ভাৰতী সিং

ভাৰতী সিং (Bharati Singh,(জন্ম ৩ জুলাই ১৯৮৪)^১ এজন ভাৰতীয় কমেডিয়ান আৰু টেলিভিছন ব্যক্তিত্ব। সিঙে অসংখ্য কমেডী শ্ব’ সৃষ্টি কৰাৰ লগতে বিভিন্ন বঁটা-প্ৰদান অনুষ্ঠানত ঘোষক হিচাপে দায়িত্ব পালন কৰিছে। ৰিয়েলিটি শ্ব' ঝলক দিখলা জা ৫ (২০১২), নাচ বালিয়ে ৮^২ (২০১৭), আৰু ভয় কাৰক: খাট্ৰন কে খিলাদি ৯^৩ (২০১৯)ত তেওঁ অংশগ্ৰহণ কৰিছিল। ২০১৯ চনত তেওঁৰ স্বামী হৰ্শ লিম্বাচিয়াই কালাৰছ টিভিৰ বাবে সৃষ্টি কৰা শ্ব’ খটৰা খটৰা খটৰাত ভাৰতীয়ে অভিনয় কৰিছিল। ২০১৬ চনৰ পৰা সিং ফৰ্বছ ইণ্ডিয়াৰ চেলিব্ৰিটি ১০০ৰ তালিকাত স্থান লাভ কৰিছে।

প্ৰাৰম্ভিক জীৱন

১৯৮৪ চনৰ ৩ জুলাইত পঞ্জাৱৰ অমৃতসৰত এটা পাঞ্জাবী পৰিয়ালত ভাৰতীৰ জন্ম হয়।^৪৫ সিঙৰ পিতৃ-মাতৃ দুয়োজনেই পঞ্জাৱৰ, পিতৃৰ বংশ নেপালৰ।^৬ তেওঁৰ দুবছৰ বয়সত দেউতাকৰ মৃত্যু হয়। সিঙৰ দুজন ডাঙৰ ভাই-ভনী আছে, এজন ভাতৃ আৰু এগৰাকী ভগ্নী।^৭ অমৃতসৰৰ বি বি কে ডি এ ভি কলেজ ফৰ ৱমেনৰ পৰা ভাৰতীয়ে স্নাতক ডিগ্ৰী লাভ কৰে।^৮

কেৰিয়াৰ

ভাৰতী ষ্টাৰ ৱানৰ ষ্টেণ্ড-আপ কমেডী ৰিয়েলিটি ছিৰিজ দ্য গ্ৰেট ইণ্ডিয়ান লাফটাৰ চেলেঞ্জৰ দ্বিতীয় ৰানাৰ্ছ আপ আছিল, য'ত তেওঁ লল্লী নামৰ শিশু চৰিত্ৰটোৰ বাবে সমালোচকৰ প্ৰশংসা লাভ কৰিছিল।^৯ ইয়াৰ পিছত কমেডী চাৰ্কাছত প্ৰতিযোগী হিচাপে অংশ লয়। তেওঁ কৃষ্ণা অভিষেকৰ সৈতে কমেডী নাইটছ বচাও অনুষ্ঠানৰ সহ-ঘোষক আছিল।^১০

২০১১ চনত ষ্টাৰ প্লাছৰ টিভি ধাৰাবাহিক প্যাৰ মেই টুইষ্টত অভিনয় কৰে আৰু পিছলৈ ২০১২ চনৰ চেলিব্ৰিটি ডান্স ৰিয়েলিটি শ্ব' ঝলক দিখলা জা ৫ত প্ৰতিযোগী হিচাপে অভিনয় কৰে।^১০১১ ২০১২ চনত তেওঁ ষ্টাৰ প্লাছত প্ৰিমিয়াৰ হোৱা টেলিভিছন শ্ব' ছৌ ছাল চিনেমা কেৰ আয়োজক আছিল৷ তেওঁৰ সতীৰ্থ আছিল কৰণ টেকাৰ, ৰাগিনী খান্না আৰু শ্ৰুতি উলফাট।^৯ তেওঁ মাষ্টাৰচেফ ইণ্ডিয়াত অতিথি হিচাপে অংশ লৈছিল৷^১১১২

২০১৪ চনৰ পৰা ২০১৬ চনলৈকে তেওঁ ইণ্ডিয়াজ গট টেলেণ্টৰ ৫ৰ পৰা ৭ম ছিজন আয়োজন কৰিছিল।^৯ ২০১৭ চনত হৰ্শ লিম্বাচিয়াৰ সৈতে ষ্টাৰ প্লাছৰ নাচ বালিয়ে ৮ত অংশগ্ৰহণ কৰে আৰু ষষ্ঠ স্থান লাভ কৰে।^১০ ২০১৮ চনত তেওঁ ৰিয়েলিটি শ্ব' ডান্স ডিৱান আৰু বিগ বছ ১২ত অতিথি হিচাপে অভিনয় কৰে৷^১৩ সেই বছৰতে তেওঁ ইণ্ডিয়াজ গট টেলেণ্ট ৮ৰ হোষ্ট হিচাপে প্ৰত্যাৱৰ্তন কৰে আৰু চ'নী টিভিৰ কমেডী শ্ব' দ্য কপিল শৰ্মা শ্ব'ত তিতলী যাদৱৰ চৰিত্ৰত অভিনয় কৰে।^১৪ ২০১৯ চনত হাৰ্ছ লিম্বাচিয়াৰ সৈতে কালাৰছ টিভিত ফিয়াৰ ফেক্টৰ: খাট্ৰন কে খিলাদি ৯ত অংশগ্ৰহণ কৰে।^১৫

২০২০ চনত ভাৰতীয়ে হৰ্ষ লিম্বাচিয়াৰ সৈতে চ'নী টিভিৰ ভাৰতৰ শ্ৰেষ্ঠ নৃত্যশিল্পী আৰু কালাৰ্ছ টিভিৰ হাম তুম ঔৰ কোৱাৰেণ্টাইনৰ আয়োজন কৰে।^১৬তেওঁ ফিয়েৰ ফেক্টৰ: খট্ৰো কে খিলাড়ি – মেড ইন ইণ্ডিয়াত অংশগ্ৰহণ কৰিছিল আৰু চতুৰ্থ ৰানাৰ্ছ আপ হিচাপে আত্মপ্ৰকাশ কৰিছিল।^১৭

২০২২ চনত তেওঁ হাৰ্ছ লিম্বাচিয়াৰ সৈতে কালাৰ্ছ টিভিৰ শ্ব' হুনাৰবাজ: দেশ কি শ্বান আয়োজন কৰে।^১৮

২০২৪ চনত তেওঁ কালাৰ্ছ টিভিৰ লাফটাৰ চেফ নামৰ অনুষ্ঠানটোত জড়িত হৈ পৰে যিয়ে দৰ্শকৰ মাজত যথেষ্ট জনপ্ৰিয়তা লাভ কৰে।^১৯

ব্যক্তিগত জীৱন

২০১৭ চনৰ ৩ ডিচেম্বৰত সিঙে কেইবছৰমান প্ৰেমৰ সম্পৰ্ক স্থাপন কৰাৰ পিছত লেখক হৰ্ষ লিম্বাচিয়াৰ সৈতে বিবাহপাশত আবদ্ধ হয়।

সিঙে ধনুৰ্বিদ আৰু পিষ্টল গুলীচালনাৰ ক্ষেত্ৰত ৰাষ্ট্ৰীয় পৰ্যায়ত স্থান লাভ কৰিছে।^২০

২০২০ চনৰ ২১ নৱেম্বৰত নাৰ্কটিক কণ্ট্ৰল ব্যুৰোৱে ভাৰতীৰ বাসগৃহত তালাচী চলাই ৮৬.৫ গ্ৰাম ভাং উদ্ধাৰ কৰে। তেওঁক আৰু তেওঁৰ স্বামীক সোধা-পোছাৰ বাবে লৈ যোৱা হয় আৰু পিছত তেওঁলোকক ব্যুৰোৱে গ্ৰেপ্তাৰ কৰে।^{২১২২২৩} দুদিনীয়া জেৰাৰ অন্তত ২০২০ চনৰ ২৩ নৱেম্বৰত তেওঁলোকক জামিন দিয়া হয়।^২৪

২০২২ চনৰ ৩ এপ্ৰিলত এই দম্পতীৰ প্ৰথম সন্তান লক্ষ সিং লিম্বচিয়া ওপজে৷^২৫ তেওঁৰ ঘৰুৱা নাম গোল্লা^২৬