তবু

তবচ্চুম ফাতিমা হাচমী (Tabassum Fatima Hashmi; জন্ম: ৪ নৱেম্বৰ ১৯৭১) হৈছে এগৰাকী ভাৰতীয় অভিনেত্ৰী।^১২ তেখেতৰ জনপ্ৰিয় নাম হৈছে তবু। তেলুগু, তামিল, মালয়ালম, বঙালী আৰু মাৰাঠী ভাষাৰ ছবিতো তবুৱে অভিনয় কৰিছে। ভাৰতৰ এগৰাকী প্ৰতিষ্ঠিত আৰু সফল অভিনেত্ৰী হিচাপে খ্যাতি লাভ কৰা তবুক প্ৰায়ে জটিল, সংকটাপন্ন চৰিত্ৰত অৱতীৰ্ণ হোৱা দেখা যায়। তেখেতে আমেৰিকান প্ৰযোজনা গোষ্ঠীৰ লগতো কাম কৰিছে।^৩৪৫ তবুৱে দুবাৰকৈ শ্ৰেষ্ঠ অভিনেত্ৰীৰ ৰাষ্ট্ৰীয় চলচ্চিত্ৰ বঁটা লাভ কৰিছে আৰু ছবাৰকৈ ফিল্মফেয়াৰ বঁটা লাভ কৰিছে। ফিল্মফেয়াৰত তেখেতে সমালোচকৰ পৰা শ্ৰেষ্ঠ অভিনেত্ৰীৰ বঁটা এতিয়ালৈকে চাৰিটা লাভ কৰিছে, যি এক অভিলেখ। ২০১১ চনত তেখেতক ভাৰত চৰকাৰে পদ্মশ্ৰী সন্মানেৰে সন্মানিত কৰে।^৬

১৯৮৫ চনত মুক্তি লাভ কৰা দেৱানন্দৰ "হম নৌজৱান"ত তবুৱে এগৰাকী কিশোৰীৰ ৰূপত পোনপ্ৰথমবাৰৰ বাবে দেখা দিয়ে। অৱশ্যে ১৯৯১ চনত মুক্তিপ্ৰাপ্ত তেলুগু ভাষাৰ ছবি "কুলি নং ১"তহে তেখেতে শীৰ্ষ চৰিত্ৰত অভিনয়ৰ সুযোগ পায়।^৭৮১৯৯৪ চনত তবুৱে হিন্দী একশ্যন-ধৰ্মী ড্ৰামা ছবি "বিজয়পথ"ত অভিনয় কৰি ফিল্মফেয়াৰৰ পৰা শ্ৰেষ্ঠ নৱাগতা অভিনেত্ৰীৰ সন্মান লাভ কৰে।^৯ তাৰ পিছৰ বছৰটো অৰ্থাৎ ১৯৯৬ চনটো তবুৰ বাবে উল্লেখনীয়।^১০ সেইবছৰত তেখেতে গুলজাৰৰ "মাছিছ" ছবিখনত পঞ্জাব বিদ্ৰোহৰ দ্বাৰা প্ৰভাৱিত হোৱা এগৰাকী ডেকা গাভৰুৰ চৰিত্ৰ ৰূপায়ণ কৰে। এইখন ছবিয়ে তেখেতৰ বাবে শ্ৰেষ্ঠ অভিনেত্ৰীৰ ৰাষ্ট্ৰীয় চলচ্চিত্ৰ বঁটা কঢ়িয়াই আনে।^১০১১ ইয়াৰ বাদেও, ১৯৯৬ চনতে নিৰ্মিত তেলুগু ভাষাৰ ছবি নিন্নে পেল্লাদাতাৰ বাবে তবুৱে তেলুগু ভাষাৰ শ্ৰেষ্ঠ অভিনেত্ৰীৰ ফিল্মফেয়াৰ লাভ কৰে। অন্যহাতেদি হিন্দী ভাষাৰ আন এখন ছবি "চাজন চলে চচুৰাল"-এও ব্যৱসায়িক সফলতা অৰ্জন কৰে।^১২১৩ ১৯৯৯ চনত তবুৱে বলিউডৰ উপাৰ্জনকাৰী কমেডী ছবি 'বিৱি নাম্বাৰ ওৱান' আৰু পাৰিবাৰিক ছবি 'হম চাথ চাথ হে'তো তবুৱে গুৰুত্বপূৰ্ণ চৰিত্ৰ ৰূপায়ণ কৰে।^১৪ ১৯৯৭ চনত মুক্তিপ্ৰাপ্ত ছবি "ৱিৰাচট", "হু টু টু", "অস্তিত্ব" (২০০০) আৰু "চান্দনী বাড়" (২০০১) হৈছে তবুৱে অভিনয় কৰা শক্তিশালী ছবি। প্ৰথম তিনিখনৰ জৰিয়তে তবুৱে লাভ কৰে ফিল্মফেয়াৰৰ সমালোচকৰ বঁটা আৰু শেষৰখন ছবিৰ বাবে তেখেতে লাভ কৰে দ্বিতীয়টো ৰাষ্ট্ৰীয় চলচ্চিত্ৰ বঁটা।

প্ৰাৰম্ভিক জীৱন আৰু পৰিয়াল

তবচ্চুম ফাতিমা হাচমী ওৰফে তবুৱে জন্ম লাভ কৰিছিল এটা হায়দৰাবাদী মুছলমান পৰিয়ালত।^১১৫ তেখেতৰ অভিভাৱকৰ মাজত সোনকালেই বিবাহ বিচ্ছেদ হয়।^১৬ তেখেতৰ মাতৃ আছিল এগৰাকী বিদ্যালয়ৰ শিক্ষক আৰু আইতাক-ককাক (মাকৰ মাক-দেউতাক) আছিল স্কুলৰ অৱসৰী অধ্যাপক। ১৯৮৩ চনত তবু মুম্বাইলৈ আহে আৰু দুবছৰৰ বাবে মুম্বাইৰ ছেইণ্ট জেভিয়াৰ্ছ কলেজত অধ্যাপনা কৰে।^১৭১৮

তবু হৈছে যশস্বী অভিনেত্ৰী শাবানা আজমী, টনভি আজমী আৰু বাবা আজমীৰ ভতিজী। অভিনেত্ৰী ফাৰাহ নাজ হৈছে তেখেতৰ জ্যেষ্ঠ ভগ্নী। তবুৱে তেলুগু, হিন্দী, ইংৰাজী, বঙালী, মাৰাঠী, তামিল, মালয়ালম, স্পেনিছ আৰু কিছু পৰিমাণে ফৰাচী ভাষা ক'ব পাৰে।^১৯