফাই নেওগ ফুকনৰ পুতেক এজনক কাজলিত কাজলি ৰজাৰ লগতে আহোম ৰাজ্যৰ কেইবাজনো ৰজাক আৰু ডাঙৰীয়াক গোট খুৱাই উপহাৰ দিয়াৰ লগতে মোগলৰ বিৰুদ্ধে যুঁজিবলৈ আদেশ দিছিল।^৫ মোগলৰ সৈতে হোৱা ৰণত বান-তি নামৰ কোঠটো মোগলে লৈছিল।^৫ আহোম সেনাই নিশা হাবানখান নামৰ মোগল বিষয়া আৰু বহু মুছলমানক হত্যা কৰি বহু বন্দুক, তৰোৱাল আৰু দহটা ঘোঁৰা লৈছিল।^৫ বান-তিৰ উদ্ধাৰত কাজালীচকী ব্যৱহাৰ হৈছিল।

কাজলীৰ ৰণ (১৬৪০)

চাওফা চ্যু-ছেং-ফাৰ শাসন কালত লাক-নি ৰাও-চেও বৰ্ষ (ইংৰাজী ১৬৪০ চনত) মুছলমান সেনাই আগীয়াথুঠি গড় দখল কৰি কাজলীলৈকে আগুৱাই আহি কাজলী দখল কৰিছিল।^৬ চাওফা চ্যু-ছেং-ফাই বৰগোহাঞি (থাও লুং), বুঢ়াগোহাঞি (ফ্ৰুং মুঙ) আৰু বৰপাত্ৰ গোহাঞিক (ছেং লুং) কাজলিত দখল কৰি থকা মুছলমান সৈন্যক খেদিবলৈ আদেশ দিছিল।^৬ কিন্তু এই খবৰ পোৱাৰ আগেয়ে হৰি ডেকা আৰু মৰোৱা কোঁৱৰ নামৰ বিষয়া দুজনে আক্ৰমন কৰি কাজলি পুনৰ উদ্ধাৰ কৰি শত্ৰু পক্ষক খেদি পঠাই।^৬ চ্যু-ছেং-ফাই বৰবৰুৱাক (ফু-কে-লুং) কাজলিত ৰখি থকাৰ আদেশ দিয়ে।^৬ মুছলমান সৈন্য আকৌ ঘূৰি আহি কাজলিত আক্ৰমণ কৰে আৰু দুয়ো পক্ষৰ বহুতো লোক মৰে। মুছলমান সৈন্য যুঁজিব নোৱাৰি পিছুৱাই যায়।^৬ ডাঙৰীয়া সকলে চাওফাৰ আদেশলৈ অপেক্ষা নকৰি শত্ৰু পক্ষক বালিৰ চৰত বৃহৎ অস্ত্ৰ আৰু নাও লৈ খেদি যায়। মোগল সৈন্যই ডাঙৰ জাহাজ লৈ আগবাঢ়ি আহে।^৬ বিহুৱা আৰু লাই হাজৰিকা নামৰ দুজন বিষয়া যুদ্ধ এৰি পলাই যোৱাত চ্যু-চেং-ফাই মৃত্যু দণ্ড দিয়ে। আহোম সৈন্য পিছুৱাই কলিয়াবৰৰ গড়ত ছাউনী পাতে।^৬

বৰ্তমানৰ কাজলীচকী

বৰ্তমান কাজলিচকি এক পৰ্যটনৰ কেন্দ্ৰৰ লগতে প্ৰত্নতাত্ত্বিক স্থান। কাজলি চকীৰ পিন নং হৈছে ৭৮১১৫০।^৭

লগতে চাওক

• শৰাইঘাটৰ যুদ্ধ
• লাচিত বৰফুকন

উৎস প্ৰসংগ

• Baruah, GC. (1930). Ahom-Buranji
• Gait, Edward A. (1906). A History of Assam
• Allen, Basil Copleston. (1905). Assam District Gazetteers: Nowgong