অ’ মাই গড!

অ’ মাই গড! (ইংৰাজী ভাষা: OMG – Oh My God!) হ’ল ২০১২ চনত মুক্তিপ্ৰাপ্ত এখন ভাৰতীয় হিন্দী ভাষাৰ ব্যংগাত্মক কমেডী ড্ৰামা চলচ্চিত্ৰ। উমেশ শুক্লাৰ দ্বাৰা ৰচিত আৰু পৰিচালিত এই চিনেমাখন ভায়াকম ১৮ মোচন পিকচাৰ্ছ, এছ স্পাইচ ষ্টুডিঅ’, গ্ৰেজিং গোট পিকচাৰ্ছ আৰু প্লেটাইম ক্ৰিয়েশ্যনছৰ দ্বাৰা নিৰ্মিত। চিনেমাখনৰ কাহিনীটো গুজৰাটী ভাষা নাটক কানজি বিৰুদ্ধ কানজিৰ ওপৰত আধাৰিত, যিখন নাটক আকৌ অষ্ট্ৰেলিয়ান চিনেমা দ্য মেন হু ছুড গডৰ পৰা অনুপ্ৰাণিত। চলচ্চিত্ৰখনৰ মুখ্য চৰিত্ৰত অক্ষয় কুমাৰ, পৰেশ ৰাৱাল আৰু মিথুন চক্ৰৱৰ্তীয়ে অভিনয় কৰিছে। সহযোগী চৰিত্ৰত অভিনয় কৰিছে ওম পুৰী, গোবিন্দ নামদেৱ, পুনম ঝাৱৰ, পূজা গুপ্তা আৰু মহেশ মাঞ্জৰেকৰে।^১

২০ কোটি টকাৰ বাজেটেৰে নিৰ্মিত এই চলচ্চিত্ৰখন ২০১২ চনৰ ২৮ ছেপ্টেম্বৰত মুক্তি দিয়া হয় আৰু সমালোচকৰ পৰা ইতিবাচক সঁহাৰি লাভ কৰে।^২৩

এই ছবিখন ২০১৫ চনত তেলুগু ভাষাত গোপালা গোপালা নামেৰে পুনৰ নিৰ্মাণ কৰা হয়, য’ত ভেংকটেশ, পৱন কল্যাণ আৰু শ্ৰীয়া চৰণে অভিনয় কৰিছিল। ২০১৬ চনত কন্নড় ভাষাত ইয়াক মুকুন্দ মুৰাৰী নামেৰে পুনৰ নিৰ্মাণ কৰা হয় য’ত উপেন্দ্ৰ আৰু সুদীপক দেখা গৈছিল।

অমিত ৰায়ৰ পৰিচালনাত OMG 3 হ’বলগীয়া এখন আগন্তুক হিন্দী ভাষাৰ জীৱনীভিত্তিক চলচ্চিত্ৰ।^৪ এই চলচ্চিত্ৰখন ২০২৫ চনৰ ২৫ ডিচেম্বৰত বৰদিনৰ দিনা মুক্তি পোৱাৰ কথা আছে।

কাহিনী

এগৰাকী মধ্যবিত্ত গুজৰাটী ভাষা নাস্তিক কাঞ্জী লালজী মেহতা মুম্বাইত হিন্দু দেৱ-দেৱীৰ মূৰ্তি আৰু পুৰণি সামগ্ৰীৰ এখন দোকান চলাইছিল। তেওঁ নিজৰ চৌপাশৰ ধৰ্মীয় কাম-কাজবোৰক লৈ উপহাস কৰিছিল। এদিন চহৰখনত এক মৃদু প্ৰাবল্যৰ ভূমিকম্প হয় আৰু আচৰিত ধৰণে কেৱল কাঞ্জীৰ দোকানখনেই ধ্বংস হয়। তেওঁৰ পৰিয়াল আৰু বন্ধু-বান্ধৱীসকলে ইয়াৰ বাবে কাঞ্জীৰ নাস্তিকতাক দোষাৰোপ কৰে।

বীমা কোম্পানীৰ কাৰ্যালয়ত কাঞ্জীয়ে জানিব পাৰে যে প্ৰাকৃতিক দুৰ্যোগৰ ফলত হোৱা ক্ষয়-ক্ষতিৰ বাবে তেওঁ কোনো বীমাৰ ধন লাভ নকৰিব, কিয়নো ই 'এক্ট অৱ গড' অৰ্থাৎ "ঈশ্বৰৰ কাম" শ্ৰেণীত পৰে। আন কোনো উপায় বিচাৰি নাপাই তেওঁ ঈশ্বৰৰ বিৰুদ্ধে আদালতত গোচৰ তৰিবলৈ সিদ্ধান্ত লয়, কিন্তু এনে গোচৰৰ বাবে তেওঁ কোনো অধিবক্তা বিচাৰি নাপালে। অৱশেষত এজন মুছলমান অধিবক্তা হানিফ কুৰেশ্বীয়ে তেওঁক সহায় কৰে আৰু কাঞ্জীয়ে নিজেই নিজৰ গোচৰটো লৰিবলৈ সাজু হয়। বীমা কোম্পানীৰ লগতে ধৰ্মীয় নেতা সিদ্ধেশ্বৰ মহাৰাজ, গোপী মাইয়া আৰু তেওঁলোকৰ গোটৰ প্ৰতিষ্ঠাপক লীলাধৰ স্বামীলৈ আইনী জাননী পঠিওৱা হয় আৰু তেওঁলোকক ঈশ্বৰৰ প্ৰতিনিধি হিচাপে আদালতত হাজিৰ হ’বলৈ বাধ্য কৰা হয়।

গোচৰটোৱে চৰ্চা লাভ কৰাৰ লগে লগে কাঞ্জীয়ে বিভিন্ন ধৰ্মীয় মৌলবাদীৰ ভাবুকি আৰু হাৰাশাস্তিৰ সন্মুখীন হয়। তেওঁৰ ঘৰটো বন্ধকত থাকে আৰু পৰিয়ালৰ লোকসকলেও তেওঁক এৰি গুচি যায়। তেনে সময়তে কৃষ্ণ বাসুদেৱ যাদৱে তেওঁক উদ্ধাৰ কৰে। কৃষ্ণই নিজকে উত্তৰ প্ৰদেশৰ গোকুলৰ এজন ৰিয়েল এষ্টেট এজেণ্ট বুলি পৰিচয় দিয়ে যদিও তেওঁৰ কিছুমান অলৌকিক ক্ষমতা আছিল। কৃষ্ণৰ পৰামৰ্শ মতে কাঞ্জীয়ে সংবাদ মাধ্যমৰ সহায় লয় আৰু সমগ্ৰ দেশতে ইয়াৰ ব্যাপক প্ৰচাৰ হয়। বহুতো সমমৰ্মী লোকে কাঞ্জীৰ সৈতে যোগ দিয়ে আৰু ইয়াৰ ফলত কেথলিক ফাদাৰ আৰু মুছলমান মৌলৱীসকলকো বিবাদী হিচাপে আদালতলৈ মাতি অনা হয়। যেতিয়া আদালতে ভূমিকম্পটো যে 'ঈশ্বৰৰ কাম' তাৰ লিখিত প্ৰমাণ বিচাৰে, তেতিয়া কৃষ্ণই কাঞ্জীক ভাগৱত গীতা, কোৰান আৰু বাইবেলৰ দৰে ধৰ্মগ্ৰন্থসমূহ পঢ়িবলৈ কয়। কাঞ্জীয়ে সেইবোৰ পঢ়ি প্ৰতিখন গ্ৰন্থতে এনে কিছুমান বাক্য বিচাৰি পায় যিবোৰত উল্লেখ আছে যে পৃথিৱী আৰু সকলো ঘটনা ঈশ্বৰৰ সৃষ্টি আৰু ঈশ্বৰৰ ইচ্ছাতে সকলো ঘটে। ই কাঞ্জীৰ গোচৰটো শক্তিশালী কৰি তোলে।

অৱশ্যে আদালততে কাঞ্জীৰ ষ্ট্ৰোক হয় আৰু তেওঁ ক’মাত গুচি যায়। এমাহৰ পিছত চকু মেলি তেওঁ কৃষ্ণক দেখে। কৃষ্ণই প্ৰকাশ কৰে যে তেৱেঁই ঈশ্বৰ আৰু কাঞ্জীক সম্পূৰ্ণৰূপে সুস্থ কৰি তুলি ইয়াৰ প্ৰমাণ দিয়ে। তেওঁ কয় যে ধৰ্ম মানুহে সৃষ্টি কৰিছে আৰু তেৱেঁই কাঞ্জীৰ দোকানখন ধ্বংস কৰিছিল যাতে ঈশ্বৰৰ ভয় দেখুৱাই টকা উপাৰ্জন কৰা তথাকথিত ধৰ্মগুৰুসকলক উচিত শিক্ষা দিব পাৰে। তেওঁ আৰু কয় যে তেওঁ মন্দিৰত বাস নকৰে, বৰঞ্চ তেওঁ সৃষ্টি কৰা প্ৰতিটো প্ৰাণীৰ মাজতহে বাস কৰে। ভক্তসকলে দিয়া উপহাৰ বা দানতকৈ তেওঁ ভোকাতুৰ মানুহক সহায় কৰিলেহে অধিক সন্তুষ্ট হয়।

কাঞ্জীয়ে জানিব পাৰে যে আদালতৰ ৰায় তেওঁৰ পক্ষত গৈছে আৰু ধৰ্মীয় সংগঠনসমূহক ক্ষতিপূৰণ দিবলৈ নিৰ্দেশ দিয়া হৈছে। কিন্তু ইয়াৰ ফলত মানুহে কাঞ্জীক এজন দেৱতা হিচাপে পূজা কৰিবলৈ আৰম্ভ কৰিছে। লীলাধৰ, গোপী মাইয়া আৰু সিদ্ধেশ্বৰে কাঞ্জীৰ এটা মূৰ্তি স্থাপন কৰি এটা মন্দিৰ খুলিছে আৰু লাখ লাখ টকাৰ দান সংগ্ৰহ কৰিছে। এই কথা জানিব পাৰি কাঞ্জীয়ে নিজৰ মূৰ্তিটো ভাঙি পেলায় আৰু মানুহক বুজাই দিয়ে যে ঈশ্বৰক মন্দিৰ বা মূৰ্তিত নহয়, বৰঞ্চ নিজৰ ভিতৰত আৰু আনৰ মাজত বিচাৰিব লাগে। ভণ্ড ধৰ্মগুৰুসকলৰ পৰা আঁতৰি থাকিবলৈ তেওঁ জনতাক আহ্বান জনায়। কাম শেষ হোৱাৰ পিছত যেতিয়া তেওঁ কৃষ্ণক ধন্যবাদ দিবলৈ যায়, দেখে যে কৃষ্ণ আৰু তেওঁৰ মটৰ চাইকেলখন অদৃশ্য হৈ পৰিছে। কাঞ্জীৰ পৰিয়ালটো ঘূৰি আহে আৰু তেওঁলোক পুনৰ একত্ৰিত হয়। কাঞ্জীয়ে মাটিত পৰি থকা কৃষ্ণৰ চাবিৰ ৰিংটো তুলি ল’বলৈ খোজোতেই আকাশৰ পৰা কৃষ্ণৰ মাত ভাঁহি আহে আৰু কয় যে ঈশ্বৰৰ ভয় আৰু ধৰ্মীয় সামগ্ৰীৰ ওপৰত নিৰ্ভৰশীলতাৰ বিৰুদ্ধেই তেওঁ যুঁজ দিছিল, গতিকে চাবিৰ ৰিংটো ৰখাৰ প্ৰয়োজন নাই। কাঞ্জীয়ে হাঁহি মুখেৰে সেইটো দলিয়াই দিয়ে আৰু এটা পোহৰৰ সৈতে সি আকাশত বিলীন হৈ যায়।

অভিনয়ত

• অক্ষয় কুমাৰ: কৃষ্ণ বাসুদেৱ যাদৱৰ চৰিত্ৰত
• পৰেশ ৰাৱাল: কানজি লালজী মেহতাৰ চৰিত্ৰত
• মিথুন চক্ৰৱৰ্তী: লীলাধৰ স্বামীৰ চৰিত্ৰত
• ওম পুৰী: অধিবক্তা হানিফ কুৰেশ্বীৰ চৰিত্ৰত
• মহেশ মাঞ্জৰেকাৰ: অধিবক্তা সাৰদেশাইৰ চৰিত্ৰত
• গোবিন্দ নামদেৱ: সিদ্ধেশ্বৰ মহাৰাজৰ চৰিত্ৰত
• মুৰলী শৰ্মা: লক্ষ্মণ মিশ্ৰৰ চৰিত্ৰত
• নিখিল ৰত্নপাৰখী: মহাদেৱ; কানজিৰ কৰ্মচাৰী
• লুবনা চেলিম: সুশীলা মেহতা (কানজিৰ পত্নী)
• পুনম ঝাৱৰ: গোপী মাইয়াৰ চৰিত্ৰত
• ইউচুফ হুছেইন খান: বিচাৰকৰ চৰিত্ৰত
• জইনীৰাজ ৰাজপুৰোহিত: দিনেশ গান্ধী, সৰল জীৱন বীমা কোম্পানীৰ মুখ্য আঞ্চলিক প্ৰবন্ধক
• নিধি চুব্বাইয়া: শ্বেতা তিৱাৰী (বাতৰি সংগ্ৰহকাৰী)
• অপূৰ্বা অৰোৰা: জিগনা মেহতা (কানজি আৰু সুশীলাৰ কন্যা)
• আজান ৰুস্তম শ্বাহ: চিন্তু মেহতা (কানজি আৰু সুশীলাৰ পুত্ৰ)
• হানি ছায়া: জগদীশৰ চৰিত্ৰত
• ক্ৰুণাল পণ্ডিত: প্ৰবীণৰ চৰিত্ৰত
• ভক্তি ৰত্নপাৰখী: মঙ্গলা (মহাদেৱৰ পত্নী)
• অৰুণ বালি: এজন ঋষিৰ চৰিত্ৰত
• প্ৰদীপ ভেংগুৰলেকাৰ: পূজাৰীৰ চৰিত্ৰত
• কুকুৰ তাৰামাষ্টৰ: মিশ্ৰৰ সোঁহাত স্বৰূপ ব্যক্তি
• নিলেশ পাণ্ডিয়া: ভজন গায়ক
• প্ৰবীণ নায়েক: বেচনীয়াৰ চৰিত্ৰত
• পূজা গুপ্তা: হানিফৰ কন্যা
• চুনীল চৌহান: আছলামৰ চৰিত্ৰত
• শশী ওমপ্ৰকাশ সতী: আছলামৰ ভগ্নী
• মঞ্জু ব্যাস: সাৰদেশাইৰ সহায়ক
• টিস্কা চোপ্ৰা: সাক্ষাৎকাৰ গ্ৰহণকাৰী
• প্ৰভু দেৱা: "গো গো গো গোবিন্দা" গীতটিত বিশেষ অভিনয়ত
• সোনাক্ষী সিন্‌হা: "গো গো গো গোবিন্দা" গীতটিত বিশেষ অভিনয়ত