মিতালী ৰাজ

মিতালী দৰাই ৰাজ (Mithali Dorai Raj,জন্ম: ৩ ডিচেম্বৰ ১৯৮২) এগৰাকী ভাৰতীয় ক্ৰিকেট খেলুৱৈ আৰু বৰ্তমান ভাৰতীয় মহিলা ক্ৰিকেট দলৰ টেষ্ট আৰু এদিনীয়া ক্ৰিকেটৰ অধিনায়ক।^১ তেওঁ আন্তৰ্জাতিক ক্ৰিকেটত আটাইতকৈ বেছি ৰাণ বনোৱা মহিলা ক্ৰিকেট খেলুৱৈ আৰু এদিনীয়া আন্তৰ্জাতিক ক্ৰিকেটত ৬০০০ ৰাণ অতিক্ৰম কৰা একমাত্ৰ মহিলা।^২৩ ইয়াৰ লগতে তেওঁ এদিনীয়া ক্ৰিকেটত একাদিক্ৰমে সাতবাৰ অৰ্ধশতক বনোৱা প্ৰথম মহিলা ক্ৰিকেটাৰ।^৪ এদিনীয়া ক্ৰিকেটত সবাতোকৈ বেছি অৰ্ধশতক ৰাণ বনোৱাৰ ৰেকৰ্ড মিতালী ৰাজৰ আছে।^৫ ২০১৮ চনৰ জুন মাহত মহিলাৰ টুৱেণ্টি২০ এছিয়া কাপ, ২০১৮ত তেওঁ টুৱেণ্টি২০ ক্ৰিকেটত ২০০০ ৰাণ অতিক্ৰম কৰা পুৰুষ আৰু মহিলা উভয় শাখাৰ প্ৰথম ভাৰতীয়ত পৰিণত হয় লগতে টুৱেণ্টি২০ত ২০০০ ৰাণ অতিক্ৰম কৰা বিশ্বৰ প্ৰথম মহিলা হৈ পৰে।^৬৭৮

মিতালী ৰাজ বিশ্বকাপ ক্ৰিকেটত দুবাৰ অধিনায়ক হিচাপে খেলা প্ৰথম গৰাকী ভাৰতীয়। তেওঁ ২০০৫ মহিলাৰ এদিনীয়া ক্ৰিকেট বিশ্বকাপ আৰু ২০১৭ মহিলাৰ এদিনীয়া ক্ৰিকেট বিশ্বকাপত ভাৰতীয় দলৰ অধিনায়ক আছিল।^৯১০ ২০১৯ চনৰ ১ ফেব্ৰুৱাৰী তাৰিখে মিতালী ৰাজে নিউজিলেণ্ডত অনুষ্ঠিত ভাৰত বনাম নিউজিলেণ্ড চিৰিজত খেলি ২০০খন এদিনীয়া আন্তৰ্জাতিক ক্ৰিকেট খেল খেলা প্ৰথম গৰাকী মহিলা হয়।^১১

২০২২ চনৰ ৮ জুন তাৰিখে মিতালী ৰাজে সকলো পৰ্যায়ৰ ক্ৰিকেট খেলৰ পৰা অৱসৰ গ্ৰহণ কৰে৷ ^{১২ ১৩ ১৪}

প্ৰাৰম্ভিক জীৱন

১৯৮২ চনৰ ৩ ডিচেম্বৰ তাৰিখে ৰাজস্থানৰ যোধপুৰত মিতালী ৰাজৰ জন্ম হৈছিল। তেওঁৰ পিতৃ দৰাই ৰাজ আৰু তেওঁৰ মাতৃ লীলা ৰাজ। তেওঁৰ পিতৃ ভাৰতীয় বায়ু সেনাৰ এয়াৰমেন আছিল। তেওঁলোক তামিল ভাষা সম্প্ৰদায়ৰৰ লোক। ১০ বছৰ বয়সৰ পৰায়ে তেওঁ ক্ৰিকেট খেলিবলৈ আৰম্ভ কৰে। ১৭ বছৰ বয়সত তেওঁক ভাৰতীয় মহিলা ক্ৰিকেট দলত বাছনি কৰা হয়। বৰ্তমান তেওঁ তেলংগানাৰ ৰাজধানী হাইদৰাবাদত বাস কৰে।^১৫১৬

তেওঁ ছেকেন্দ্ৰাবাদৰ কেয়েছ হাইস্কুল ফৰ গাৰ্লছত প্ৰাৰম্ভিক শিক্ষা গ্ৰহণ কৰিছিল। তাৰপিছত তেওঁ কৌস্তুৰবা গান্ধী জুনিয়ৰ কলেজত শিক্ষা লাভ কৰে। স্কুলত পঢ়ি থকা সময়তে তেওঁ তেওঁৰ ককায়েকৰ লগত ক্ৰিকেট খেলিছিল। তেওঁ প্ৰায়ে স্কুলত লৰা সকলৰ লগত ক্ৰিকেট খেলিছিল।

ৰেকৰ্ডসমূহ

মিতালী বিশ্বকাপ মহিলা ক্ৰিকেটত সৰ্বোচ্চ ৰাণৰ বৰঙণি আগবঢ়োৱা ভাৰতীয় মহিলা। বিশ্বকাপ মহিলা ক্ৰিকেট ২০০৫ চনত তেওঁ নিউজিলেণ্ডৰ বিৰুদ্ধে ১০৪ ত বলত ৯১ ৰাণ সংগ্ৰহ কৰি আউট নোহোৱাকৈ আছিল।^১৭ ২০১৩ চনৰ বিশ্বকাপ ক্ৰিকেটত তেওঁৰ এই খিতাপ হৰমনপ্ৰীত কৌৰলৈ যায়। তেওঁ ১০৯ বলত ১০৭ ৰাণ সংগ্ৰহ কৰিছিল ২০১৭ মহিলাৰ বিশ্বকাপ ক্ৰিকেটত তেওঁ একাদিক্ৰমে সাতটা অৰ্ধশতক কৰে আৰু একাদিক্ৰমে আটাইতকৈ বেছি সংখ্যক অৰ্ধশতক ৰাণ সংগ্ৰহ কৰা খেলুৱৈত পৰিগণিত হয়।^১৮১৯ বিশ্বকাপত ১০০০ ৰাণ সংগ্ৰহ কৰা তেওঁ একমাত্ৰ ভাৰতীয় তথা বিশ্বৰ পঞ্চম গৰাকী খেলুৱৈ।^২০ মহিলাৰ এদিনীয়া আন্তৰ্জাতিক ক্ৰিকেটত কোনো দলৰ পৰা একাদিক্ৰমে ১০৯খন খেল খেলাৰ সুযোগ লাভ কৰা তেওঁ একমাত্ৰ খেলুৱৈ।^২১

বঁটা আৰু সন্মান