সাগৰিকা ঘোষ

সাগৰিকা ঘোষ (Sagarika Ghose; জন্ম: ৮ নৱেম্বৰ ১৯৬৪) হৈছে এগৰাকী ভাৰতীয় সাংসদ, সাংবাদিক, স্তম্ভলেখক আৰু লেখিকা।^১২৩ ১৯৯১ চনৰ পৰা তেওঁ সাংবাদিক হিচাপে কৰ্মৰত৷ তেওঁ দ্য টাইমছ অৱ ইণ্ডিয়া, আউটলুক আৰু দ্য ইণ্ডিয়ান এক্সপ্ৰেছত কাম কৰিছে। তেওঁ বিবিচিৱৰ্ল্ডৰ প্ৰশ্নকাল ইণ্ডিয়া আৰু সংবাদগোষ্ঠী চিএনএন-আইবিএনৰ লগত জড়িত হৈছিল৷ তেওঁ চিএনএন-আইবিএনৰ উপ-সম্পাদকো আছিল। সাংবাদিকতাত কেইবাটাও বঁটা লাভ কৰা ঘোষে দুখন উপন্যাসৰ লগতে ইন্দিৰা গান্ধীৰ জীৱনী ‘Indira: India's Most Powerful Prime Minister’ লিখিছে। ২০১৪ চনৰ পৰা ২০২০ চনলৈকে তেওঁ দ্য টাইমছ অৱ ইণ্ডিয়াৰ সম্পাদনা উপদেষ্টা হিচাপে কাম কৰিছিল।^৪ ২০২২ চনত তেওঁৰ দ্বাৰা লিখিত ভাৰতৰ প্ৰাক্তন প্ৰধানমন্ত্ৰী অটল বিহাৰী বাজপেয়ীৰ জীৱনী প্ৰকাশ পায়।^৫

শিক্ষা

সাগৰিকা ঘোষে আৰকে পুৰমৰ দিল্লী পাব্লিক স্কুলত অধ্যয়ন কৰিছিল৷ তেওঁ দিল্লীৰ ছেইণ্ট ষ্টিফেনছ কলেজৰ পৰা ইতিহাস বিষয়ত কলাৰ স্নাতক ডিগ্ৰী অৰ্জন কৰে৷ ১৯৮৭ চনত ৰোডছ বৃত্তি লাভ কৰা সাগৰিকা ঘোষে মেগডেলেন কলেজৰ পৰা আধুনিক ইতিহাস বিষয়ত কলাৰ স্নাতক আৰু অক্সফৰ্ডৰ ছেইণ্ট এণ্টনি কলেজৰ পৰা এমফিল ডিগ্ৰী লাভ কৰিছে।^৬

কৰ্মজীৱন

১৯৯১ চনৰ পৰা সাগৰিকা ঘোষে দ্য টাইমছ অৱ ইণ্ডিয়া, আউটলুক আৰু দ্য ইণ্ডিয়ান এক্সপ্ৰেছত সাংবাদিক হিচাপে কাম কৰিছে৷ তেওঁ সংবাদ নেটৱৰ্ক চিএনএন-আইবিএনৰ উপ-সম্পাদক আৰু চেনেলটোৰ প্ৰাইম টাইম এংকৰ হিচাপে জড়িত হৈছিল।^৭৮৯ ২০১৪ চনৰ জুলাই মাহত ঘোষে চিএনএন-আইবিএনৰ উপ-সম্পাদক পদৰ পৰা পদত্যাগ কৰে।^১০

২০০৪ চনত তেওঁ 'কুৱেশ্যন টাইম ইণ্ডিয়া' আয়োজন কৰা প্ৰথমগৰাকী মহিলা হিচাপে পৰিগণিত হয়।^১১তেওঁৰ লেখা-মেলা আৰু সংবাদ-সম্প্ৰচাৰে তেওঁৰ জনপ্ৰিয়তা বঢ়াইছে৷ ইয়াৰ লগতে সোঁপন্থী দৰ্শকৰ মাজত সমালোচনাৰো সৃষ্টি কৰিছে।^১২১৩

২০১৩ চনত আম আদমি পাৰ্টিৰ অৰবিন্দ কেজৰিৱালৰ সৈতে ঘোষে টুইটাৰত কৰা সাক্ষাৎকাৰটো নিৰ্বাচনৰ পূৰ্বে এজন ভাৰতীয় ৰাজনীতিবিদে ছ’চিয়েল মিডিয়াত দিয়া প্ৰথমটো সাক্ষাৎকাৰ হিচাপে পৰিগণিত হৈছিল।^১৪মুকেশ আম্বানীৰ নেতৃত্বত ৰিলায়েন্স ইণ্ডাষ্ট্ৰীজ লিমিটেডে নেটৱৰ্কটো অধিগ্ৰহণ কৰাৰ পিছত ২০১৪ চনৰ ৫ জুলাইত ঘোষে চিএনএন-আইবিএনৰ পৰা পদত্যাগ কৰে। তেওঁ সেই সময়ত চেনেলটোৰ উপ-সম্পাদক আছিল।^১৫১৬

ৰাজনৈতিক জীৱন

২০২৪ চনৰ ১১ ফেব্ৰুৱাৰীত সাগৰিকা ঘোষে সৰ্বভাৰতীয় তৃণমূল কংগ্ৰেছত যোগদান কৰে৷^১৭ ২০২৪ চনতে তেওঁক দলটোৰ ফালৰ পৰা ৰাজ্যসভালৈ মনোনীত কৰা হয়৷^১৮

ব্যক্তিগত জীৱন

সাগৰিকা ঘোষৰ পিতৃ হৈছে ভাস্কৰ ঘোষ৷ তেওঁ ভাৰতীয় প্ৰশাসনিক সেৱা ১৯৬০ বেটচৰ৷ ভাস্কৰ ঘোষ ভাৰতীয় ৰাজহুৱা টেলিভিছন নেটৱৰ্ক দূৰদৰ্শনৰ প্ৰাক্তন সঞ্চালক প্ৰধান।^১১ তেওঁৰ দুগৰাকী পেহীয়েকৰ ভিতৰত আছে প্ৰাক্তন ৰাষ্ট্ৰদূত আৰু কূটনীতিবিদ অৰুন্ধতী ঘোষ আৰু ভাৰতৰ উচ্চতম ন্যায়ালয়ৰ প্ৰাক্তন ন্যায়াধীশ ৰুমা পাল৷ সাগৰিকা ঘোষে ভাৰতীয় প্ৰাক্তন টেষ্ট ক্ৰিকেটাৰ দিলীপ চৰদেশাইৰ পুত্ৰ সাংবাদিক তথা বাতৰি পৰিৱেশক ৰাজদ্বীপ চৰদেশাইৰ সৈতে বিবাহপাশত আবদ্ধ হয়। ৰাজদ্বীপ আৰু সাগৰিকাৰ দুটা সন্তান আছে৷ পুত্ৰ ড° ঈশান চৰদেশাই আৰু অধিবক্তা কন্যা তাৰিণী চৰদেশাই৷^১৯

গ্ৰন্থপুঞ্জী

• The Gin Drinkers (১৯৯৮)
• Blind Faith (২০০৪)
• Indira: India's Most Powerful Prime Minister (২০১৭)
• Why I Am A Liberal: A Manifesto For Indians Who Believe in Individual Freedom (২০১৮)
• Atal Bihari Vajpayee - India’s Most Loved Prime Minister (২০২২)