বাৰেকুৰি

বাৰেকুৰি অসমৰ তিনিচুকীয়া জিলাৰ এখন গাঁও। ই তিনিচুকীয়া চহৰৰপৰা প্ৰায় ১৯ কিলোমিটাৰ দূৰত অৱস্থিত। বাৰেকুৰি কেইবাখনো সৰু সৰু গাঁও একেলগ হৈ গঠিত এক বৃহৎ গ্ৰাম্য বসতি।^১

বাৰেকুৰি বিশেষকৈ হলৌ বান্দৰৰ সৈতে স্থানীয় লোকসকলৰ দীৰ্ঘদিনীয়া সহাৱস্থানৰ বাবে পৰিচিত। গাঁওখনৰ মৰাণ সম্প্ৰদায়ৰ লোকসকলে পৰম্পৰাগতভাৱে ইয়াক গাঁওখনৰ সামাজিক পৰিৱেশৰ অংশ হিচাপে গণ্য কৰি আহিছে।^২

বাৰেকুৰিক হলৌ বান্দৰৰ সৈতে মানুহৰ শান্তিপূৰ্ণ সহাৱস্থানৰ বাবে বিশেষ পৰ্যটনস্থলী হিচাপে পৰিগণিত হৈছে।^৩

নামৰ উৎপত্তি

বাৰেকুৰি নামটোৰ অৰ্থ বাৰগুণ বিশ বুলি ব্যাখ্যা কৰা হয়। কেইবাখনো সৰু সৰু গাঁও একেলগ হৈ এটা বৃহৎ বসতি গঠন কৰাৰ পৰিপ্ৰেক্ষিতত এই নামৰ উৎপত্তি হোৱা বুলি উল্লেখ কৰা হৈছে।^৪

ভূগোল

বাৰেকুৰি উজনি অসমৰ তিনিচুকীয়া জিলাত অৱস্থিত। গাঁওখনৰ চাৰিওফালে কৃষিভূমি, গছ-গছনি, বাৰী আৰু সৰু সৰু বনাঞ্চল আছে।

বাৰেকুৰি ডিব্ৰু-ছৈখোৱা ৰাষ্ট্ৰীয় উদ্যান আৰু ইয়াৰ আশে-পাশে থকা জলাভূমি আৰু বনাঞ্চলসমূহৰ পৰিৱেশগত পৰিসৰৰ সৈতে সংযুক্ত। ওচৰতে মাগুৰী মতাপুং বিল অৱস্থিত, যি পৰিভ্ৰমী আৰু স্থানীয় চৰাইৰ বাবে গুৰুত্বপূৰ্ণ জলাহভূমি।^৫

প্ৰাকৃতিক পৰিৱেশ

বাৰেকুৰিৰ গৃহস্থলীৰ চৌহদ, বাঁহনি, ফল-মূলৰ গছ আৰু অন্যান্য গছ-গছনি হলৌ বান্দৰৰ বাবে গুৰুত্বপূৰ্ণ বাসস্থান হিচাপে কাম কৰে। এক পৰিৱেশগত অধ্যয়নত বাৰেকুৰি গাঁৱৰ গৃহস্থলীৰ বাগিছাত বিভিন্ন প্ৰজাতিৰ গছ আৰু চৰাইৰ উপস্থিতি নথিভুক্ত কৰা হৈছিল।^৬

উক্ত অধ্যয়নত বাৰেকুৰিৰ বাৰীত কদম, আম, জামু, শিলিখা, চেগুনজাতীয় আৰু অন্যান্য গছৰ উপস্থিতিৰ লগতে কেইবাটাও চৰাইৰ প্ৰজাতি দেখা পোৱাৰ কথা উল্লেখ কৰা হৈছে।^৭

হলৌ বান্দৰ

বাৰেকুৰিৰ আটাইতকৈ উল্লেখযোগ্য বৈশিষ্ট্য হৈছে গাঁওখনত মানুহ আৰু হলৌ বান্দৰৰ মাজত গঢ়ি উঠা সহাৱস্থান। হলৌ বান্দৰ ভাৰতত পোৱা একমাত্ৰ বান্দৰজাতীয় বনমানুহ।^৮ অসম পৰ্যটন বিভাগৰ মতে, বাৰেকুৰিত প্ৰায় এশ বছৰৰো অধিক সময় ধৰি হলৌ বান্দৰ আৰু মানুহৰ সহাৱস্থানৰ পৰম্পৰা চলি আহিছে।^৯

গাঁওবাসীয়ে গিবনৰ প্ৰতি বিশেষ সন্মান প্ৰদৰ্শন কৰে। প্ৰধানমন্ত্ৰী নৰেন্দ্ৰ মোদীয়ে ২০২৪ চনৰ ২৫ আগষ্টত তেওঁৰ মাহেকীয়া ৰেডিঅ' অনুষ্ঠান মন কি বাতৰ ১১৩তম খণ্ডত বাৰেকুৰিৰ মানুহ আৰু হলৌ বান্দৰৰ এই সম্পৰ্কৰ কথা উল্লেখ কৰে।^১০

মানুহ আৰু গিবনৰ সহাৱস্থান

বাৰেকুৰিৰ মৰাণ সম্প্ৰদায়ৰ লোকসকলে হলৌ বান্দৰক কেৱল বন্যপ্ৰাণী হিচাপে নহয়, গাঁওখনৰ সামাজিক পৰিৱেশৰ এক অংশ হিচাপে গণ্য কৰে। গিবনৰ জন্ম বা মৃত্যুৰ সৈতে জড়িত কিছুমান পৰম্পৰাগত আচাৰ-অনুষ্ঠানো স্থানীয়ভাৱে পালন কৰা হয়।^১১

গিবনে কল ভাল পোৱাৰ কথা উপলব্ধি কৰাৰ পাছত গাঁওবাসীয়ে নিজৰ খেতিপথাৰত কলগছ ৰোপণ কৰিবলৈ আৰম্ভ কৰে। ইয়াৰ ফলত গিবনৰ বাবে গাঁওখনৰ ভিতৰতে খাদ্যৰ উৎস সৃষ্টি কৰাৰ লগতে মানুহ আৰু গিবনৰ মাজৰ সহাৱস্থান অধিক শক্তিশালী হয়।^১২

গাঁওবাসীয়ে গিবনসমূহক নামো দিয়ে। এই সামাজিক স্বীকৃতিয়ে গাঁওখনত গিবন সংৰক্ষণৰ প্ৰতি স্থানীয় লোকসকলৰ দায়বদ্ধতা প্ৰতিফলিত কৰে।

সংৰক্ষণ

বাৰেকুৰিত হলৌ বান্দৰ সংৰক্ষণত স্থানীয় সম্প্ৰদায়ৰ ভূমিকা গুৰুত্বপূৰ্ণ। গাঁওখনৰ গছ-গছনি আৰুবাৰী গিবনৰ চলাচল আৰু খাদ্যৰ বাবে গুৰুত্বপূৰ্ণ।

গাঁওখনৰ মাজেৰে যোৱা বৈদ্যুতিক তাঁৰ গিবনৰ বাবে এটা বিপদ হিচাপে পৰিগণিত হৈছিল। কেইবাটাও গিবন বৈদ্যুতিক তাঁৰৰ সংস্পৰ্শলৈ আহি মৃত্যুমুখত পৰাৰ পাছত গাঁওবাসীয়ে বিষয়টো চৰকাৰৰ দৃষ্টিগোচৰ কৰে। পৰৱৰ্তী সময়ত বৈদ্যুতিক তাঁৰ অধিক সুৰক্ষিত কৰাৰ ব্যৱস্থা গ্ৰহণ কৰা হয়।^১৩

২০২৫ চনৰ বিশ্ব পৰিৱেশ দিৱসত তিনিচুকীয়া জিলা প্ৰশাসনে বাৰেকুৰিৰ গিবন সংৰক্ষণৰ বাবে দুটা গুৰুত্বপূৰ্ণ পদক্ষেপ গ্ৰহণ কৰে। ইয়াৰে এটা আছিল বাৰেকুৰিক ভেঁৰজান-বৰাজান-পদুমনি অভয়াৰণ্যৰ সৈতে সংযোগ কৰা এটা সেউজ কৰিডৰ গঢ়ি তোলা আৰু আনটো আছিল স্থানীয় লোকসকলৰ মাজত ৫,০০০টা ফলধাৰী গছৰ পুলি বিতৰণ কৰা।^১৪

সেউজ কৰিডৰৰ উদ্দেশ্য হৈছে গিবনৰ বাবে গছৰ ছাঁনিৰ মাজেৰে নিৰাপদে চলাচল কৰিব পৰা এক সংযুক্ত বাসস্থান সৃষ্টি কৰা। ফলধাৰী গছ ৰোপণে গিবনৰ স্বাভাৱিক খাদ্যৰ উৎস বৃদ্ধি কৰাৰ লগতে বাহিৰৰপৰা খাদ্য যোগানৰ ওপৰত নিৰ্ভৰশীলতা হ্ৰাস কৰাৰ লক্ষ্য ৰাখে।^১৫

অসম গৌৰৱ বঁটা

হলৌ বান্দৰ সংৰক্ষণ আৰু জৈৱ-বৈচিত্ৰ্য ৰক্ষাৰ ক্ষেত্ৰত বাৰেকুৰিৰ স্থানীয় সম্প্ৰদায়ৰ ভূমিকা স্বীকৃতি লাভ কৰিছে। ২০২৫ চনত বাৰেকুৰি ইক' ডেভেলপমেণ্ট ছ'চাইটিক পৰিৱেশ সংৰক্ষণৰ ক্ষেত্ৰত অৱদানৰ বাবে অসম গৌৰৱ বঁটাৰে সন্মানিত কৰা হয়।^১৬ এই স্বীকৃতিয়ে বাৰেকুৰিৰ স্থানীয় লোকসকলৰ নেতৃত্বত চলা বন্যপ্ৰাণী সংৰক্ষণ কাৰ্যক ৰাজ্যিক পৰ্যায়ত বিশেষ মৰ্যাদা প্ৰদান কৰে।

পৰ্যটন

হলৌ বান্দৰৰ সৈতে মানুহৰ অনন্য সহাৱস্থানৰ বাবে বাৰেকুৰি ক্ৰমে অসমৰ এটা পৰিৱেশভিত্তিক পৰ্যটনস্থলী হিচাপে পৰিচিত হৈছে। অসম পৰ্যটন বিভাগে ইয়াক ডিব্ৰু-ছৈখোৱা ৰাষ্ট্ৰীয় উদ্যানৰ সৈতে সংযুক্ত পৰ্যটন পৰিক্ৰমাৰ অংশ হিচাপে উল্লেখ কৰিছে।^১৭ পৰ্যটকসকলে বাৰেকুৰিত গিবন পৰ্যবেক্ষণ, গ্ৰাম্য-জীৱন, স্থানীয় সংস্কৃতি আৰু প্ৰাকৃতিক পৰিৱেশ উপভোগ কৰিব পাৰে। গাঁওখন বিশেষকৈ বন্যপ্ৰাণী পৰ্যবেক্ষক, আলোকচিত্ৰশিল্পী আৰু প্ৰকৃতিপ্ৰেমীৰ বাবে আকৰ্ষণীয়। অসম পৰ্যটন বিভাগৰ তথ্য অনুসৰি বাৰেকুৰি ভ্ৰমণৰ বাবে বছৰটোৰ যিকোনো সময় উপযোগী।^১৮

বাৰেকুৰি মূলতঃ এটা বসতিপূৰ্ণ গাঁও আৰু বন্যপ্ৰাণীৰ বাসস্থান। সেয়েহে পৰ্যটকসকলে গিবনক খেদি নিবলৈ, উচ্চ শব্দ কৰিবলৈ, গছ-গছনি ক্ষতি কৰিবলৈ বা বন্যপ্ৰাণীক অনিয়মিতভাৱে খাদ্য দিবলৈ বিৰত থাকিব লাগে। স্থানীয় লোকসকলৰ পৰম্পৰা আৰু গিবনৰ প্ৰাকৃতিক আচৰণৰ প্ৰতি সন্মান প্ৰদৰ্শন কৰাটো দায়িত্বশীল পৰ্যটনৰ এটা গুৰুত্বপূৰ্ণ অংশ।

যাতায়াত

বাৰেকুৰি তিনিচুকীয়া চহৰৰপৰা পথযোগে সংযুক্ত। গাঁওখন তিনিচুকীয়া চহৰৰপৰা প্ৰায় ১৯ কিলোমিটাৰ দূৰত অৱস্থিত।^১৯ নিকটৱৰ্তী ৰে'ল ষ্টেচন মাকুম জংচন। অসম পৰ্যটন বিভাগৰ তথ্য অনুসৰি মাকুম ৰে'ল ষ্টেচন বাৰেকুৰিৰপৰা প্ৰায় ৫ কিলোমিটাৰ দূৰত।^২০

নিকটৱৰ্তী বিমানবন্দৰ হৈছে ডিব্ৰুগড় বিমানবন্দৰ। অসম পৰ্যটন বিভাগৰ প্ৰকাশিত তথ্য অনুসৰি বিমানবন্দৰটো বাৰেকুৰিৰপৰা প্ৰায় ৪৫ কিলোমিটাৰ দূৰত।^২১

সাংস্কৃতিক গুৰুত্ব

বাৰেকুৰিৰ বিশেষত্ব কেৱল ইয়াৰ প্ৰাকৃতিক পৰিৱেশত সীমাবদ্ধ নহয়। গাঁওখনৰ মৰাণ সম্প্ৰদায়ৰ পৰম্পৰা আৰু হলৌ বান্দৰৰ সৈতে গঢ়ি উঠা সাংস্কৃতিক সম্পৰ্কে মানুহ আৰু বন্যপ্ৰাণীৰ সহাৱস্থানৰ এক অনন্য উদাহৰণ সৃষ্টি কৰিছে।

২০২৪ চনত প্ৰধানমন্ত্ৰী নৰেন্দ্ৰ মোদীয়ে 'মন কি বাত'ত বাৰেকুৰিৰ কথা উল্লেখ কৰাৰ পাছত গাঁওখনৰ এই অনন্য সম্পৰ্ক ৰাষ্ট্ৰীয় পৰ্যায়ত অধিক পৰিচিত হয়।^২২

২০২৪ চনত আকাশবাণীয়েও বাৰেকুৰিৰ হলৌ বান্দৰ সংৰক্ষণৰ প্ৰচেষ্টাক লৈ বিশেষ প্ৰতিৱেদন প্ৰকাশ কৰে।^২৩