বসুন্ধৰা শইকীয়া

বসুন্ধৰা শইকীয়া (Basundhara Saikia; ১৯৪৬ – ১০ এপ্ৰিল ২০০২) এগৰাকী উল্লেখযোগ্য অসমীয়া অনুবাদক আৰু সাহিত্যিক আছিল। ভাৰতৰ বিভিন্ন ভাষাৰ সাহিত্য অসমীয়া ভাষালৈ অনুবাদ কৰাৰ জৰিয়তে তেওঁ অসমীয়া সাহিত্যৰ বিকাশত গুৰুত্বপূৰ্ণ অৱদান আগবঢ়াইছিল। বিশেষকৈ বঙালী ভাষা আৰু ওড়িয়া ভাষা ভাষাৰ সাহিত্যকৰ্মসমূহক অসমীয়া পাঠকৰ মাজলৈ লৈ যোৱাত তেওঁ বিশেষ ভূমিকা পালন কৰিছিল।।^১

জন্ম আৰু শিক্ষা

বসুন্ধৰা শইকীয়াৰ জন্ম ১৯৪৬ চনত অসমৰ যোৰহাটত হৈছিল। শৈশৱৰ পৰাই তেওঁ সাহিত্য পঢ়া-লিখাৰ প্ৰতি আগ্ৰহী আছিল। শিক্ষাজীৱনৰ সময়তেই তেওঁ ভাৰতীয় বিভিন্ন ভাষাৰ সাহিত্যৰ সৈতে পৰিচিত হয় আৰু পৰৱৰ্তী সময়ত অনুবাদ সাহিত্যৰ ক্ষেত্ৰত নিজকে প্ৰতিষ্ঠিত কৰে।^২

জীৱন আৰু কৰ্ম

বসুন্ধৰা শইকীয়াই মূলতঃ অনুবাদ সাহিত্যৰ জৰিয়তে অসমীয়া সাহিত্যত বিশেষ অৱদান আগবঢ়ায়। তেওঁ বহু ভাৰতীয় ভাষাৰ গুৰুত্বপূৰ্ণ গ্ৰন্থ অসমীয়া ভাষালৈ অনুবাদ কৰে। তেওঁৰ অনুবাদসমূহে অসমৰ পাঠকসমাজক ভাৰতীয় বহুভাষিক সাহিত্যৰ সৈতে পৰিচিত কৰোৱাত সহায় কৰিছিল।

সংবাদপত্ৰৰ তথ্য অনুসাৰে তেওঁ দালাই লামাৰ আত্মজীৱনী My Land and My People-ৰ অসমীয়া অনুবাদো কৰিছিল, যি স্বদেশ আৰু স্বজাতি নামত প্ৰকাশ পাইছিল।^৩

উল্লেখযোগ্য অনুবাদ

• দত্তা — বিখ্যাত বাংলা সাহিত্যিক শৰৎচন্দ্ৰ চট্টোপাধ্যায়ৰ উপন্যাস দত্তাৰ অসমীয়া অনুবাদ।
• যাত্ৰা — ওড়িয়া সাহিত্যিক প্ৰতিভা ৰায়ৰ উপন্যাসৰ অসমীয়া অনুবাদ।
• অগ্নিগৰ্ভা — মহাশ্বেতা দেৱীৰ সাহিত্যকৰ্মৰ অনুবাদ।
• স্বদেশ আৰু স্বজাতি — দালাই লামাৰ আত্মজীৱনী My Land and My People-ৰ অসমীয়া অনুবাদ।^৩

অনুবাদ শৈলী

বসুন্ধৰা শইকীয়াৰ অনুবাদ শৈলী সহজ আৰু সাবলীল বুলি বিবেচিত। তেওঁ মূল গ্ৰন্থৰ ভাব, ভাষা আৰু সাংস্কৃতিক প্ৰেক্ষাপট অক্ষুণ্ণ ৰাখি অসমীয়া ভাষাৰ স্বাভাবিক ভংগীত উপস্থাপন কৰিবলৈ চেষ্টা কৰিছিল।

সাহিত্যিক মূল্যায়ন

অসমীয়া অনুবাদ সাহিত্যৰ বিকাশত বসুন্ধৰা শইকীয়াৰ অৱদান গুৰুত্বপূৰ্ণ বুলি সাহিত্য সমালোচকসকলে মত প্ৰকাশ কৰিছে। বিভিন্ন ভাষাৰ সাহিত্য অসমীয়ালৈ অনুবাদ কৰি তেওঁ ভাৰতীয় বহুভাষিক সাহিত্যৰ মাজত এক সাহিত্যিক সেতুবন্ধন গঢ়ি তুলিবলৈ সক্ষম হৈছিল।

বঁটা আৰু সন্মান

বসুন্ধৰা শইকীয়াই তেওঁৰ উচ্চমানৰ অনুবাদ কৰ্মৰ বাবে ৰাষ্ট্ৰীয় পৰ্যায়ত সাহিত্য অকাডেমিৰ দ্বাৰা দুবাৰকৈ সন্মানিত হৈছে:

1. সাহিত্য অকাডেমি অনুবাদ বঁটা (১৯৯৪): শৰৎচন্দ্ৰ চট্টোপাধ্যায়ৰ 'দত্তা' গ্ৰন্থৰ সফল অনুবাদৰ বাবে তেওঁক এই বঁটা প্ৰদান কৰা হয়।^৪
2. সাহিত্য অকাডেমি অনুবাদ বঁটা (২০০৭): ওড়িয়া ভাষাৰ পৰা অনুবাদ কৰা 'যাত্ৰা' গ্ৰন্থখনৰ বাবে তেওঁ দ্বিতীয়বাৰলৈ এই সন্মানীয় বঁটা লাভ কৰে।

মৃত্যু

বসুন্ধৰা শইকীয়াই ১০ এপ্ৰিল ২০০২ তাৰিখে মৃত্যুবৰণ কৰে।^৩