মাহী গিল

ৰিম্পি কৌৰ "মাহী" গিল (ਮਾਹੀ ਗਿੱਲ) (জন্ম: ১৯ ডিচেম্বৰ ১৯৭৫), হিন্দী আৰু পঞ্জাবী চলচ্চিত্ৰ উদ্যোগত কৰ্মৰত, এগৰাকী ভাৰতীয় অভিনেত্ৰী।^১ অনুৰাগ কাশ্যপৰ দ্বাৰা পৰিচালিত,হিন্দী ছবি দেৱ. ডি ত পাৰোৰ চৰিত্ৰত অভিনয় কৰাৰ বাবে তেওঁ অধিক পৰিচিত। ছবিখন শৰৎচন্দ্ৰ চট্টোপাধ্যায়ৰ দ্বাৰা ৰচিত, বঙালী উপন্যাস দেৱদাসৰ এক আধুনিক ৰূপ। ছবিখনৰ বাবে তেওঁ ২০১০ চনত, শ্ৰেষ্ঠ অভিনেত্ৰীৰ ফিল্মফেয়াৰ সমালোচক বঁটাও লাভ কৰে। দেৱ. ডি-ত অভিনয়েৰে বলীউড (হিন্দী চলচ্চিত্ৰ)ত অভিষেক ঘটোৱাৰ পূৰ্বে তেওঁ পঞ্জাবী ছবিত নিজৰ কৰ্মজীৱনৰ আৰম্ভণি কৰিছিল।^২৩

তেওঁ হিন্দী ভাষাৰ ছবি চাহেব, বিৱি ঔৰ গেংষ্টাৰ আৰু ইয়াৰ ছিকুৱেল চাহেব বিৱি ঔৰ গেংষ্টাৰ ৰিটাৰ্ণছত যৌন হতাশগ্ৰস্ত পত্নী মাধৱী দেৱীৰ চৰিত্ৰত অভিনয় কৰি খ্যাতি লাভ কৰে।

প্ৰাৰম্ভিক জীৱন আৰু শিক্ষা

১৯৭৫ চনৰ ১৯ ডিচেম্বৰ তাৰিখে, চণ্ডীগড়ত এটি পঞ্জাবী জাট শিখ পৰিয়ালত মাহী গিলে জন্মগ্ৰহণ কৰিছিল।^১ ১৯৯৮ চনত, তেওঁ চণ্ডীগড়স্থিত পাঞ্জাব বিশ্ববিদ্যালয়ৰ পৰা থিয়েটাৰ বিষয়ত স্নাতকোত্তৰ ডিগ্ৰী লাভ কৰে।^৪

কৰ্মজীৱন

হাৱায়েঁ নামৰ পঞ্জাবী ভিত্তিক বলীউড ছবি এখনত অভিনয়েৰে তেওঁ অভিনয় জগতত খোজ দিছিল। তেওঁ থিয়েটাৰত অভিনয় লগতে দুখনমান পঞ্জাবী ছবিতো অভিনয় কৰিছে। চলচ্চিত্ৰ পৰিচালক অনুৰাগ কাশ্যপে প্ৰথমে তেওঁক পাৰ্টি এখনত দেখিছিল আৰু নিমিষতে তেওঁক দেৱ. ডি ছবিত পাৰোৰ চৰিত্ৰত অভিনয় কৰিবলৈ চূড়ান্ত কৰিছিল।^৫৬ তেওঁ নিৰজ গ্ৰʼভাৰ হত্যাকাণ্ডৰ আধাৰত নিৰ্মিত পৰিচালক ৰাম গোপাল ভাৰ্মাৰ চলচ্চিত্ৰ নট এ লাভ ষ্ট'ৰীতো অভিনয় কৰিছিল। ২০১১ চনৰ ৩০ ছেপ্টেম্বৰত মুক্তিপ্ৰাপ্ত চাহেব, বিৱি ঔৰ গেংষ্টাৰ নামৰ ছবিখনত, তেওঁ অভিনেতা জিমি শ্বেৰগিল আৰু ৰণদীপ হুডাৰ বিপৰীতে অভিনয় কৰিছিল। এই ছবিখনৰ বাবে তেওঁ ফিল্মফেয়াৰ এৱাৰ্ডছত শ্ৰেষ্ঠ অভিনেত্ৰীৰ শিতানত মনোনয়ন লাভ কৰিছিল।^৭

গিলে পান সিং তোমৰ নামৰ ছবিখনত অভিনেতা ইৰফান খানৰ বিপৰীতে অভিনয় কৰিছিল ৷ ছবিখন এগৰাকী ক্ৰীড়াবিদৰ জীৱনৰ সঁচা ঘটনাৰ আধাৰত নিৰ্মিত হৈছে; যিয়ে পিছলৈ এজন ডকাইত হৈ যায়৷ ইয়াত তেওঁ শিৰোনাম চৰিত্ৰৰ পত্নীৰ চৰিত্ৰত অভিনয় কৰিছিল। হিন্দী সংস্কৰণ জাঞ্জীৰৰ সৈতে একেলগে শ্বুটিং কৰা অপূৰ্ব লখিয়াৰ ছবি তুফানত অভিনয়েৰে গিলে অভিষেক ঘটায়। তিগমাংশু ঢুলিয়াৰ বুলেট ৰাজা নামৰ ছবিত তেওঁ প্ৰথমটো আইটেম নম্বৰ কৰিছিল৷^৮

মাহী গিলৰ আগন্তুক ৱেব ধাৰাবাহিক, '১৯৬২ দ্য ৱাৰ ইন দ্য হিলছ'। মহেশ মঞ্জৰেকাৰৰ পৰিচালনাত এই ধাৰাবাহিকখন নিৰ্মাণ হৈ আছে। এই ধাৰাবাহিকখনত অভিনেতা অভয় দেউল, সুমিত ব্যাস, আকাশ থোছাৰে অভিনয় কৰিছে৷^৯

ব্যক্তিগত জীৱন

তেওঁ বৰ্তমান তেওঁৰ প্ৰেমিকৰ সৈতে গোৱাত থাকে আৰু তেওঁৰ এগৰাকী কন্যা সন্তান আছে; তাইৰ নাম ভেৰ’নিকা।^১০ ২০২৩ চনত, তেওঁ তেওঁৰ সংগী ৰবি কেশৰৰ সৈতে বিবাহপাশত আবদ্ধ হোৱাটো নিশ্চিত কৰিছিল।^১১

চলচ্চিত্ৰপুঞ্জী

চলচ্চিত্ৰ

ৱেব ধাৰাবাহিক

বঁটা আৰু মনোনয়ন

ফিল্মফেয়াৰ বঁটা

• ২০১০: শ্ৰেষ্ঠ অভিনেত্ৰী (সমালোচক); দেৱ.ডি^৩৮
• ২০১২: শ্ৰেষ্ঠ অভিনেত্ৰী; চাহেব, বিৱি ঔৰ গেংষ্টাৰ (মনোনীত)^৩৯

স্ক্ৰীণ বঁটা

• ২০১০: মʼষ্ট প্ৰমিছিং নিউকামাৰ – ফিমেল; দেৱ.ডি ^৪০

আইফা বঁটা

• ২০১০: আইফা ষ্টাৰ নৱাগতৰ বঁটা; দেৱ.ডি^৪১৪২
• ২০১০: শ্ৰেষ্ঠ অভিনেত্ৰী; দেৱ ডি (মনোনীত)^৪৩
• ২০১২: শ্ৰেষ্ঠ অভিনেত্ৰী; চাহেব বিৱি ঔৰ গেংষ্টাৰ (মনোনীত)^৪৪

বিগ ষ্টাৰ এণ্টাৰটেইনমেণ্ট বঁটা

• ২০১৩: ৰোমাঞ্চকৰ ছবিৰ সৰ্বাধিক মনোৰঞ্জনদায়ক অভিনয় শিল্পী – মহিলা; চাহেব, বিৱি ঔৰ গেংষ্টাৰ ৰিটাৰ্ণছ ^৪৫