তনুশ্ৰী চক্ৰৱৰ্তী

তনুশ্ৰী চক্ৰৱৰ্তী (Tanusree Chakraborty; জন্ম: ৬ আগষ্ট ১৯৮৪) এগৰাকী ভাৰতীয় অভিনেত্ৰী আৰু মডেল যিয়ে প্ৰধানকৈ বঙালী ভাষাৰ চলচ্চিত্ৰত কাম কৰে।^১২৩

চলচ্চিত্ৰৰ সমান্তৰালকৈ তেওঁ বিভিন্ন টেলিভিছন শ্ব’তো কাম কৰি আহিছে। শেহতীয়াকৈ তেওঁ জি বাংলা চেনেলত সম্পূৰ্ণা নামৰ এটা সৌন্দৰ্য্য আৰু জীৱনশৈলী সম্পৰ্কীয় অনুষ্ঠানৰ আয়োজক হিচাপে কাম কৰিছে। তনুশ্ৰী চক্ৰৱৰ্তীয়ে ২০২১ চনত ভাৰতীয় জনতা পাৰ্টীত যোগদান কৰে,^৪৫ আৰু ২০২১ চনৰ পশ্চিম বংগ বিধানসভাৰ নিৰ্বাচনত শ্যামপুৰ বিধানসভা সমষ্টিৰ পৰা প্ৰতিদ্বন্দ্বিতা কৰে যদিও পৰাজিত হয়।^৬ কলকাতাত তেওঁৰ দুখন ৰেষ্টুৰেণ্ট আছে।^৭

প্ৰাৰম্ভিক জীৱন

১৯৮৪ চনৰ ৬ আগষ্টত হায়দৰাবাদৰ বঙালী পৰিয়াল এটিত জন্মগ্ৰহণ কৰা চক্ৰৱৰ্তী কলকাতাৰ কমলা গাৰ্লছ হাইস্কুলৰ ছাত্ৰী আছিল। পিছলৈ তেওঁ কলিকতা বিশ্ববিদ্যালয়ৰ অন্তৰ্গত বাসন্তী দেৱী মহাবিদ্যালয়ত ৰাজনীতি বিজ্ঞান অধ্যয়ন কৰে।^৮

কৰ্মজীৱন

স্কুলীয়া শিক্ষা সাং কৰি চক্ৰৱৰ্তীয়ে মডেল হিচাপে কাম কৰিবলৈ আৰম্ভ কৰে। সেই সময়ত মডেলিং কিহৰ দ্বাৰা গঠিত সেই বিষয়েও তেওঁৰ সম্পূৰ্ণ ধাৰণা নাছিল। স্বল্পসময়ৰ বাবে মডেল হিচাপে কাম কৰাৰ লগতে তেওঁ অনেক বিজ্ঞাপনতো অভিনয় কৰিছিল। যাৰ ভিতৰত এটি আছিল প্ৰাণ পাউডাৰ স্পাইচৰ বাংলাদেশী বিজ্ঞাপন যিটো দুয়োখন বংগতে অতি জনপ্ৰিয় আছিল। ২০১১ চনত, উড়ো চিঠি নামৰ ছবিখনত অভিনয়েৰে তেওঁ অভিনেত্ৰী ৰূপে নজৰলৈ আহে।^৮ বেডৰুম (২০১২), অভিশপ্ত নাইটি (২০১৪), উইণ্ডো কানেকচনছ (২০১৪), বুনো হাঁস (২০১৪) আদি বঙালী চলচ্চিত্ৰসমূহত অভিনয়েৰে তেওঁ জনপ্ৰিয়তা লাভ কৰে।

চলচ্চিত্ৰপুঞ্জী

ৰিয়েলিটি শ্ব'

• দিদি নং ১ (২০১০) জি বাংলা
• এবাৰ জলছা ৰান্নাঘৰে (২০১৫) ষ্টাৰ জলছা

লগতে চাওক

• ঊষসী চক্ৰৱৰ্তী