ৰেৱতী চেত্ৰী

ৰেৱতী চেত্ৰী (Rewati Chetri; জন্ম: ৪ জুলাই, ১৯৯৩) এগৰাকী ভাৰতীয় মডেল তথা সৌন্দৰ্য প্ৰতিযোগিতাৰ বিজয়ী। তেওঁ ২০১৫ চনৰ ফেমিনা মিছ ইণ্ডিয়া প্ৰতিযোগিতাৰ চূড়ান্ত প্ৰতিযোগীসমূহৰ ভিতৰৰ এগৰাকী আছিল।^১ ৰেৱতীয়ে ২০১৬ চনৰ চীনৰ বেইজিংত অনুষ্ঠিত হোৱা 'ৱৰ্ল্ড মিছ উনিভাৰ্ছিটি' প্ৰতিযোগিতাত 'মিছ এছিয়া'ৰ খিতাপ দখল কৰে।^২ একে বছৰে তেওঁ 'ছেন'ৰিতা ইণ্ডিয়া প্ৰতিযোগিতা'ত 'মিছ ইণ্ডিয়া ইণ্টাৰনেচনেল' খিতাপ জয় কৰে। তেওঁ ২০১৬ চনত জাপানৰ টকিঅ'ত অনুষ্ঠিত হবলগীয়া 'মিছ ইণ্টাৰনেচনেল ২০১৬' প্ৰতিযোগিতাত ভাৰতক প্ৰতিনিধিত্ব কৰিব।^৩৪

প্ৰাৰম্ভিক জীৱন

ৰেৱতীৰ পিতৃ মাতৃ ক্ৰমে বাবুৰাম চেত্ৰী আৰু বীণা চেত্ৰী। অসমৰ ডিমা হাছাও জিলাৰ হাফলংত তেওঁৰ জন্ম হৈছিল।^৫ তেওঁ প্ৰথমে চেইণ্ট এগ্নেছ কনভেণ্ট স্কুলত পঢ়া-শুনা কৰিছিল। তাৰপিছত তেওঁ লামডিং মহাবিদ্যালয়ৰ পৰা স্নাতক ডিগ্ৰী লাভ কৰে। ৰেৱতী বৰ্তমান গুৱাহাটীৰ এনইএফ আইন মহাবিদ্যালয়ৰ আইন বিভাগৰ ছাত্ৰী।^৬৭৮

অভিনয় জীৱন

ড্ৰীম হাউচ প্ৰডাক্টচনে প্ৰযোজনা কৰা 'তুমি মোৰ' এলবামৰ জৰিয়তে ৰেৱতীয়ে অভিনয় জীৱনৰ পাতনি মেলে। ইয়াৰ সংগীত সুৰকাৰ আছিল "বুলবুল আৰু ৰোষ্টি"ৰ আৰু নিৰ্দেশক আছিল দীপক দে।^৯১০

সৌন্দৰ্য প্ৰতিযোগিতা

মিছ ইণ্টাৰনেচনেল ২০১৬

তেওঁ জাপানৰ টকিঅ'ত অনুষ্ঠিত হবলগীয়া ৫৬তম মিছ ইণ্টাৰনেচনেল প্ৰতিযোগিতাত ভাৰতক প্ৰতিনিধিত্ব কৰিব। এই প্ৰতিযোগিতাৰ শেষত এডিমাৰ মাৰ্টিনেজে পৰৱৰ্তী বিজয়ীৰ শিৰত মুকুট পিন্ধাব।^১১১২

ছেন'ৰিতা ইণ্ডিয়া ২০১৬

ৰেৱতীয়ে ২০১৬ চনত প্ৰথম বাৰৰ বাবে অনুষ্ঠিত হোৱা ছেন'ৰিতা ইণ্ডিয়া প্ৰতিযোগিতাত মিছ ইণ্ডিয়া ইণ্টাৰনেচনেলৰ খিতাপ জয় কৰে। তেওঁ মিছ ইণ্টাৰনেচনেল ২০১৬ ত ভাৰতক প্ৰতিনিধিত্ব কৰিব।^১৩

ৱৰ্ল্ড মিছ উনিভাৰ্ছিটি ২০১৬

২০১৬ চনৰ চীনৰ বেইজিংত অনুষ্ঠিত ৱৰ্ল্ড মিছ উনিভাৰ্ছিটি প্ৰতিযোগিতাত তেওঁ মিছ এছিয়াৰ খিতাপ দখল কৰে।^১৪

ফেমিনা মিছ ইণ্ডিয়া ২০১৫

ৰেৱতী ২০১৫ চনৰ ফেমিনা মিছ ইণ্ডিয়া প্ৰতিযোগিতাত শীৰ্ষ দহ গৰাকী প্ৰতিযোগীৰ ভিতৰত এগৰাকী আছিল। তাত তেওঁ মিছ পপুলাৰ আৰু মিছ মাল্টিমিডিয়া খিতাপ জয় কৰিছিল।^১৫

ফেমিনা মিছ ইণ্ডিয়া কলকাতা ২০১৫

ৰেৱতী ফেমিনা মিছ ইণ্ডিয়া কলকাতা ২০১৫ ৰ শীৰ্ষ পাঁচ গৰাকী প্ৰতিযোগীৰ ভিতৰত আছিল। উল্লেখযোগ্য যে পূব ভাৰতৰ কলকাতাত অনুষ্ঠিত আঞ্চলিক ফেমিনা মিছ ইণ্ডিয়া প্ৰতিযোগিতাৰ পৰা মূল ফেমিনা মিছ ইণ্ডিয়া প্ৰতিযোগিতাৰ শীৰ্ষ ২১ গৰাকী প্ৰতিযোগী নিৰ্বাচন কৰা হয়।^১৬