নয়নতাৰা

নয়নতাৰা বা ডায়েনা মৰিয়ম কুৰিয়ান (Nayanthara; জন্ম- ১৮ নৱেম্বৰ ১৯৮৪)^১ হৈছে এগৰাকী ভাৰতীয় অভিনেত্ৰী। তেখেতক প্ৰধানকৈ তামিল আৰু তেলেগু ভাষাৰ ছবিত দেখিবলৈ পোৱা যায়। কোচী টাইমছ-এ তেখেতক "২০১৪ বৰ্ষৰ পোন্ধৰগৰাকী আকাংক্ষিত নাৰী"ৰ তালিকাভুক্ত কৰিছিল।^২ ২০১৮ বৰ্ষত ফৰ্বছ ইণ্ডিয়াই প্ৰস্তুত কৰা "১০০ গৰাকী চেলিব্ৰিটি"ৰ তালিকাত স্থানলাভ কৰা নয়নতাৰাই হৈছে একমাত্ৰ দক্ষিণ ভাৰতীয় অভিনেত্ৰী। সেইসময়ত তেখেতৰ সৰ্বমুঠ আয় আছিল ১৫.১৭ কোটি।^৩

২০০৩ চনত মানাছিনাকাৰে নামৰ মালায়ালম ভাষাৰ ছবিখনৰ জৰিয়তে তেখেতে অভিনয়-জীৱনৰ পাতনি মেলে। তেখেতৰ সহযোগী আছিল জয়াৰাম। নয়নতাৰাই অভিনয় কৰা প্ৰথমখন তামিল ভাষাৰ ছবি আছিল আয়া (২০০৫)। আনহাতে প্ৰথমখন তেলেগু ভাষাৰ ছবি আছিল লক্ষ্মী (২০০৬)।^৪

২০১০ চনত ছুপাৰ নামৰ ছবিখনৰ জৰিয়তে তেখেতে কানাড়া ভাষাৰ ছবিতো যাত্ৰাৰম্ভ কৰে।^৫ এইখনেই তেখেতৰ একমাত্ৰ কানাড়া ছবি। ২০১১ চনত মুক্তিলাভ কৰা ছবি শ্ৰী ৰামা ৰাজ্যমত তেখেতে সীতাৰ ভূমিকা ৰূপায়ণ কৰে। এইখন ছবিত কৰা অভিনয়ৰ বাবে তেখেতে ফিল্মফেয়াৰ বঁটা (তেলেগু ভাষাৰ ছবিত শ্ৰেষ্ঠ অভিনেত্ৰী শিতান) লাভ কৰে। লগতে শ্ৰেষ্ঠ অভিনেত্ৰীৰ নন্দী বঁটাও লাভ কৰে। "ৰাজা ৰাণী" (২০১৩), "নান্নুম ৰাওদী ধান" (২০১৫), "আৰাম" (২০১৭)ৰ বাবে তেখেতে তামিল ভাষাৰ শ্ৰেষ্ঠ আভিনেত্ৰী শিতানত ফিল্মফেয়াৰ বঁটা অৰ্জন কৰে। ২০১৭ চনতে মালায়ালম ছবি "পুথিয়া নিয়ামাম" (২০১৬)ৰ বাবেও তেখেতে মালায়ালম ভাষাৰ শ্ৰেষ্ঠ অভিনেত্ৰী শিতানত ফিল্মফেয়াৰ বঁটা লাভ কৰে।^৬৭৮

প্ৰাৰম্ভিক জীৱন

কৰ্ণাটকৰ বেংগালুৰুত এটা খ্ৰীষ্টানধৰ্মী মালায়ালম পৰিয়ালত নয়নতাৰাৰ জন্ম হৈছিল।^৯১০ পিতৃ আছিল কুৰিয়ান কড়িয়াট্টু আৰু মাতৃ আচিল ওমানা কুৰিয়ান।^১১১২ জন্মতে নয়নতাৰাৰ নাম আছিল ডায়েনা মৰিয়ম কুৰিয়ান।^১ তেখেতে জ্যেষ্ঠ ভ্ৰাতৃ লেনো ডুবাইৰ বাসিন্দা।^১৩ পিতৃ ভাৰতীয় বায়ু সেনাৰ বিষয়া হোৱা হেতুকে নয়নতাৰাই ভাৰতৰ বিভিন্ন স্থানত শিক্ষাগ্ৰহণ কৰিবলগা হৈছিল, বিশেষকৈ উত্তৰ ভাৰতত।^১৩ জামনগৰ, গুজৰাট আৰু দিল্লীত তেখেতে পঢ়াশলীয়া শিক্ষা সমাপ্ত কৰে। থিৰুভাল্লাৰ বালিকামাডোম ছোৱালী উচ্চতৰ মাধ্যমিক বিদ্যালয়ত তাৰপিছত তেখেতে শিক্ষাগ্ৰহণ কৰে। তাৰপিছত মাৰথোমা কলেজত নামভৰ্তি কৰে। থিৰুভাল্লাৰ এইখন শিক্ষানুষ্ঠানত তেখেতে ইংৰাজী সাহিত্যত স্নাতক ডিগ্ৰী অধ্যয়ন কৰে।^১৪

অভিনয়-জীৱন

কলেজত পঢ়ি থকা অৱস্থাতেই নয়নতাৰাই অংশকালীন মডেল হিচাপে কাম কৰে৷ পৰিচালক সত্যন অন্তিকাড়ে তেওঁৰ কাম প্ৰত্যক্ষ কৰে আৰু ২০০৩ চনৰ ছবি মানাছিনাকাড়েৰ চৰিত্ৰ এটিত অভিনয়ৰ সুযোগ প্ৰদান কৰে৷ ^১৫ ছবিখনে আশাতীতভাৱে উপাৰ্জন কৰে আৰু নয়নতাৰালৈও ইয়াৰ পিছত বিভিন্ন কৰ্মসুযোগ আহি থাকে৷ ২০০৪ চনত মুক্তিপ্ৰাপ্ত নয়নতাৰাৰ দুয়োখন ছবি যথাক্ৰমে নাট্টুৰাজাভু আৰু বিস্ময়াথুম্বাথুত সহযোগী অভিনেতা আছিল মোহনলাল৷^১৬

নয়নতাৰাই পৰৱৰ্তী সময়ত তামিল আৰু তেলেগু ভাষাৰ ছবিতো পদাৰ্পণ কৰে৷ ২০০৫ চনত তেখেতে আয়া নামৰ তামিল ভাষাৰ ছবিখনত অভিনয় কৰে৷ "Behindwoods.com"ৰ মতে-সেইয়া "তামিল ভাষাৰ ছবিত তেখেতৰ চাঞ্চল্যসৃষ্টিকাৰী পদাৰ্পণ" ("sensational debut in Tamil")^১৭ ২০০৬ চনত মুক্তি লাভ কৰা নয়নতাৰাৰ প্ৰথমখন ছবি আছিল কালৱানিন কাঢ়ালী, যিখনৰ প্ৰসংগত "Indiaglitz.com"-এ কয় যে- তেখেতৰ "অভিনয় আছিল ছবিখনৰ শক্তি"৷^১৮ ২০০৮ চনত তেখেতেৰ পাঁচখন ছবিয়ে মুক্তি লাভ কৰে৷ তাৰ ভিতৰত চাৰিখনেই তামিল ভাষাৰ আছিল৷ ^১৯

২০১০ চনত মুক্তি লাভ কৰা নয়নতাৰাৰ আটাইবোৰ ছবিয়েই বক্স অফিচত সফল বিবেচিত হয়৷ তেলেগু ভাষাৰ "আধুৰছ" আৰু "ছিমহা", মালায়ালম ভাষাৰ "বডিগাৰ্ড", তামিল ভাষাৰ "বছ এনগিৰা ভাস্কৰণ" আৰু কানাড়া ভাষাত নিৰ্মিত ছবি "ছুপাৰ"-এ তেখেতক চৰ্চিত আৰু জনপ্ৰিয় কৰি তোলে৷ পাঁচখন ছবিয়েই হিট ছবিৰ মৰ্যাদা পায়৷^২০২১

২০১১ চনত নয়নতাৰাই অভিনয় কৰা কেৱল এখন ছবিয়েহে মুক্তিলাভ কৰে৷ যাৰ নাম আছিল "শ্ৰী ৰামা ৰাজ্যম"৷ ছবিখনত তেখেতে সীতাৰ ভূমিকা ৰূপায়ণ কৰে আৰু তাৰ বাবে তেখেতে সমালোচকৰ পৰা প্ৰশংসা লাভ কৰে৷ "ৰেডিফ ডট কম"ৰ মতে "Nayanthara is the surprise package of the film. As Sita, she too has played the role of her lifetime. She gave a fine understated performance conveying a kaleidoscope of emotions."

ব্যক্তিগত জীৱন

নয়নতাৰাই "ৱালাবান" ছবিত অভিনয় কৰাৰ পাছত "ছিলামবাৰাচান"ৰ লগত সম্পৰ্ক গঢ়ি তুলিছিল। অৱশ্যে তেওঁলোকৰ সম্পৰ্ক স্থায়ী নহ'ল। পৰৱৰ্তী পৰ্যায়ত "ৱিল্লু" নামৰ ছবিত কাম কৰি থকা সময়ত নয়নতাৰা আৰু প্ৰভু দেৱাৰ মাজত প্ৰেমৰ সম্পৰ্ক স্থাপিত হয়। কিছু বছৰ সম্পৰ্কত থাকি তেওঁলোকে বিবাহপাশত আবদ্ধ হোৱাৰ কথা ভাবে। কিন্তু ২০১০ চনত প্ৰভু দেৱাৰ পত্নী লতাই "পাৰিবাৰিক ন্যায়ালয়"ত এটা আবেদন দাখিল কৰে আৰু নয়নতাৰাৰ লগত গঢ়ি উঠা সম্পৰ্কটোৰ সন্দৰ্ভত প্ৰশ্ন উত্থাপন কৰে, লগতে তেওঁৰ লগত পুনৰ্মিলনৰ অনুৰোধ কৰে।^২২ ইয়াৰ উপৰিও লতাই কয় যে, যদিহে প্ৰভু দেৱাই নয়নতাৰাক বিয়া কৰায় তেন্তে তেওঁ অনশন-ধৰ্মঘটৰ পন্থা অৱলম্বন কৰিব। একেসময়তে তামিল সংস্কৃতিত অশুদ্ধতা বিয়পোৱাৰ অভিযোগ তুলি মহিলা সমিতিয়ে নয়নতাৰাৰ বিৰোধিতা কৰে আৰু আন্দোলনৰ কাৰ্যসূচী গ্ৰহণ কৰে, লগতে তেখেতেৰ প্ৰতিকৃতি দাহ কৰে।^২৩ ২০১২ চনত নয়নতাৰাই প্ৰভু দেৱাৰ লগত থকা সম্পৰ্কটো ছিন্ন কৰাৰ কথাটো ৰাজহুৱা কৰে।^{২৪২৪২৫২৬}

চলচ্চিত্ৰপুঞ্জী