দীপাংকৰ বৰা

দীপাংকৰ বৰা (Dipankar Borah; জন্ম: ১১ অক্টোবৰ ১৯৯৪) অসমৰ এগৰাকী উদ্ভিদবিজ্ঞানী, অধ্যাপক আৰু গৱেষক।

ব্যক্তিগত জীৱন

১৯৯৪ চনৰ ১১ অক্টোবৰ তাৰিখে, অসমৰ বিশ্বনাথ জিলাত উদ্ভিদবিজ্ঞানী দীপাংকৰ বৰাই জন্ম গ্ৰহণ কৰিছিল। ভাৰতৰ অন্যতম বৃহৎ চাহ বাগিচা মোনাবাৰী চাহ বাগিচাও এই অঞ্চলটোতে অৱস্থিত। তেওঁৰ পিতৃ মহেশ্বৰ বৰা আৰু মাতৃ বিজন্তি বৰা। তেওঁ ২০১৫ চনত বিশ্বনাথ মহাবিদ্যালয়ৰ পৰা (গুৱাহাটী বিশ্ববিদ্যালয়ৰ অধিভুক্ত) বি এছ চি, ৰাজীৱ গান্ধী বিশ্ববিদ্যালয়ৰ পৰা ২০১৭ চনত এম এছ চি আৰু ২০২২ চনত পি এইচ ডি ডিগ্ৰী লাভ কৰিছিল। তেওঁৰ উদ্ভিদ অন্বেষণ সম্পৰ্কীয় কাম-কাজসমূহৰ সৰহভাগেই তেওঁ উত্তৰ-পূব ভাৰতৰ অৰুণাচল প্ৰদেশ, অসম আৰু মেঘালয় ৰাজ্যতে কৰিছিল।^১২ ২০২০ চনৰ পৰা ২০২৩ চনলৈকে তেওঁ গোৱালপাৰা মহাবিদ্যালয়ৰ উদ্ভিদবিজ্ঞান বিভাগৰ সহকাৰী অধ্যাপক আছিল।^৩ ২০২৩ চনৰ জুলাই মাহৰ পৰা তেওঁ কলিয়াবৰ মহাবিদ্যালয়ৰ উদ্ভিদবিজ্ঞান বিভাগৰ সহকাৰী অধ্যাপক হিচাপে কৰ্মৰত আছে।^৪৫

কৰ্মৰাজি

অন্যান্য বহু উদ্ভিদ গণৰ লগতে উত্তৰ-পূব ভাৰতৰ (হিমালয় আৰু ভাৰত-বাৰ্মা জৈৱ বৈচিত্ৰ্যৰ হটস্পটত) বীগʼনিয়াছ (Begonia),^{৬৭৮৯১০} গেছনেৰিয়াডছ (Gesneriaceae),^{১১১২১৩১৪} এৰিষ্টোলচিয়া^১৫ (Aristolochia বা Pipeworts) আৰু ক্ল’ৰ’ফাইটাম (Chlorophytum)ৰ^১৬ ওপৰত কৰা অধ্যয়নৰ বাবে বৰা সুপৰিচিত। এতিয়ালৈকে তেওঁ ২০টাতকৈও অধিক নতুন উদ্ভিদৰ নামকৰণ কৰিছে।

২০২১ চনৰ ফেব্ৰুৱাৰী মাহত, বৰাই তেওঁৰ দুজন সহযোগী বিজ্ঞানীৰ সৈতে অৰুণাচল প্ৰদেশৰ টাৱাং জিলাৰ পেংগা টেং ছ’ৰ পৰা ক্ৰেমন্থডিয়াম ইণ্ডিকাম (Cremanthodium indicum) নামৰ এটা নতুন আলপাইন উদ্ভিদ প্ৰজাতিৰ আৱিষ্কাৰ কৰে, যিটো সেই বৰ্ষত আৱিষ্কৃত উদ্ভিদসমূহৰ মাজত অত্যধিক জনপ্ৰিয় হৈ পৰিছিল।^{১৭১৮১৯২০}

পূব হিমালয়ৰ আলপাইন অঞ্চলত আৱিষ্কৃত আৰু তেওঁৰ প্ৰয়াত বন্ধু শ্ৰীযুত হাওটো খোইয়াঙৰ নামেৰে নামকৰণ কৰা, পেডিকুলাৰিছ খোইয়াংগি (Pedicularis khoiyangii) নামৰ উদ্ভিদ প্ৰজাতিটোৰ আৱিষ্কাৰতো তেৱেঁই আছিল। উদ্ভিদ প্ৰজাতিটোৰ সাধাৰণ নাম হ’ল হাওটু'চ্ লুজৱৰ্ট।^২১২২

২০২০ চনৰ ডিচেম্বৰ মাহত, তিনিগৰাকী ভাৰতীয় বিজ্ঞানী ক্ৰমে ভি.এছ. হৰিশ, এম. ছাবু আৰু দীপাংকৰ বৰাই অৰুণাচল প্ৰদেশৰ পাপুমপাৰে জিলাৰ নিৰ্জুলিৰ পৰা আমোমম অৰুণাচলেন্সে (Amomum arunachalense) নামৰ এটা নতুন উদ্ভিদ প্ৰজাতিৰ আৱিষ্কাৰ কৰে।^২৩

তেওঁ অসমৰ অৰ্কিডসমূহৰ সংৰক্ষণৰ বাবেও কাম কৰি আছে।^২৪

বৰাই বিহালী সংৰক্ষিত বনাঞ্চলত ব্যাপকভাৱে কাম কৰাৰ লগতে ইয়াৰ সুৰক্ষা আৰু উন্নীতকৰণৰ বাবেও মাত মাতি আহিছে।^{২৫২৬২৭}

ডক্টৰেল গৱেষণা

তেওঁ অৰুণাচল প্ৰদেশৰ ৰাজীৱ গান্ধী বিশ্ববিদ্যালয়ৰ পৰা বিহালী বন্যপ্ৰাণী অভয়াৰণ্য (পূৰ্বতে বিহালী সংৰক্ষিত বনাঞ্চল নামেৰে জনাজাত)ৰ পুষ্পবিজ্ঞান সম্বন্ধীয় অধ্যয়নত পি এইচ ডি ডিগ্ৰী লাভ কৰিছিল।^২৮ বৰা, "এথ্নʼবʼটানি অৱ নৰ্থইষ্ট ইণ্ডিয়া" নামৰ ৰাজহুৱা ৱেবছাইট এটিৰ সৃষ্টিকৰ্তাও। ই উত্তৰ-পূব ভাৰতৰ উদ্ভিদসমূহৰ নামৰ এক উপযোগী তথ্যকোষ।^২৯