টিপাম

টিপাম বা তিপাম অসমৰ ডিব্ৰুগড় জিলাৰ নাহৰকটীয়া মহকুমাৰ টিপাম ফাকিয়াল গাঁও পঞ্চায়তৰ এখন ঐতিহাসিক গাঁও। ডিন বুৰঞ্জীৰ মতে টিপামক অসম ৰাজ্য বা মুং দুন চুন খামৰৰ দ্বিতীয় ৰাজধানী। ঐতিহাসিকভাৱে টিপামৰ নাম ১২২৮ খ্ৰীষ্টাব্দৰ পৰাই লিপিবদ্ধ হৈ আছে। আহোম বুৰঞ্জী অনুসৰি স্বৰ্গদেউ চাওল্যুং চুকাফাই চীনৰ দেহং দাই (পূব মুঙ মাও) ত্যাগ কৰি এখন নতুন ৰাজ্যৰ সপোন বুকুত বান্ধি ১৫ বছৰ কাল বিভিন্ন ঠাই ঘূৰি ফুৰিছিল। তাৰ পাছত পৰ্বত পাৰ হৈ বুঢ়ীদিহিঙৰ উত্তৰ পাৰৰ টিপাম দেওশালী পাহাৰৰ সুউচ্চ টিলা চকমকত উপস্থিত হৈ তিনি বছৰ কাল টিপামত আছিল।

ইতিহাস

মধ্যযুগীয় বৰ অসমৰ প্ৰথমজন চাওফা তথা টাই ৰাজ্য মৌঙ মাওৰ চাং বংশীয় চ্যু ফৈদৰ ৰাজকোঁৱৰ চ্যু-কা-ফা^১ আহোম ৰাজ্যৰ প্ৰতিষ্ঠাপক আছিল। মং মাও^২ৰ শান ৰাজকুমাৰ চুকাফাই পাটকাই পাৰ হৈ আহি ১২২৮ খ্ৰীষ্টাব্দৰ আঘোণ মাহৰ ১৬ অৰ্থাৎ ২ ডিচেম্বৰ তাৰিখে চুকাফাই সৌমাৰপীঠৰ টিপামত বুঢ়ীদিহিঙেৰে উজাই আহি উপস্থিত হয় আৰু ইয়াতেই তেওঁ নতুন এখন স্বাধীন ৰাষ্ট্ৰৰ সোপান ৰচনা কৰিছিল। তেওঁ ইয়াত তিনিবছৰ কাল কটাই দিহিং নৈৰ বানপানীয়ে আমনি কৰাত অভয়াপুৰলৈ ভটিয়াই গৈছিল।

জন গাঁথনি

গাঁৱৰ মুঠ ভৌগোলিক মাটিকালি হৈছে ১৮৬.৬৪৮ হেক্টৰ। টিপাম গাঁৱৰ মুঠ জনসংখ্যা ৭৮৭ জন। ইয়াৰে পুৰুষ ৪০৪জন আৰু মহিলা ৩৮৩ গৰাকী। টিপাম গাঁৱত প্ৰায় ১৩২টা ঘৰ আছে।