মৃদুলা ভাটকাৰ

মৃদুলা ভাটকাৰ (Mridula Bhatkar; জন্ম ২৮ মে' ১৯৫৭) ভাৰতৰ মহাৰাষ্ট্ৰৰ বম্বে উচ্চ ন্যায়ালয়ৰ প্ৰাক্তন ন্যায়াধীশ। তেওঁ ২০০৯ চনৰ পৰা ২০১৯ চনলৈকে ন্যায়ালয়ত কাৰ্যনিৰ্বাহ কৰিছিল।

ন্যায়াধীশ হিচাপে কৰ্মৰত হৈ থকা সময়ছোৱাত তেওঁ জলগাঁও ধৰ্ষণ গোচৰ, ২০০৬ চনৰ মুম্বাই ৰেল বোমা বিস্ফোৰণ, ২০০২ চনত বিলকিছ বানোৰ দলবদ্ধ ধৰ্ষণত গুজৰাট আৰক্ষী বিষয়া আৰু চিকিৎসকক দোষী সাব্যস্ত কৰাকে ধৰি কেইবাটাও উল্লেখযোগ্য গোচৰৰ বিচাৰ কৰিছিল।^১২৩

কৰ্মজীৱন

ভাটকাৰে ১৯৮২ চনত মহাৰাষ্ট্ৰ আৰু গোৱাৰ বাৰ কাউন্সিলত নামভৰ্তি কৰি মহাৰাষ্ট্ৰৰ পুনেত আইন চৰ্চা কৰিছিল। ১৯৯০ চনৰ পৰা ১৯৯২ চনৰ ভিতৰত তেওঁ পুনেৰ আই এল এছ আইন মহাবিদ্যালয়ৰ অতিথি অধ্যাপক সদস্য আছিল আৰু লগতে সাবিত্ৰীবাই ফুলে পুনে বিশ্ববিদ্যালয়ৰ সাংবাদিকতা বিভাগতো আইন আৰু সংবাদ মাধ্যমৰ পাঠ্যক্ৰম অধ্যাপনা কৰিছিল।^২

১৯৯৩ চনৰ ২১ এপ্ৰিলত মুম্বাইত দেৱানী আৰু অধিবেশন ন্যায়াধীশ হিচাপে তেওঁ নিযুক্তি লাভ কৰে, আৰু পিছলৈ মহাৰাষ্ট্ৰৰ কলহাপুৰতো প্ৰধান ন্যায়াধীশ হিচাপে কাৰ্যনিৰ্বাহ কৰে। ২০০৮ চনত বোম্বাই উচ্চ ন্যায়ালয়ৰ পঞ্জীয়ক প্ৰধান হিচাপে তেওঁ নিযুক্তি লাভ কৰে আৰু ২০০৯ চনৰ ১০ ফেব্ৰুৱাৰীত বম্বে উচ্চ ন্যায়ালয়ৰ অতিৰিক্ত ন্যায়াধীশ নিযুক্তি নোপোৱালৈকে সেই পদত কাৰ্যনিৰ্বাহ কৰে।^৪২০১৯ চনৰ ২৭ মে’ত তেওঁ ন্যায়িক সেৱাৰ পৰা অৱসৰ গ্ৰহণ কৰে।^২

গুৰুত্বপূৰ্ণ ৰায়দান

পৰিয়াল আইন সম্পৰ্কীয় ৰায়দান

২০১১ চনত ভাটকাৰে জৈন ধৰ্মৰ এজন সদস্যই দাখিল কৰা গোচৰৰ শুনানি গ্ৰহণ কৰিছিল। যিয়ে যুক্তি দিছিল যে তেওঁৰ ৮ বছৰীয়া সন্তানে স্বেচ্ছাই বৈবাহিকতা আৰু আধ্যাত্মিকতাৰ ধৰ্মীয় ব্ৰত লৈছে। কিন্তু শিশু কল্যাণ সমিতিয়ে শিশুটিৰ শাৰীৰিক আৰু মানসিক স্বাস্থ্যক লৈ উদ্বেগ প্ৰকাশ কৰে।^৫৬৭

২০১২ চনত ভাটকাৰে ৰায় দিছিল যে আন পৰিয়ালে দত্তক লোৱা শিশুৰ জৈৱিক পিতৃ-মাতৃৰ পৰা সম্পত্তিৰ উত্তৰাধিকাৰী হোৱাৰ কোনো আইনী দাবী নাই৷^৮৯

অপৰাধমূলক আইন সম্পৰ্কীয় ৰায়দান

ভাৰতৰ ফৌজদাৰী আইন সম্পৰ্কীয় কেইবাটাও উল্লেখযোগ্য গোচৰত ভাটকাৰে ৰায়দান দিছে। ২০১০ চনত তেওঁ মহাৰাষ্ট্ৰ সংগঠিত অপৰাধ নিয়ন্ত্ৰণ আইনৰ অধীনত চোৰাংচোৱা আৰু জেৰাৰ অনুমোদন পৰীক্ষা কৰিবলৈ পৰ্যালোচনা সমিতি গঠন বিচৰা আবেদনৰ অনুমতি দিবলৈ অস্বীকাৰ কৰিছিল৷ তেওঁ কৈছিল যে এইটো এটা "আদৰণীয় পদক্ষেপ" হ'ব যদিও এয়া ৰাজ্য চৰকাৰৰ পদক্ষেপহে, আদালতৰ নহয়।^১০

২০১৭ চনৰ ১২ জানুৱাৰীত ভাটকাৰে পুনে টেচি হত্যাকাণ্ডৰ গোচৰত হিন্দু উগ্ৰপন্থী গোট হিন্দু ৰাষ্ট্ৰ সেনাৰ তিনিজন লোকক জামিন প্ৰদান কৰে। ভাটকাৰে ৰায় দিয়ে যে তিনিওজন আক্ৰমণকাৰীক ধৰ্মীয় কাৰণত, হিন্দু ৰাষ্ট্ৰ সেনাৰ নেতাসকলে আক্ৰমণ কৰিবলৈ উচটনি দিছিল৷ যিয়ে তেওঁলোকৰ জামিন প্ৰদানৰ নিৰ্দেশটোক ন্যায্যতা প্ৰদান কৰিছে। এই ৰায়দানক বহুলভাৱে সমালোচনা কৰা হৈছিল৷ ভাৰতৰ উচ্চতম ন্যায়ালয়ে ইয়াক পুনৰীক্ষণ কৰি আছে।^{১১১২১৩}

২০১৮ চনত তেওঁ মহাৰাষ্ট্ৰ আৰক্ষীক তিৰস্কাৰ কৰিছিল যে আৰক্ষীয়ে ২০১৮ চনৰ ভীমা কোৰেগাঁও হিংসাৰ পিছত গ্ৰেপ্তাৰ হোৱা ব্যক্তিৰ বিৰুদ্ধে চলি থকা গোচৰৰ সম্পৰ্কত সংবাদ মাধ্যমৰ আগত তথ্য ফাদিল কৰিছিল।^১৪ ভাটকাৰে সাংবাদিক গৌৰী লংকেশক হত্যা কৰাৰ অভিযোগত অভিযুক্ত ব্যক্তিসকলক কৰ্ণাটকৰ পৰা মহাৰাষ্ট্ৰলৈ বদলি কৰাৰ অনুমতি প্ৰদান কৰে, যাতে পণ্ডিত-কৰ্মী নৰেন্দ্ৰ ডাভোলক আৰু গোবিন্দ পানছাৰেৰ হত্যাকাণ্ডৰ সম্পৰ্কত জেৰা কৰিব পৰা যায়।^১৫

যৌন হিংসা সম্পৰ্কীয় ৰায়দান

যৌন কাৰ্য্যত সন্মতি নিয়ন্ত্ৰিত আইনখনৰ প্ৰতিও ভাটকাৰে উল্লেখযোগ্য ৰায়দান কৰিছে। ২০১৫ চনত ভাটকাৰে ১৫ বছৰীয়া নাবালক ছোৱালী এজনীক যৌন নিৰ্যাতন চলোৱাৰ অভিযোগত অভিযুক্ত ২০ বছৰীয়া এজন যুৱকক জামিন প্ৰদান কৰে৷ তেওঁৰ মতে এই সম্পৰ্কটো সন্মতিসূচক, যিয়ে জামিনৰ ন্যায্যতা প্ৰদান কৰে।^১৬

২০০২ চনৰ গুজৰাটৰ ঘটনাৰ সময়ত বিলকিস বানোৰ বিৰুদ্ধে সংঘটিত হোৱা দলবদ্ধ ধৰ্ষণ আৰু পৰিয়ালক হত্যা কৰাৰ অপৰাধত দোষী সাব্যস্ত হোৱা এঘাৰজন লোকক দিয়া আজীৱন কাৰাদণ্ড বাহাল ৰাখি বিলকিছ বানোৱে দাখিল কৰা এটা গোচৰত ভাটকাৰে ৰায় দান দিছিল। ন্যায়াধীশ ভি কে তাহিলমণিৰ সৈতে তেওঁ কয় যে গুজৰাট আৰক্ষীয়ে ইচ্ছাকৃতভাৱে বানোৰ অভিযোগ লিপিবদ্ধ কৰাত ব্যৰ্থ হৈছে আৰু তদন্তত সক্ৰিয়ভাৱে বাধা দিয়াৰ ক্ষেত্ৰতো তেওঁলোক সহযোগী। দোষী সাব্যস্ত হোৱা লোকসকলৰ ভিতৰত আছিল ৬ জন আৰক্ষী। উচ্চতম ন্যায়ালয়ে তেওঁলোকৰ নিৰ্দেশক সমৰ্থন কৰে, আৰু গুজৰাট চৰকাৰক বানোক ক্ষতিপূৰণ দিবলৈ নিৰ্দেশ দিয়ে।^৩১৭

ব্যক্তিগত জীৱন

ভাটকাৰে পুনে বিশ্ববিদ্যালয়ৰ পৰা কলা শাখাত স্নাতক ডিগ্ৰী লাভ কৰাৰ লগতে একেটা শিক্ষানুষ্ঠানৰ পৰা আইন বিভাগৰ ডিগ্ৰী লাভ কৰে৷ তেওঁ সাংবাদিকতাত স্নাতকোত্তৰ ডিগ্ৰী লাভ কৰে।^২ তেওঁৰ স্বামী ৰমেশ ভাটকাৰ আছিল মাৰাঠী ছবি, টিভি, মঞ্চ অভিনেতা৷ তেওঁৰ ২০১৯ চনৰ ফেব্ৰুৱাৰী মাহত মৃত্যু হয়৷ তেওঁলোকৰ এজন পুত্ৰ আছে।^১৮১৯