ভূপেন উজীৰ

ভূপেন উজীৰ (Bhupen Uzir) হৈছে অসম, ভাৰতৰ এগৰাকী সংগীত শিল্পী, সুৰকাৰ, বাদ্যযন্ত্ৰী^১ আৰু সংগীত পৰিচালক৷ তেখেতে জীৱন সুৰভি, ব’হাগৰ দুপৰীয়া, প্ৰতিদান, বুকুৰ মাজত জ্বলে, যৌৱনে আমনি কৰে,^২ এই মৰম তোমাৰ বাবেকে ধৰি বিশখনৰো অধিক অসমীয়া ছবিৰ বাবে সংগীত পৰিচালনা কৰিছে৷^১৩ ২০২৩ চনত তেখেতক জীৱনজোৰা সাধনাৰ বঁটা প্ৰদান কৰা হয়৷

প্ৰাৰম্ভিক জীৱন আৰু শিক্ষা

ভূপেন উজীৰৰ জন্ম হৈছিল ১৯৫৩ চনৰ ৫ এপ্ৰিলত, যোৰহাটত। শিল্পীগৰাকীয়ে যোৰহাটতে শৈশৱ পাৰ কৰে৷ ^১ তেখেতৰ পিতৃৰ নাম আছিল নীৰেন উজীৰ৷ যোৰহাটৰ চাৰি নম্বৰ ৱাৰ্ড প্ৰাথমিক বিদ্যালয়ত প্ৰাথমিক শিক্ষা গ্ৰহণ কৰি ভূপেন উজীৰে পৰৱৰ্তী সময়ত যোৰহাটৰে গৱৰ্ণমেণ্ট বয়জ হাইস্কুলত নামভৰ্তি কৰে৷ ইয়াত শিক্ষা শেষ কৰি পৰৱৰ্তী সময়ত তেখেত গুৱাহাটীৰ বাণিজ্য মহাবিদ্যালয়ত উচ্চশিক্ষাৰ বাবে নামভৰ্তি কৰে৷ বাল্যকালৰে পৰা সংগীতৰ প্ৰতি তেখেতে বিশেষ ৰুচি আছিল৷ গীটাৰকে ধৰি একাধিক বাদ্যযন্ত্ৰ বজাবলৈ তেওঁ শিকিছিল৷ ^৪

কৰ্মজীৱন

ভূপেন উজীৰে ভাৰতীয় খাদ্য নিগমত কিছুসময়ৰ বাবে চাকৰি কৰে৷ চাকৰিৰ সময়ছোৱাতো তেখেতে সংগীতৰ অনুশীলন এৰি দিয়া নাছিল। যেতিয়া চাকৰিজীৱনে তেখেতৰ সাংগীতিক যাত্ৰাৰ ক্ষেত্ৰত বাধাৰ সৃষ্টি কৰা যেন অনুমান হ'ল, তেতিয়া তেখেতে ভাৰতীয় খাদ্য নিগমৰ চাকৰি ত্যাগ কৰিলে৷^১

চাকৰি ত্যাগ কৰি ভূপেন উজীৰে গুৱাহাটীৰ গীতানগৰত এটা ভাড়াঘৰ লয়৷ এইটো ভাড়াঘৰতে তেখেতে পোনপ্ৰথমবাৰৰ বাবে নিজাববীয়াকৈ এটা সংগীতৰ ষ্টুডিঅ' সাজু কৰি তুলিলে৷ ষ্টুডিঅ'টোৰ নাম আছিল অডিটেক। ^১৪২ইতিমধ্যে ব্যৱহৃত এটা শব্দগ্ৰহণ যন্ত্ৰ ক্ৰয় কৰি তেখেতে এই ষ্টুডিঅ'টো আৰম্ভ কৰিছিল।^১

ভূপেন উজীৰে পৰৱৰ্তী সময়ত ভ্ৰাইব্ৰেশ্বন নামেৰে এটি সাংগীতিক বেণ্ডো আৰম্ভ কৰে৷ উল্লেখ্য যে, বেণ্ডটোৱে ৰাইজৰ মাজত জনপ্ৰিয়তা লাভ কৰিবলৈ সক্ষম হয়৷ তেখেতে নিজেই গীতাৰ নিৰ্মাণ কৰিছিল৷^৪

সংগীত পৰিচালনা

ভূপেন উজীৰে সংগীত পৰিচালনা কৰা কেইখনমান অসমীয়া চলচ্চিত্ৰ হৈছে:

• প্ৰতিদান
• জীৱন সুৰভি^১
• উৰ্বশী
• জখম
• এই মৰম তোমাৰ বাবে
• পূজা
• জোনাকী মন
• পিতাপুত্ৰ
• বৰদৈচিলা
• ভাই ভাই
• ধ্ৰুৱতৰা
• ব'হাগৰ দুপৰীয়া
• বুকুৰ মাজত জ্বলে^৪
• যৌৱনে আমনি কৰে আদি৷^৪

ব্যক্তিগত জীৱন

ভূপেন উজীৰে অসমীয়া সংগীত জগতৰ এগৰাকী পৰিচিত শিল্পী আৰু একাধিক অসমীয়া ছবি তথা এলবামত কণ্ঠদান কৰা শান্তা উজীৰৰ লগত বিবাহপাশত আবদ্ধ হৈছিল৷ পৰৱৰ্তী সময়ত ভূপেন-শান্তাৰ যুটিটোক অসমীয়া সংগীত জগতৰ এক উল্লেখযোগ্য যুটি বুলি অভিহিত কৰা হয়৷ ^৪ পৰৱৰ্তী সময়ত দম্পতীটো প্ৰীতিস্মিতা আৰু কীৰ্তিকা নামৰ দুগৰাকী কন্যা সন্তানৰ অভিভাৱকত্ব অৰ্জন কৰে৷

বঁটা-বাহন

২০২৩ চনৰ ২৪ ডিচেম্বৰত ভূপেন উজীৰে অসমৰ ৰেঙনি মিউজিক এৱাৰ্ডৰ পৰা জীৱনজোৰা সাধনাৰ বঁটা লাভ কৰে৷ ^৪

মৃত্যু

২০২৪ চনৰ পহিলা জানুৱাৰীৰ পৰা ভূপেন উজীৰ শ্বাস-প্ৰশ্বাসজনিত ৰোগত আক্ৰান্ত হৈ আছিল৷ তেখেতক ৬ তাৰিখে গুৱাহাটীস্থ নেমকেয়াৰ চিকিৎসালয়ত উন্নত চিকিৎসাৰ হেতু ভৰ্তি কৰোৱা হয়৷^২ এইখন চিকিৎসালয়তে তেখেতে ৯ জানুৱাৰী, মঙলবাৰৰ নিশা দহ বজাত শেষ নিশ্বাস ত্যাগ কৰে।^{১ ৫} মৃত্যুৰ সময়ত তেওঁ পত্নী শান্তা উজীৰ আৰু দুগৰাকী জীয়ৰীক এৰি থৈ যায়৷