মৌনী ৰায়

মৌনী ৰায় (ইংৰাজী ভাষা: Mouni Roy; জন্ম: ২৮ ছেপ্টেম্বৰ ১৯৮৫) — এগৰাকী ভাৰতীয় অভিনেত্ৰী যিয়ে মূলতঃ হিন্দী ভাষা টেলিভিছন আৰু চলচ্চিত্ৰত কাম কৰে। ভাৰতৰ সৰ্বাধিক পাৰিশ্ৰমিক পোৱা টেলিভিছন অভিনেত্ৰীসকলৰ ভিতৰত অন্যতম ৰায় নাগিন (২০১৫–২০১৬) আৰু ইয়াৰ পৰৱৰ্তী ধাৰাবাহিক নাগিন ২ (২০১৬–২০১৭)ত এজনী ইচ্ছাৰূপী নাগিনীৰ চৰিত্ৰত কৰা অভিনয়ৰ বাবে ব্যাপকভাৱে পৰিচিত।^১২ তেওঁ এটা আইফা বঁটা আৰু দুটা ইণ্ডিয়ান টেলিভিছন একাডেমী বঁটাৰ লগতে দুটা ফিল্মফেয়াৰ বঁটাৰ মনোনয়ন লাভ কৰিছে।

ৰায়ে ২০০৬ চনত টেলিভিছন শ্ব’ কিউকি চাশ্ব ভী কভী বহু থীৰ জৰিয়তে অভিনয় জীৱন আৰম্ভ কৰিছিল।^৩ ইয়াৰ পিছত তেওঁ দেৱোঁ কে দেৱ... মহাদেৱত সতী আৰু জুনুন – ঐচী নফৰত তো কৈচা ইষ্কত মীৰাৰ চৰিত্ৰত অভিনয় কৰিছিল। ৰায়ে হিৰো হিটলাৰ ইন লাভ (২০১১)ৰ জৰিয়তে চলচ্চিত্ৰত আত্মপ্ৰকাশ কৰে। তেওঁ গোল্ড (২০১৮) ছবিৰ জৰিয়তে বলিউডত খোজ পেলায় আৰু ইয়াৰ বাবে ফিল্মফেয়াৰ শ্ৰেষ্ঠ নৱাগতা অভিনেত্ৰীৰ মনোনয়ন লাভ কৰে। ২০২২ চনত ৰায়ে ফেণ্টাচী ছবি ব্ৰহ্মাস্ত্ৰ: পাৰ্ট ৱান – শিৱৰ বাবে প্ৰশংসা লাভ কৰে, যাৰ বাবে তেওঁ আইফা শ্ৰেষ্ঠ সহ-অভিনেত্ৰীৰ বঁটা আৰু ফিল্মফেয়াৰ শ্ৰেষ্ঠ সহ-অভিনেত্ৰীৰ মনোনয়ন লাভ কৰিবলৈ সক্ষম হয়।^৪

প্ৰাৰম্ভিক জীৱন আৰু শিক্ষা

১৯৮৫ চনৰ ২৮ ছেপ্টেম্বৰত পশ্চিম বংগৰ কোচবিহাৰত এটা বঙালী ভাষী ৰাজবংশী পৰিয়ালত ৰায়ৰ জন্ম হৈছিল।^{৫৬৭৮৯১০} তেওঁৰ ককাক শেখৰ চন্দ্ৰ ৰায় এগৰাকী প্ৰখ্যাত যাত্ৰা শিল্পী আছিল।^১১ তেওঁৰ মাতৃ মুক্তি আছিল এগৰাকী থিয়েটাৰ শিল্পী আৰু পিতৃ অনিল ৰায় কোচবিহাৰ জিলা পৰিষদৰ এজন অফিচ ছুপাৰিণ্টেডেণ্ট আছিল।^৫ তেওঁ বাবুৰহাটৰ কেন্দ্ৰীয় বিদ্যালয়ত দ্বাদশ শ্ৰেণীলৈকে পঢ়া-শুনা কৰিছিল আৰু তাৰ পিছত দিল্লীলৈ গৈছিল।^৫১২

তেওঁ মিাণ্ডা হাউচৰপৰা স্নাতক ডিগ্ৰী সম্পূৰ্ণ কৰে আৰু পিতৃ-মাতৃৰ জেদত জামিয়া মিলিয়া ইছলামিয়াত গণসংযোগ (mass communication) অধ্যয়ন কৰিছিল। কিন্তু আধাতে পাঠ্যক্ৰম এৰি দি তেওঁ হিন্দী চলচ্চিত্ৰ জগতত ভাগ্য পৰীক্ষা কৰিবলৈ মুম্বাইলৈ গুচি যায়।^১৩ তেওঁ পাৰ্ট ১ পৰীক্ষা দি উঠিছিল আৰু তাৰ পিছত পুনৰ দিল্লীলৈ উভতি যোৱা নাছিল। মৌনী সৰুৰেপৰাই অভিনয়ৰ প্ৰতি আগ্ৰহী আছিল আৰু অভিনেত্ৰী মধুবালা, মাধুৰী দীক্ষিত আৰু ৱাহিদা ৰহমানক নিজৰ অভিনয়ৰ আদৰ্শ বুলি গণ্য কৰে।^১৪১৫

ব্যক্তিগত জীৱন

সংযুক্ত আৰৱ এমিৰেটছলৈ (UAE) সঘনাই কৰা ভ্ৰমণৰ বাবে মৌনী ৰায়ক দেশখনৰ গল্ডেন ভিছা প্ৰদান কৰা হৈছে।^১৬ তিনিবছৰীয়া প্ৰেমৰ সম্পৰ্কৰ অন্তত ২০২২ চনৰ ২৭ জানুৱাৰীত তেওঁ ডুবাইত কৰ্মৰত মালয়ালী ব্যৱসায়ী সুৰজ নাম্বিয়াৰৰ সৈতে বিবাহপাশত আবদ্ধ হয়। গোৱাৰ পানাজীত বঙালী আৰু মালয়ালী—উভয় পৰম্পৰাগত ৰীতি-নীতিৰে তেওঁলোকৰ বিবাহ সম্পন্ন হৈছিল।^১৭১৮

অন্যান্য কাম আৰু মাধ্যমৰ ছবি

ৰায়ে ভাৰতৰ অন্যতম প্ৰতিষ্ঠিত টেলিভিছন অভিনেত্ৰী হিচাপে নিজকে প্ৰতিষ্ঠা কৰিছে।^১৯২০ টাইমছ অৱ ইণ্ডিয়াই নাগিন ধাৰাবাহিকখনক ৰায়ৰ কেৰিয়াৰৰ বাবে এক টাৰ্ণিং পইণ্ট বা "গেম-চেঞ্জাৰ" বুলি অভিহিত কৰিছে।^২১ ব্ৰহ্মাস্ত্ৰ: পাৰ্ট ৱান – শিৱ মুক্তি পোৱাৰ পিছত ফিল্মফেয়াৰৰ ময়ূখ মজুমদাৰে তেওঁক "ছবিখনৰ নিৰ্বিবাদ তাৰকা" বুলি আখ্যা দিছিল।^২২ ফাইনেন্সিয়েল এক্সপ্ৰেছ-এ উল্লেখ কৰিছিল যে ৰায়ে অভিনয় কৰা 'জুনুন' চৰিত্ৰটো শেহতীয়া সময়ছোৱাত বলিউডে দেখা "শ্ৰেষ্ঠ খলনায়ক" হিচাপে বিবেচিত হ'ব।^২৩ ৰায়ে প্ৰায়ে টাইমছ অৱ ইণ্ডিয়াৰ "৫০ গৰাকী আটাইতকেই কাংক্ষিত মহিলা"ৰ তালিকাত স্থান লাভ কৰি আহিছে। তেওঁ ২০১৭ চনত ৩৫তম, ২০১৮ চনত ৩২তম,^২৪ ২০১৯ চনত ৪১তম আৰু ২০২০ চনত ৪৪তম স্থান লাভ কৰিছিল।^২৫ একেখন প্ৰকাশনৰ ২০১৭ চনৰ "টেলিভিছনৰ ২০ গৰাকী আটাইতকেই কাংক্ষিত মহিলা"ৰ তালিকাত তেওঁ ৩য় স্থান লাভ কৰিছিল।^২৬ ২০১৮ চনত টেলিভিছনৰ "শীৰ্ষ ১০ জনপ্ৰিয় অভিনেত্ৰী"ৰ তালিকাত তেওঁক ৪ৰ্থ স্থান দিয়া হৈছিল।^২৭ ২০২৩ চনত টাইমছ নাওৰ "জনপ্ৰিয় অভিনেত্ৰী"ৰ তালিকাত তেওঁ অষ্টম স্থানত আছিল।^২৮

ৰায় ব্ৰায়ান এণ্ড কেণ্ডি, জয় আৰু স্পাৱেক আদিকে ধৰি বিভিন্ন ব্ৰেণ্ড আৰু সামগ্ৰীৰ এজন বিশিষ্ট চেলিব্ৰিটি এণ্ডোৰ্চাৰ।^{২৯৩০৩১} ২০২৩ চনৰ মাৰ্চ মাহত ৰায়ে অক্ষয় কুমাৰ, দিশা পাটানী, নোৰা ফটেহী, সোণম বাজৱা, অপৰশক্তি খুৰানা আৰু জহৰাহ এছ খানৰ সৈতে আমেৰিকাৰ বিভিন্ন চহৰত "দ্য এণ্টাৰটেইনাৰ্ছ" ভ্ৰমণত অংশগ্ৰহণ কৰিছিল।^৩২৩৩ ৰায়ে কেইবাটাও সামাজিক কাৰ্যৰ সৈতেও জড়িত। ক’ভিড-১৯ সংকটৰ সময়ত তেওঁ আৰ্তজনৰ বাবে আৰ্থিক অনুদান আগবঢ়াইছিল।^৩৪ ২০২০ চনত আমফান ঘূৰ্ণিবতাহৰ পিছত তেওঁ এটা বেচৰকাৰী সংস্থাৰ সৈতে লগ লাগি ভুক্তভোগীসকলৰ বাবে পুঁজি সংগ্ৰহৰ উদ্দেশ্যে নিজৰ চিত্ৰশিল্পসমূহ নিলাম কৰিছিল।^৩৫ ২০২১ চনত মায়াপুৰত চিকিৎসা সুবিধাৰ বাবে তেওঁ ইস্কন ফাউণ্ডেশ্যনলৈ অনুদান আগবঢ়ায়।^৩৬ ৰায় আৰু তেওঁৰ স্বামী সুৰজ নাম্বিয়াৰে ২০২২ চনত "আল্টিমেট গুৰুজ" নামৰ এটা গোলকীয় শিক্ষা মঞ্চ মুকলি কৰে।^৩৭ ২০২৩ চনৰ মে' মাহত ৰায়ে মুম্বাইত "বদমাচ" নামৰ এখন ৰেষ্টুৰেণ্ট মুকলি কৰে।^৩৮

বাহ্যিক সংযোগ

• Mouni Roy at ইণ্টাৰনেট মুভি ডাটাবেছ