সুপ্ৰিয়া দেৱী

সুপ্ৰিয়া দেৱী বা সুপ্ৰিয়া চৌধুৰী ( Supriya Devi; ৮ জানুৱাৰী ১৯৩৩ – ২৬ জানুৱাৰী ২০১৮) এগৰাকী ভাৰতীয় অভিনেত্ৰী, যিয়ে বঙালী চলচ্চিত্ৰত প্ৰায় ৫০ বছৰ জুৰি অভিনয় কৰিছিল। ঋত্বিক ঘটকৰ ‘মেঘে ঢাকা তাৰা’ (১৯৬০) ছবিৰ নীলা নামৰ চৰিত্ৰটোৰ ৰূপায়ণৰ তেওঁক বিশেষ ভাবে জনা যায়।^১২৩ তেওঁ ফিল্মফেয়াৰ বঁটা, পশ্চিমবংগৰ সৰ্বোচ্চ অসামৰিক সন্মান 'বঙ্গ-বিভূষণ', দুবাৰকৈ 'বেঙ্গল ফিল্ম জাৰ্নেলিষ্টচ্ এছোচিয়েচন বঁটা' লাভ কৰিছিল।^৪ চলচ্চিত্ৰ উদ্যোগটোলৈ আগবঢ়োৱা অসামান্য অৱদানৰ বাবে ২০১৪ চনত তেওঁক ভাৰত চৰকাৰৰ চতুৰ্থ অসমাৰিক সন্মান পদ্মশ্ৰীৰে সন্মানিত কৰা হয়।^৫

উত্তম কুমাৰ অভিনীত আৰু নিৰ্মল দে পৰিচালিত ‘বসু পৰিবাৰ’ (১৯৫২) ছবিৰ যোগেদি তেওঁ চলচ্চিত্ৰাভিনয়ৰ পাতনি মেলে। একে বছৰতে মুক্তিপ্ৰাপ্ত প্ৰণৱ ৰায় পৰিচালিত ‘প্ৰাৰ্থনা’তো (১৯৫২) তেওঁ ভূমুকি মাৰে।^১ তাৰপিছত কেই বছৰমানৰ বিৰতিৰ পিছত সুশীল মজুমদাৰ পৰিচালিত 'মৰ্মবাণী'ৰ (১৯৫৮) যোগে পুনৰ চলচ্চিত্ৰ জগতলৈ ঘূৰি আহে।^১ মঙ্গল চক্ৰৱৰ্তী পৰিচালিত উত্তম কুমাৰৰ ব্লকবাষ্টাৰ ‘সোণাৰ হৰিণ’ত (১৯৬০) অভিনয় কৰাৰ পিছত সুপ্ৰিয়া দেৱী চৰ্চালৈ আহে।^৩ ১৯৬০ দশকৰ প্ৰথমচোৱাত ‘মেঘে ঢাকা তাৰা’ (১৯৬০), ‘সুনো বৰনাৰী’ (১৯৬০), ‘কোমল গান্ধাৰ’ (১৯৬১), ‘স্বৰলিপি’ (১৯৬১), ‘অগ্নি সংস্কাৰ’ (১৯৬১) আদি বহু কেইখন ছবিৰ যোগে তেওঁ বিশেষ দৃষ্টি আকৰ্ষণ কৰিবলৈ সক্ষম হয়। ১৯৬৩ চনত তেওঁ সদাশিৱ ৰাও কবি পৰিচালিত ‘বেগানা’ ছবিৰ যোগেদি ধৰ্মেন্দ্ৰৰ বিপৰীতে অভিনয় কৰি হিন্দী চলচ্চিত্ৰ জগতত পদাৰ্পন কৰে।^১

প্ৰাৰম্ভিক জীৱন

সুপ্ৰিয়া দেৱীৰ জন্ম হৈছিল ব্ৰিটিছ শাসিত বৰ্মাত, বৰ্তমানৰ ম্যানমাৰত।^৬ তেওঁৰ দেউতাৰ গোপালচন্দ্ৰ বন্দোপাধ্যায় এজন উকিল আছিল। তেওঁ বৰ্তমান বাংলাদেশৰ ফৰিদপুৰ জিলাৰ নিবাসী আছিল।^৬ দ্বিতীয় বিশ্বযুদ্ধৰ সময়ত তেওঁলোকৰ পৰিয়ালটো কলকাতালৈ স্থানান্তৰিত হৈছিল।^৬৭৮ তেওঁ মাত্ৰ ৭ বছৰ বয়সতে দেউতাকে পৰিচালনা কৰা দুখন নাটকৰ যোগেদি অভিনয়ৰ পাতনি মেলে। সৰুতে তেওঁ নাচিছিল আৰু তেতিয়াৰ বাৰ্মাৰ প্ৰধানমন্ত্ৰী থাকিন-নুৰ হাতেদি এটা বঁটাও লাভ কৰিছিল।^৯ ১৯৪২ চনত জাপানে বাৰ্মা দখল কৰাৰ পিছত তেওঁলোকৰ পৰিয়ালটো ভগনীয়াত পৰিণত হয়। ১৯৪৮ চনত বেনাৰ্জী পৰিয়ালে এক উন্নত জীৱন আৰু পুনৰ্সংস্থাপনৰ উদ্যেশ্যে বাৰ্মাৰ পৰা কলকাতালৈ গুছি আহে।^১৯

ব্যক্তিগত জীৱন

১৯৫৪ চনত সুপ্ৰিয়া দেৱীয়ে বিশ্বনাথ চৌধুৰীক বিয়া কৰায় আৰু বছৰচেৰেক পিছত জীয়ৰী সোমাৰ জন্ম হয়। ১৯৫৮ চনত তেওঁলোকৰ বিবাহ-বিচ্ছেদ হয়।^১০ ১৯৬৩ চনত মহানায়ক উত্তম কুমাৰৰ লগত তেওঁৰ বিবাহ হয় আৰু ১৯৮০ চনত উত্তম কুমাৰৰ মৃত্যুলৈকে দুয়ো একেলগে সংসাৰ কৰে।^{১১১২১৩}

২০১৮ৰ ২৬ জানুৱাৰীত ৮৫ বছৰ বয়সত কলকাতাত হৃদযন্ত্ৰৰ ক্ৰিয়া বন্ধ হৈ তেওঁৰ মৃত্যু হয়।^১৪