হালধীয়া চৰায়ে বাওধান খায় (চলচ্চিত্ৰ)

হালধীয়া চৰায়ে বাওধান খায় (The Catastrophe) ১৯৮৭ চনত মুক্তিপ্ৰাপ্ত বিশিষ্ট পৰিচালক জাহ্নু বৰুৱাৰ তৃতীয়খন অসমৰ চলচ্চিত্ৰ। পাটকাই ফিল্মচৰ বেনাৰত নিৰ্মিত এই ছবি খনৰ কাহিনীভাগ হোমেন বৰগোহাঞিৰ একে নামৰ বহু পঠিত উপন্যাসৰ পৰা লোৱা হৈছে। ছবিখনে ৩৫তম ৰাষ্ট্ৰীয় চলচ্চিত্ৰ মহোৎসৱত (১৯৮৭) শ্ৰেষ্ঠ ছবিৰ স্বৰ্ণকমল বঁটা^১ পোৱাৰ উপৰিও আন্তঃৰাষ্ট্ৰীয় পৰ্যায়ৰ বঁটাও পাইছিল। ছবিখন ৩৫ মিঃমিঃত নিৰ্মাণ কৰা হৈছিল।^২

কাহিনী

ৰসেশ্বৰ এজন দুখীয়া খেতিয়ক। পত্নী আৰু তাৰ লগতে সাতোটা সন্তানৰ সৈতে সুখী পৰিয়াল আছিল ( আৰু এটা আছিল কিন্তু সাত বছৰমান বয়সতে তেজ-গ্ৰহণী হৈ মৰিল)। সামান্য এটুকুৰা মাটিত খেতিবাতি কৰি কিবাকৈ জোৰা-তাপলি মাৰি সংসাৰ চলায়। এজাক বৰষুণৰ আশাত সকলোৱে আকাশলৈ চাই থাকে। অৱশেষত বহু আকাংক্ষিত বৰষুণ এজাক আহিল। ৰসেশ্বৰে নাঙল লৈ হাল বাবলৈ গ'ল। পথাৰলৈ গৈহে ৰসেশ্বৰে গম পালে যে যিটুকুৰা মাটি পুৰুষানুক্ৰমে খেতি কৰি আহিছে, সেই টুকুৰা মাটিৰ গৰাকী এতিয়াৰে পৰা গাঁৱৰ প্ৰভাৱশালী মহাজন সনাতনহে। ৰসেশ্বৰ সনাতন মহাজনৰ ওচৰত ঋণগ্ৰস্থ হৈ আছিল। সেই ঋণ আৰু তাৰ বাবদ দিবলগীয়া সুতৰ বিনিময়ত মহাজনে মাটিখিনি দখল কৰিলে। এই অন্যায়ৰ বিৰুদ্ধে তেওঁ আদালতত গোচৰ তৰিলে। কিন্তু ৰঙাফিতাৰ মেৰপাকত ন্যায় পাব দূৰৈৰ কথা, তেওঁ আৰু বেছি দুৰ্দশাগ্ৰস্থহে হৈ পৰিল। এনেতে নিৰ্বাচন আহিল। সনাতন মহাজনো নিৰ্বাচনৰ প্ৰাৰ্থী হ'ল। পেটৰ দায়ত ৰসেশ্বৰে চিৰশক্ৰ সনাতন মহাজনৰ হৈ নিৰ্বাচনৰ কাম কৰিবলৈ বাধ্য হ'ল। সৌভাগ্যক্ৰমে ৰসেশ্বৰৰ গোচৰটো এজন সত্‍ হাকিমৰ ওচৰলৈ গ'ল। হাকিমে দেখিলে যে ন্যায়িক যুদ্ধত ৰসেশ্বৰে মাটি ঘূৰাই পোৱাৰ সম্ভৱনা ক্ষীণ বা গোচৰ চলাই থকাটোৱো এজন কপৰ্দকহীন মানুহৰ বাবে অসম্ভৱ কথা। সেয়েহে হাকিমে গোচৰ চলাই যোৱাৰ সলনি অন্য এটা পন্থা উলিয়ালে। হাকিমে মহাজনক বুজালে যে মহাজন যিহেতু এজন নিৰ্বাচনী প্ৰাৰ্থী, ৰসেশ্বৰৰ বিষয়টোক লৈ বিৰোধীপক্ষই সুবিধা ল’ব পাৰে। এতেকে মাটিখিনি ৰসেশ্বৰক ওভতাই দিয়া উচিত। মহাজন মান্তি হ'ল আৰু মাটিখিনি ওভতাই দিলে।^২১

অভিনয়ত

• ইন্দ্ৰ বণিয়া (ৰসেশ্বৰ)
• পূৰ্ণিমা পাঠক শইকীয়া (তৰু)
• প্ৰাঞ্জল শইকীয়া (মাটিৰ হাকিম)
• হেমেন চৌধুৰী (সনাতন মহাজন)
• অমূল্য কাকতি
• বাদল দাস
• গৌৰৱ বনিয়া
• সুভনা গগৈ
• টংক শইকীয়া
• পবিত্ৰ কুমাৰ দাস
• মুনীন ডেকা
• ধ্ৰুৱজ্যোতি মহন্ত
• কিশোৰ চৌধুৰী^২

কলাকুশলী

• সংলাপ- জাহ্নু বৰুৱা, ৰত্ন ওজা
• শব্দগ্ৰহণ-যতীন শৰ্মা
• কলা নিৰ্দেশনা-ফটিক বৰুৱা^২

সন্মান তথা স্বীকৃতি

• শ্ৰেষ্ঠ পূৰ্ণদৈৰ্ঘ্য ছবিৰ ৰাষ্ট্ৰীয় চলচ্চিত্ৰ বঁটা (স্বৰ্ণকমল) (১৯৮৭)^১
• লোকাৰ্ণো আন্তঃৰাষ্ট্ৰীয় চলচ্চিত্ৰ মহোৎসৱ:
  • চিলভাৰ লিওপাৰ্ড
  • বৰ্ল্ড একুমেনিকাল এৱাৰ্ড
  • চিটিজেন্‌চ প্ৰাইজ
  • শ্ৰেষ্ঠ অভিনেতা (ইন্দ্ৰ বনিয়া)
• টকিঅ’ আন্তঃৰাষ্ট্ৰীয় চলচ্চিত্ৰ মহোৎসৱ: এছিয়াৰ শ্ৰেষ্ঠ বঁটা
• এমিয়েন আন্তঃৰাষ্ট্ৰীয় চলচ্চিত্ৰ মহোৎসৱ, ফ্ৰান্স:
  • শ্ৰেষ্ঠ ছবি
  • শ্ৰেষ্ঠ অভিনেতা
• ৰাজ্যিক বঁটা: শ্ৰেষ্ঠ ছবি, শ্ৰেষ্ঠ পৰিচালক, শ্ৰেষ্ঠ অভিনেতা, শ্ৰেষ্ঠ চিত্ৰনাট্য, শ্ৰেষ্ঠ সম্পাদনা
• ভাৰতীয় পেনোৰামালৈ নিৰ্বাচিত।^৩

বাহ্যিক সংযোগ

• ইউটিউৱত হালধীয়া চৰায়ে বাওধান খায়
• Page at AllMovie.com containing plot of this movie
• Page at National Film Development Corporation (NFDC) website