ভাৰতৰ ধ্ৰুপদী ভাষা

ভাৰতৰ ধ্ৰুপদী ভাষা বা শাস্ত্ৰীয় ভাষা বুলিলে প্ৰাচীন, মূল্যৱান, মৌলিক আৰু সুকীয়া সাহিত্যিক ঐতিহ্য থকা ভাৰতীয় ভাষাসমূহক বুজায়৷^১ ভাৰত চৰকাৰে এঘাৰটা ভাষাক ভাৰতৰ ধ্ৰুপদী ভাষা হিচাপে স্বীকৃতি দিছে।^২ ২০০৪ চনত ভাৰত চৰকাৰে ঘোষণা কৰে যে কিছুমান কঠোৰ আৰু নিৰ্দিষ্ট মানদণ্ড পূৰণ কৰা ভাষাসমূহক ভাৰতৰ ধ্ৰুপদী ভাষা" হিচাপে স্বীকৃতি দিয়া হ'ব।^৩ এই নীতিক সাংস্কৃতিক মন্ত্ৰালয়ে ভাষা বিশেষজ্ঞ সমিতিৰ সৈতে প্ৰতিষ্ঠা কৰিছিল। এই সমিতিখন ভাৰত চৰকাৰৰ দ্বাৰা গঠন কৰা হৈছিল যাতে পৰম্পৰাগত ভাষাসমূহক শ্ৰেণীবিভাজনৰ দাবীসমূহ বিবেচনা কৰিব পৰা যায়।

চৰ্তসমূহ

২০০৪ চনত, “ধ্ৰুপদী ভাষা’’ৰ প্ৰাচীন কালৰ প্ৰাৰম্ভিক মানদণ্ড কমেও ১০০০ বছৰীয়া বুলি ধৰা হৈছিল।^৩

সংশ্লিষ্ট কৰ্তৃপক্ষই চৰ্তসমূহ সময়ে সময়ে সলনি কৰি আহিছে৷

২০০৪ চনত চৰ্তসমূহ

তামিল ভাষাক ধ্ৰুপদী ভাষাৰ মৰ্যাদা দিয়াৰ সময়ত ভাৰত চৰকাৰে তলৰ চৰ্তসমূহ উপস্থাপন কৰিছিল^৪

১. প্ৰাৰম্ভিক লেখাসমূহৰ প্ৰাচীনত্ব/প্ৰামাণিক ইতিহাস যি কমেও ১০০০ বছৰ পুৰণি। ২. প্ৰাচীন সাহিত্য তথা লেখাৰ সমল যাক বহু প্ৰজন্মই বছৰ বছৰ ধৰি ঐতিহ্য হিচাপে গণ্য কৰি আহিছে৷ ৩. লিখন সাহিত্যৰ ইতিহাস, যি সম্পূৰ্ণ নিজা আৰু কাৰোপৰা আমদানি কৰা নহয়৷^৪

২০০৫ চনত চৰ্তসমূহ

সংস্কৃত ভাষাক ধ্ৰুপদী ভাষাৰ মৰ্যাদা দিয়াৰ সময়ত ভাৰত চৰকাৰে তলৰ চৰ্তসমূহ দাঙি ধৰিছিল:

১. প্ৰাৰম্ভিক লেখাসমূহৰ প্ৰাচীনত্ব/প্ৰামাণিক ইতিহাস যি কমেও ১০০০-১৫০০ বছৰ পুৰণি। ২. প্ৰাচীন সাহিত্য তথা লেখাৰ সমল যাক বহু প্ৰজন্মই বছৰ বছৰ ধৰি ঐতিহ্য হিচাপে গণ্য কৰি আহিছে ৷ ৩. লিখন সাহিত্যৰ ইতিহাস, যি সম্পূৰ্ণ নিজা আৰু কাৰোপৰা আমদানি কৰা নহয় ৷ ৪. প্ৰাচীন ৰূপটো আৰু সাহিত্যখিনি বৰ্তমানৰ আধুনিক ৰূপতকৈ বেলেগ/পৃথক, তাৰোপৰি সম্ভৱতঃ ইয়াৰ প্ৰাচীন ৰূপটো আৰু ইয়াৰ বৰ্তমানৰ আধুনিক ৰূপ তথা অপভ্ৰংশ/উপভাষা আদিৰ মাজত ধাৰাবাহিকতাৰ বিচ্ছিন্নতা ৷^৪

প্ৰাচীনত্বৰ চৰ্তটো ১০০০ৰ পৰা ১০০০-১৫০০ বছৰলৈ বৃদ্ধি কৰা হৈছিল। তেলুগু ভাষা, কন্নড় ভাষা, মালয়ালম ভাষা আৰু ওড়িয়াক বাছনি কৰাৰ সময়তো এইকেইটা চৰ্তই বাহাল আছিল।^৪

২০২৪ চনৰ চৰ্তসমূহ

সাহিত্য অকাডেমিয়ে তলৰ চৰ্তসমূহ ৰাখিছিল;^৪

১. প্ৰাৰম্ভিক লেখাসমূহৰ প্ৰাচীনত্ব/প্ৰামাণিক ইতিহাস যি কমেও ১০০০-১৫০০ বছৰ পুৰণি। ২. প্ৰাচীন সাহিত্য তথা লেখাৰ সমল যাক বহু প্ৰজন্মই বছৰ বছৰ ধৰি ঐতিহ্য হিচাপে গণ্য কৰি আহিছে৷ ৩. পদ্য, শিলালিপি বা তাম্ৰলিপি আদিৰ প্ৰমাণ আৰু পদ্যৰ লগতে ঘাইকৈ গদ্যৰ জ্ঞানসমৃদ্ধ পাঠ্য। ৪. প্ৰাচীন ৰূপটো আৰু সাহিত্যখিনি বৰ্তমানৰ আধুনিক ৰূপতকৈ পৃথক, তাৰোপৰি সম্ভৱতঃ ইয়াৰ প্ৰাচীন ৰূপটো আৰু ইয়াৰ বৰ্তমানৰ আধুনিক ৰূপ তথা অপভ্ৰংশ/উপভাষা আদিৰ মাজত ধাৰাবাহিকতাৰ বিচ্ছিন্নতা৷^৪

মৌলিকত্ব আৰু অন্য ভাষাৰ সাহিত্যৰ পৰা ধাৰ কৰা চৰ্তটো নতুন নিয়মসমূহত আঁতৰাই দিয়া হয়।^৪

লাভ

শৈক্ষিক সুবিধা

ভাৰত চৰকাৰৰ ২০০৪ চনৰ ১ নৱেম্বৰৰ No. 2-16/2004-US (Akademies) নম্বৰৰ প্ৰস্তাৱ অনুসৰি, "ধ্ৰুপদী ভাষা" হিচাপে ঘোষণা কৰা এটা ভাষাৰ সুবিধা হ'বঃ^৫

1. ধ্ৰুপদী ভাৰতীয় ভাষাৰ প্ৰসিদ্ধ পণ্ডিতসকলৰ বাবে প্ৰতি বছৰে দুটা মুখ্য আন্তঃৰাষ্ট্ৰীয় বঁটা প্ৰদান কৰা হ'ব।
2. ধ্ৰুপদী ভাষাৰ অধ্যয়নৰ বাবে এক উৎকৃষ্ট কেন্দ্ৰ স্থাপন কৰা হ'ব।
3. আৰম্ভণিতে অন্ততঃ কেন্দ্ৰীয় বিশ্ববিদ্যালয়সমূহত ধ্ৰুপদী ভাৰতীয় ভাষাৰ প্ৰসিদ্ধ শিক্ষাৰ্থীসকলৰ বাবে নিৰ্দিষ্ট সংখ্যক বিশিষ্ট আসন মুকলি কৰিবলৈ বিশ্ববিদ্যালয় অনুদান আয়োগক অনুৰোধ কৰা হ'ব।^৬

নিযুক্তিৰ সুবিধা

ধ্ৰুপদী ভাষা হিচাপে স্বীকৃতি পালে ঘাইকৈ শৈক্ষিক আৰু গৱেষণা ক্ষেত্ৰত নিযুক্তিৰ সুবিধা হ'ব। লগতে অভিলখন, অনুবাদ, প্ৰকাশ আৰু ডিজিটেল মিডিয়াৰ লগত জড়িত লোকসকলেও এই ভাষাবোৰৰ প্ৰাচীন পাঠ্যৰ সংৰক্ষণ, নথিকৰণ আৰু ডিজিটাইজেচনত নিযুক্তিৰ সুবিধা লাভ কৰিব।^৪

চৰকাৰীভাৱে স্বীকৃত ধ্ৰুপদী ভাষাসমূহ

লগতে চাওক

• ভাৰতৰ শাস্ত্ৰীয় নৃত্য
• ভাৰতীয় ধ্ৰুপদী সংগীত