হিমাংশী খুৰানা

হিমাংশী খুৰানা (ইংৰাজী ভাষা: Himanshi Khurana; জন্ম: ২৭ নৱেম্বৰ ১৯৯১) এগৰাকী ভাৰতীয় মডেল, অভিনেত্ৰী আৰু গায়িকা, যিয়ে মূলতঃ পঞ্জাবী ভাষা চলচ্চিত্ৰত কাম কৰে।^১ তেওঁ পঞ্জাবী ছবি সাড্ডা হকত অভিনয় কৰিছিল। ২০১৯ চনত তেওঁ বাস্তৱধৰ্মী অনুষ্ঠান বিগ বছ ১৩ত এগৰাকী প্ৰতিযোগী হিচাপে অংশগ্ৰহণ কৰিছিল।^২

প্ৰাৰম্ভিক জীৱন

খুৰানাৰ জন্ম ১৯৯১ চনৰ ২৭ নৱেম্বৰত হৈছিল আৰু তেওঁ পঞ্জাবৰ কীৰতপুৰ চাহিবৰ নিবাসী।^১৩৪

কৰ্মজীৱন

খুৰানাই ১৬ বছৰ বয়সতে মিছ লুধিয়ানা খিতাপ জয় কৰি মডেলিং কেৰিয়াৰ আৰম্ভ কৰিছিল। তেওঁ ২০১০ চনৰ মিছ পিটিচি পঞ্জাবীৰ অন্যতম চূড়ান্ত প্ৰতিযোগী আছিল। একে বছৰতে তেওঁ চণ্ডীগড়ত আয়োজিত মিছ নৰ্থ জ’ন প্ৰতিযোগিতাত বিজয়ী হয়।^৫

২০১০ চনত "জডী - বিগ ডে পাৰ্টি" গীতটোৰ জৰিয়তে তেওঁ পঞ্জাবী সংগীত জগতত আত্মপ্ৰকাশ কৰে। পিছলৈ ২০১২ চনত ফিৰোজ খানৰ (ফছলী বটেৰে) আৰু হৰজৌতৰ (ইজহাৰ) মিউজিক ভিডিঅ’ত অভিনয় কৰে। ২০১৩ চনত খুৰানাক হাৰ্ডী সান্ধুৰ "সোঁচ" গীতটোত আৰু হিট ছবি সাড্ডা হকত দেখা গৈছিল।^৬ ২০১৫ চনটো খুৰানাৰ বাবে অতি সফল বৰ্ষ হিচাপে প্ৰমাণিত হয়। এই সময়ছোৱাত তেওঁ জেছী গিল, বাদশাহ, জে ষ্টাৰ, নিঞ্জা আৰু মানকিৰ্ট অউলখৰ দৰে বহু গায়কৰ সৈতে কাম কৰে। ২০১৬ চনৰ মাৰ্চ মাহত তেওঁ সুখ-ই (মিউজিকেল ডক্টৰজ)ৰ সৈতে "ছ্যেড চং"ত অভিনয় কৰে। ২০১৮ চনত খুৰানাই "হাই ষ্টেণ্ডাৰ্ড" গীতটোৰ জৰিয়তে গায়িকা হিচাপে আত্মপ্ৰকাশ কৰে।

খুৰানাই পঞ্জাবী চিনেমাৰ অভিনেত্ৰী হিচাপে সাড্ডা হক ছবিৰ জৰিয়তে আত্মপ্ৰকাশ কৰি জনপ্ৰিয়তা অৰ্জন কৰে।^১ অৱশ্যে তেওঁৰ প্ৰথম বলীউড ছবি আছিল জীত লেংগে জাহান (২০১২)। ইয়াৰ পিছত তেওঁ পঞ্জাবী ছবি লেদাৰ লাইফত মুখ্য চৰিত্ৰত অভিনয় কৰে। ২০১৫ চনৰ পঞ্জাবী ছবি টু বোলতো খুৰানাই মুখ্য অভিনেত্ৰী হিচাপে কাম কৰে।^১ ইয়াৰ উপৰি তেওঁ ৬খন দক্ষিণ ভাৰতীয় ছবিতো অভিনয় কৰিছে (দুখন কন্নড় ভাষা, দুখন তামিল ভাষা, এখন তেলুগু ভাষা আৰু এখন মালয়ালম ভাষা)।^৫

২০১৯ চনৰ নৱেম্বৰত খুৰানাই বাস্তৱধৰ্মী অনুষ্ঠান বিগ বছ ১৩ত এগৰাকী চেলিব্ৰিটি প্ৰতিযোগী হিচাপে অংশগ্ৰহণ কৰিছিল।^৭

ব্যক্তিগত জীৱন

২০১৯ চনৰ নৱেম্বৰত খুৰানাই বিগ বছ ১৩ত নিশ্চিত কৰিছিল যে তেওঁ বিগত ন বছৰ ধৰি চাও নামৰ এজন ব্যক্তিৰ সৈতে প্ৰেমৰ সম্পৰ্কত আছিল।^৮৯ ২০২০ চনৰ জানুৱাৰীত তেওঁ টুইটাৰৰ জৰিয়তে নিজৰ বাগদত্তাৰ সৈতে সম্পৰ্ক অন্ত পৰা বুলি জানিবলৈ দিয়ে।^১০ ২০২০ চনৰ জানুৱাৰীৰপৰা ২০২৩ চনৰ ডিচেম্বৰলৈকে তেওঁ বিগ বছৰ সহ-প্ৰতিযোগী অসীম ৰিয়াজৰ সৈতে প্ৰেমৰ সম্পৰ্কত আছিল।^১১১২