নোৰা ফটেহী

নোৰা ফটেহী ( Nora Fatehi) (জন্ম: ৬ ফেব্ৰুৱাৰী ১৯৯২) ভাৰতত বাস কৰা এগৰাকী কানাডিয়ান নৃত্যশিল্পী আৰু অভিনেত্ৰী। তেওঁ হিন্দী, তেলেগু আৰু মালয়ালম ছবিত অভিনয় কৰিছে। ফটেহীয়ে হিন্দী ছবি ৰ'ৰ: টাইগাৰছ অৱ দ্য সুন্দৰবনছৰ যোগেদি ছবি অভিনয়ত আত্মপ্ৰকাশ কৰে।^১২

টেম্পাৰ, বাহুবলী:দ্য বিগিনিং আৰু কিক-২ আদি ছবিত আইটেম গীতৰ বাবে তেলেগু ছবিত জনপ্ৰিয়তা লাভ কৰা ফটেহীয়ে মালয়ালম ছবি ডাবল বেৰেল আৰু কয়ামকুলাম কোচুন্নীতো অভিনয় কৰিছে। ২০১৫ চনত ফটেহীয়ে ৰিয়েলিটি টেলিভিছন শ্ব’ বিগ বছ ৯ত প্ৰতিযোগী হিচাপে অংশগ্ৰহণ কৰিছিল। ২০১৬ চনত ৰিয়েলিটি টেলিভিছন ডান্স শ্ব’ ঝলক দিখলা জাত অংশগ্ৰহণ কৰে। তেওঁ বলীউডৰ ছবি সত্যমেৱ জয়তেত অভিনয় কৰিছিল য'ত তেওঁক "দিলবৰ" গীতটোৰ পুনৰনিৰ্মিত সংস্কৰণত অভিনয় কৰোৱা হৈছিল^৩ আৰু মুক্তিৰ প্ৰথম ২৪ ঘণ্টাত ইউটিউবত ই ২ কোটি দৰ্শন অতিক্ৰম কৰি ভাৰতত এনে সংখ্যা লাভ কৰা প্ৰথম হিন্দী গীত হিচাপে পৰিগণিত হৈছিল। ইয়াৰ উপৰিও তেওঁ মৰক্কোৰ হিপ-হপ গ্ৰুপ Fnaïreৰ সৈতে সহযোগিতা কৰি দিলবৰ শীৰ্ষক গীতৰ আৰবী সংস্কৰণ মুকলি কৰে।^৪৫

২০১৯ চনত তাঞ্জানিয়াৰ সংগীতজ্ঞ তথা গীতিকাৰ ৰেভানিৰ সহযোগত প্ৰথমটো আন্তঃৰাষ্ট্ৰীয় ইংৰাজী গীত পেপেটা মুকলি কৰে। ২০২২ চনৰ অক্টোবৰ মাহত তেওঁ ২০২২ চনৰ কাটাৰত অনুষ্ঠিত হোৱা ফিফা বিশ্বকাপৰ গীত লাইট দ্য স্কাইত শিল্পী ৰেডৱান, মানাল, বালকিছ আৰু ৰেহমা ৰিয়াদৰ সৈতে একেলগে অভিনয় কৰিবলৈ নিৰ্বাচিত হয়।^৬ ইয়াৰ পিছত ফাটেহীয়ে হিন্দী ছবি ষ্ট্ৰীট ডান্সাৰ থ্ৰীডি (২০২০) আৰু ভুজ: দ্য প্ৰাইড অৱ ইণ্ডিয়া (২০২১)ৰ সহযোগী চৰিত্ৰত অভিনয় কৰে। ইয়াৰ উপৰিও টেলিভিছন শ্ব’ ডান্স দীৱানা জুনিয়ৰ আৰু ঝলক দিখলা জা-১০ৰ বিচাৰক হিচাপে কাম কৰিছে।

প্ৰাৰম্ভিক জীৱন

কানাডাত জন্মগ্ৰহণ কৰি ডাঙৰ-দীঘল হোৱা ফটেহীৰ পিতৃ-মাতৃ মৰক্কোৰ। তেওঁ টৰণ্টোৰ ৱেষ্টভিউ চেণ্টেনিয়েল ছেকেণ্ডাৰী স্কুলৰ পৰা স্নাতক ডিগ্ৰী লাভ কৰে। তেওঁ ইয়ৰ্ক বিশ্ববিদ্যালয়ত ৰাজনীতি বিজ্ঞান আৰু আন্তঃৰাষ্ট্ৰীয় সম্পৰ্ক বিষয়ত অধ্যয়ন কৰে।^৭ তেওঁ সাক্ষাৎকাৰত উল্লেখ কৰিছে যে তেওঁ নিজকে "মনে-প্ৰাণে ভাৰতীয়" বুলি গণ্য কৰে।^৮

কৰ্মজীৱন

হিন্দী ছবি ৰ’ৰ: টাইগাৰছ অৱ দ্য সুন্দৰবনছত প্ৰথমবাৰৰ বাবে অভিনয় কৰি ফটেহীয়ে নিজৰ কেৰিয়াৰ আৰম্ভ কৰিছিল। তাৰ পিছত তেওঁ পুৰী জগন্নাধৰ ছবি টেম্পাৰত আইটেম ছং "ইট্টাগে ৰেছিপোধাম"ৰে তেলেগু ছবিৰ কামত যোগদান কৰে।^৯ বিক্ৰম ভাটৰ পৰিচালিত আৰু মহেশ ভাটৰ প্ৰযোজনা মিষ্টাৰ এক্স ছবিখনত ইমৰাণ হাছমী আৰু গুৰমীত চৌধুৰীৰ সৈতেও বিশেষ অভিনয় কৰিছিল। ফটেহীয়ে বাহুবলী: দ্য বিগিনিঙৰ আইটেম ছং "মনোহাৰী"^১০ আৰু কিক-২ৰ গীত "কুক্কুৰুকুৰু" আদি ছবিৰ আইটেম ছঙত অভিনয় কৰে।^১১

২০১৫ চনৰ জুন মাহৰ শেষৰ ফালে তেওঁ শ্বেৰ নামে এখন তেলেগু ছবিত স্বাক্ষৰ কৰে। ২০১৫ চনৰ আগষ্টৰ শেষৰ ফালে তেওঁ আন এখন তেলেগু ছবি লোফাৰত স্বাক্ষৰ কৰে যিখন ছবিৰ পৰিচালক হৈছে পুৰী জগন্নাধে। বৰুণ তেজ নামৰ অভিনেতাৰ বিপৰীতে তেওঁ অভিনয় কৰিছে। ২০১৫ চনৰ নৱেম্বৰৰ শেষৰ ফালে Oopiri নামৰ আন এখন ছবিতো স্বাক্ষৰ কৰে।^১২ ২০১৫ চনৰ ডিচেম্বৰ মাহত ফটেহীয়ে বিগ বছ-ছিজন ৯ত ৱাইল্ড কাৰ্ড প্ৰৱেশকাৰী হিচাপে বিগ বছৰ ঘৰত প্ৰৱেশ কৰে।^১৩ ২০১৬ চনত ঝলক দিখলা জা নামৰ ৰিয়েলিটি টেলিভিছন শ্ব'তো অংশগ্ৰহণ কৰিছিল।

২০১৯ চনৰ ফেব্ৰুৱাৰী মাহত তেওঁ ৰেকৰ্ড লেবেল “টি-ছিৰিজ’’ৰ সৈতে একচেটিয়া শিল্পী হিচাপে চুক্তিবদ্ধ হয়, তেওঁলোকৰ আগন্তুক ছবি, মিউজিক ভিডিঅ', ৱেব ছিৰিজ, আৰু ৱেব ছবিত অভিনয় কৰাৰ বাবে। তাৰ পিছত তেওঁ ২০২০ চনৰ ডান্স ছবি ষ্ট্ৰীট ডান্সাৰ থ্ৰীডিত অভিনয় কৰে যিখনত তেওঁৰ সহযোগী চৰিত্ৰত অভিনয় কৰা প্ৰথম ছবি হিচাপে ধৰা হয়।^১৪ ২০২১ চনৰ ৬ মাৰ্চত ফটেহীয়ে প্ৰথমগৰাকী আফ্ৰিকান-আৰব মহিলা শিল্পী হিচাপে পৰিচিত হয়, যাৰ "দিলবৰ" শীৰ্ষক গীতটোৰ ইউটিউবত এক বিলিয়ন দৰ্শন অতিক্ৰম কৰে।^১৫ ইয়াৰ উপৰিও জেক নাইটৰ সহযোগত "ডাৰ্টি লিটল ছিক্ৰেট" গীতটোৰ জৰিয়তে তেওঁ আন্তঃৰাষ্ট্ৰীয় একক গীতত আত্মপ্ৰকাশ কৰে যিটো পৰৱৰ্তী সময়ত তেওঁ ২২ সংখ্যক আই-আই-এফ-এ বঁটা অনুষ্ঠানত পৰিবেশন কৰে।^{১৬১৭১৮}

২০২২ চনত ফটেহীয়ে য়োহানীয়ে গোৱা থেংক গড ছবিখনৰ বাবে "মাণিকে" গীতটোত অংশ লৈছিল, যিটো ছবিখন মূল শ্ৰীলংকাৰ গীত "মাণিকে মাংগে হিথে"ৰ ৰিমিক্স আছিল।^১৯২০ এন একচন হিৰো ছবিৰ "জেহদা নাছা" গীততো আয়ুষ্মান খুৰানাৰ সৈতে অভিনয় কৰিছিল।^২১২২ সেই বছৰতে তেওঁ ২০২২ ফিফা বিশ্বকাপৰ সামৰণি অনুষ্ঠানত অংশগ্ৰহণ কৰিছিল।^২৩২৪

সংবাদ মাধ্যমত

ফিল্মফেয়াৰৰ বেদাংশী পাঠকে কৈছিল, "এটা গীতৰ পিছত এটাকৈ ফটেহীয়ে প্ৰমাণ কৰিলে যে উদ্যোগটোত এনে কোনো ব্যক্তি নাই যিয়ে ইমান দৃঢ়তাৰে নৃত্য কৰিব পাৰে আৰু নৃত্য কৰাৰ সময়ত আকৰ্ষণীয় দেখাব পাৰে।" ^২৫ তেওঁ ডাবৰ আৰু কেকজোনৰ দৰে ব্ৰেণ্ডৰ এণ্ডাৰছাৰ (প্ৰচাৰক)।^২৬২৭ ২০২৩ চনত, ফটেহী আইফা বঁটা প্ৰদান অনুষ্ঠানত দ্বিতীয়বাৰৰ বাবে প্ৰদৰ্শন কৰা একমাত্ৰ অভিনেত্ৰী হিচাপে পৰিগণিত হয়।^২৮ ২০২৩ চনৰ মাৰ্চ মাহত ফটেহীয়ে অক্ষয় কুমাৰ, দিশা পাটানী, মৌনী ৰায়, সোণম বাজৱা, অপাৰশক্তি খুৰানা, ষ্টেবিন বেন আৰু জাৰা এছ. খানৰ দৰে শিল্পীসকলৰ লগত আমেৰিকাৰ বিভিন্ন চহৰত "দ্য এণ্টাৰটেইনাৰ্ছ" ট্যুৰৰ বাবে অনুষ্ঠান পৰিৱেশন কৰিছিল।^২৯

চলচ্চিত্ৰপুঞ্জী

চলচ্চিত্ৰ

দূৰদৰ্শন

ৱেব ধাৰাবাহিক

সংগীত ভিডিঅʼ

সংগীতপঞ্জী

বঁটা