ধীৰেন্দ্ৰ নাথ পাল

ধীৰেন্দ্ৰ নাথ পাল (Dhirendra Nath Paul) অসম ৰাজ্যৰ ধুবুৰী জিলাৰ আশাৰীকন্দি গাঁৱৰ এগৰাকী টেৰাকোটা (মৃৎশিল্প) শিল্পী। তেখেতৰ কৰ্মৰাজিৰ বাবে ২০২৫ চনত অসম চৰকাৰে "অসম গৌৰৱ বঁটা" প্ৰদান কৰে।^{১ ২৩৪}

প্ৰাৰম্ভিক জীৱন আৰু জন্ম

১৯৪৫ চনত পূৰ্ব বংগ (বৰ্ত্তমান বাংলাদেশ)ৰ পাবনা জিলাত কুঞ্জলাল আৰু সৰলা বালাৰ ঘৰত তেখেতৰ জন্ম হয়। তেখেতৰ যেতিয়া মাত্ৰ ২ মাহ বয়স হৈছিল তেতিয়া পিতৃ-মাতৃৰ সৈতে অসমলৈ আহিছিল। প্ৰথমাবস্থাত তেখেতৰ পৰিয়ালে নগাঁৱ জিলাত থিতাপি ললেও শেষত গৈ ধুবুৰীৰ আশাৰীকন্দিত নিগাজিকৈ থাকিবলৈ লয়।^১ পালদেৱে মাত্ৰ ১০ বছৰ বয়সতে টেৰাকোটা শিল্পৰ জগত খনত খোজ পেলাইছিল। তেখেতৰ প্ৰায় ৯ বছৰ সুপ্ৰচেষ্টাৰ কৰ্মৰাজিৰ বাবে ১৯ বছৰ বয়ষতেই টেৰাকোটা শিল্পী ৰূপে সুখ্যাতি লাভ কৰিছিল।^১

কেৰিয়াৰ

ধীৰেন্দ্ৰ নাথ পাল ১৯৭৫ চনত জিলা উদ্যোগ কেন্দ্ৰ আৰু নিখিল ভাৰত হস্তশিল্প আয়োগৰ সহযোগত পোন প্ৰথমে বণিজ্য মেলাত যোগদান কৰে। তাৰ পিছত ১৯৭৮ চনত মদ্ৰাছৰ (বৰ্ত্তমান চেন্নাই) ললিত কলা একাডেমীত হস্ত শিল্প (Demonstration Programme) ত যোগদান কৰে। ১৯৮২ চনত দিল্লীৰ প্ৰগতি ময়দানত আন্তৰ্জাতিক বণিজ্য মেলাত ধীৰেন্দ্ৰ নাথ পাল আৰু মাতৃ সৰলা বালাই যোগদান কৰে। এই বণিজ্য মেলাত টেৰাকোটা শিল্পী সৰলা বালা দেৱীক ৰাষ্ট্ৰীয় পুৰস্কাৰ প্ৰদান কৰে। ১৯৮৮ চনত ধীৰেন্দ্ৰ পালে ছাৰ্ক (SAARC) সন্মিলনত যোগদান কৰি মানপত্ৰ অৰ্জন কৰে। ১৯৮৪ চনত শিল্প প্ৰদৰ্শন কৰাৰ বাবে আমেৰিকাৰ নিউয়ৰ্ক চহৰলৈ আমন্ত্ৰিত হৈছিল যদিও বিশেষ অসুবিধাত যাব নোৱাৰিছিল। ১৯৮৭ চনত ইউৰোপ ভ্ৰমণৰ উপৰিও ছুইডেন, ডেনমাৰ্ক, জাৰ্মান ভ্ৰমণ কৰিছিল।