পাৰ্ল মানে

পাৰ্ল মানে (ইংৰাজী ভাষা: Pearle Maaney; জন্ম: ২৮ মে' ১৯৮৯) এগৰাকী ভাৰতীয় অভিনেত্ৰী, গীতিকাৰ, ইউটিউবাৰ আৰু টেলিভিছন উপস্থাপিকা। তেওঁ মূলতঃ মালয়ালম অনুষ্ঠানসমূহত কাৰ্যনিৰ্বাহ কৰে। মালয়ালম নৃত্যভিত্তিক ৰিয়েলিটি শ্ব’ ডি ৪ ডান্সৰ তিনিটা ছিজনৰ সহ-উপস্থাপনা কৰাৰ বাবে তেওঁ বিশেষভাৱে পৰিচিত।^১ পাৰ্ল বিগ বছ মালয়ালম ছিজন ১-ৰ প্ৰথম ৰানাৰ্চ-আপ হিচাপেও পৰিগণিত হৈছিল।^২

প্ৰাৰম্ভিক জীৱন

পাৰ্ল মানে কোচিস্থিত এটা চিৰো-মালাবাৰ ছেইণ্ট থমাছ খ্ৰীষ্টিয়ান^৩ যৌথ পৰিয়ালত ডাঙৰ-দীঘল হৈছিল। তেওঁলোকৰ আদি বাসস্থান আছিল চৌৱাৰাত।^৩ তেওঁ থিৰুৱনন্তপুৰমৰ 'হোলী এঞ্জেলছ কনভেণ্ট' আৰু কালামাছেৰীৰ 'ৰাজগিৰি পাব্লিক স্কুল'ত স্কুলীয়া শিক্ষা গ্ৰহণ কৰে। ইয়াৰ পিছত তেওঁ বেংগালুৰুৰ ক্ৰীষ্ট ইউনিভাৰ্চিটিৰপৰা মিডিয়া ষ্টাডিজ বিষয়ত স্নাতক ডিগ্ৰী সম্পূৰ্ণ কৰে।^৪ বৰ্তমান তেওঁৰ পিতৃ-মাতৃ থ্ৰিচূৰত বসবাস কৰে।^৫৬

কৰ্মজীৱন

পাৰ্লে ইণ্ডিয়াভিছনৰ সহযোগী মালয়ালম টেলিভিছন চেনেল য়েছ ইণ্ডিয়াভিছনত সংগীতভিত্তিক অনুষ্ঠান য়েছ জুকবক্সৰ ২৫০ টাতকৈও অধিক খণ্ডৰ আঁত ধৰিছিল।^৭ তেওঁ অমৃতা টিভিত সম্প্ৰচাৰিত ভ্ৰমণ আৰু ৰন্ধন প্ৰণালীভিত্তিক অনুষ্ঠান টেষ্ট অৱ কেৰালাত ছেৰা (Serah) ছদ্মনামেৰে উপস্থপনা কৰিছিল।^৮৯

২০১৪ চনত অক্টোবৰ মাহত তেওঁ মাজহাভিল মনোৰমা চেনেলত গামঅন ডি২ নামৰ নৃত্যৰ ৰিয়েলিটি শ্ব’টোৰ উপস্থাপনা আৰম্ভ কৰে। ইয়াৰ পূৰ্বে ইয়াৰ উপস্থাপিকা আছিল জুৱেল মেৰী। এই শ্ব’টোত তেওঁৰ সহ-উপস্থাপক আছিল গোবিন্দ পদ্মসূৰ্য।^১০ ইয়াৰ উপৰি তেওঁ কৌমূদী টিভিৰ অনুষ্ঠান চিনেমা কোম্পানী (ছিজন ২)-ৰ আঁত ধৰিছিল। ২০১৮ চনত তেওঁ এছিয়ানেটত সম্প্ৰচাৰিত ৰিয়েলিটি শ্ব’ বিগ বছৰ প্ৰথম ছিজনত প্ৰতিযোগী হিচাপে অংশগ্ৰহণ কৰে আৰু ৰানাৰ্চ-আপ খিতাপ দখল কৰে। ১০০ দিন সম্পূৰ্ণ কৰা তেৱেঁই আছিল একমাত্ৰ মহিলা প্ৰতিযোগী।

ব্যক্তিগত জীৱন

২০১৮ চনত বিগ বছ ৰিয়েলিটি শ্ব’ৰ প্ৰথম ছিজনৰ সময়ত তেওঁ সহ-প্ৰতিযোগী শ্ৰীনিশ অৰবিন্দৰ সৈতে এক ৰোমাণ্টিক সম্পৰ্কত আবদ্ধ হয় আৰু দুয়ো বিবাহপাশত আবদ্ধ হোৱাৰ ইচ্ছা প্ৰকাশ কৰে।^১১ ২০১৯ চনৰ ১৭ জানুৱাৰীত এটা ব্যক্তিগত অনুষ্ঠানত মানে শ্ৰীনিশ অৰবিন্দৰ সৈতে আঙঠি পিন্ধোৱা পৰ্ব সম্পন্ন কৰে।^১২ ২০১৯ চনৰ ৫ মে'ত এই দম্পতীয়ে খ্ৰীষ্টিয় ৰীতি-নীতি অনুসৰি বিবাহপাশত আবদ্ধ হয় আৰু ২০১৯ চনৰ ৮ মে'ত তেওঁলোকৰ এটা হিন্দু বিবাহ অনুষ্ঠানও সম্পন্ন হয়।^১৩ তেওঁলোকৰ নীলা আৰু নিতাৰা নামৰ দুগৰাকী কন্যা সন্তান আছে, যি ক্ৰমে ২০২১ চনৰ ২০ মাৰ্চ আৰু ২০২৪ চনৰ ১৩ জানুৱাৰীত জন্মগ্ৰহণ কৰিছিল।^{১৪১৫১৬}

বিতৰ্ক

২০২৬ চনৰ জুলাই মাহত পাৰ্লে শিক্ষাৰ্থীসকলৰ নেতৃত্বত হোৱা ২০২৬ দিল্লী যন্তৰ মন্তৰ প্ৰতিবাদ সন্দৰ্ভত মন্তব্য কৰি এটা ইনষ্টাগ্ৰাম প’ষ্ট কৰিছিল। তেওঁৰ এই প’ষ্টটোৱে মিশ্ৰিত প্ৰতিক্ৰিয়া লাভ কৰিছিল, যিবোৰৰ বেছিভাগেই আছিল নেতিবাচক।^১৭ তেওঁক সমালোচনা কৰাসকলৰ ভিতৰত আছিল চলচ্চিত্ৰ পৰিচালক চিবি মালায়িলৰ পুত্ৰ জো চিবি মালায়িল।^১৮ পাৰ্লে তেওঁৰ ইনষ্টাগ্ৰাম ষ্ট’ৰীত জো-ৰ উত্তৰ দি চিবি মালায়িলক এজন ব্যৰ্থ চলচ্চিত্ৰ নিৰ্মাতা বুলি কটাক্ষ কৰে, যিটো তেওঁ পিছত মচি পেলায়।^{১৯২০২১}

চলচ্চিত্ৰপঞ্জী

চলচ্চিত্ৰসমূহ

চুটি চলচ্চিত্ৰসমূহ

টেলিভিছন

উপস্থাপিকা হিচাপে

অন্যান্য ভূমিকা

সংগীতপঞ্জী