জয়া কিশোৰী

জয়া কিশোৰী (Jaya Kishori; জন্ম: ১৩ জুলাই ১৯৯৫) এগৰাকী ভাৰতীয় আধ্যাত্মিক বক্তা, গায়িকা, প্ৰেৰণাদায়ক বক্তা, জীৱন প্ৰশিক্ষক, আৰু আধ্যাত্মিক বক্তৃতা আৰু আত্মাস্পৰ্শী ভজনৰ বাবে পৰিচিত সমাজ সংস্কাৰক। তেওঁক ‘কিশোৰী জী’^১ আৰু ‘আধুনিক যুগৰ মীৰা’ বুলি কোৱা হয়।^২৩

ব্যক্তিগত জীৱন

১৯৯৫ চনৰ ১৩ জুলাইত ৰাজস্থানৰ সুজানগৰত গৌড় ব্ৰাহ্মণ পৰিয়ালত জয়া কিশোৰীয়ে জয়া শৰ্মা নামেৰে জন্মগ্ৰহণ কৰিছিল৷ তেওঁৰ চেতনা শৰ্মা নামৰ এগৰাকী ভগ্নী আছে।^৪ তেওঁৰ পিতৃ-মাতৃ শিৱশংকৰ শৰ্মা আৰু গীতা দেৱী হৰিৎপালে আধ্যাত্মিক শিক্ষা আৰু ধৰ্মীয় শিক্ষাৰে তেওঁক ডাঙৰ-দীঘল কৰিছিল, যাৰ ফলত তেওঁৰ আধ্যাত্মিকতাৰ প্ৰতি গভীৰ আগ্ৰহান্বিত হৈ উঠিছিল৷ সাত বছৰ বয়সৰ পৰাই তেওঁ আধ্যাত্মিক যাত্ৰা আৰম্ভ কৰিছিল।^৫

তেওঁলোকৰ পৰিয়ালটো কলিকতালৈ অহাৰ পিছত শ্ৰীশয়তন কলেজ আৰু মহাদেৱী বিৰলা ৱৰ্ল্ড একাডেমীত জয়া কিশোৰীয়ে স্কুলীয়া শিক্ষা সম্পূৰ্ণ কৰে।^৬৪

আধ্যাত্মিক যাত্ৰা

ন বছৰ বয়সৰ পৰাই কিশোৰীয়ে গীত গাবলৈ আৰম্ভ কৰে আৰু "লিংগাষ্টকম", "শিৱ তাণ্ডৱ স্তোত্ৰ", "মধুৰাষ্টক", "শিৱ পঞ্চক্ষৰ স্তোত্ৰ", "দৰিদ্ৰয় দহন শিৱ স্তোত্ৰ" আদি বিভিন্ন আধ্যাত্মিক গীত আয়ত্ত কৰে। গুৰুজী গোবিন্দ ৰাম মিশ্ৰৰ নিৰ্দেশনাত তেওঁ সুন্দৰকাণ্ড পাঠ, শ্ৰীমদ্ভাগৱত, আৰু অন্যান্য ধৰ্মীয় গ্ৰন্থ আবৃত্তি কৰিবলৈ আৰম্ভ কৰে। জটিল আধ্যাত্মিক ধাৰণাবোৰ সৰল কৰাৰ ক্ষমতাৰ জৰিয়তে তেওঁ সোনকালে অইনৰ দৃষ্টি আকৰ্ষণ কৰিছিল। গুৰুজনাই তেওঁক "কিশোৰী" উপাধি দিছিল, যিটো তেওঁৰ আধ্যাত্মিক পৰিচয়ৰ অবিচ্ছেদ্য অংগ হৈ পৰিছিল। জয়া কিশোৰীৰ খাতু শ্যাম জীৰ ওপৰত অটল বিশ্বাস আছে।^৭

আধ্যাত্মিক বক্তৃতা

কিশোৰী সাতদিনীয়া 'শ্ৰীমদ্ ভাগৱত কথা' আৰু তিনিদিনীয়া 'নানি বাই ৰো মায়ৰো' আধ্যাত্মিক বক্তৃতাৰ বাবে বিখ্যাত।^২ তেওঁৰ ইউটিউব চেনেলত ভক্তিমূলক বক্তৃতা, কীৰ্তন, ভজন আৰু প্ৰেৰণাদায়ক ভাষণৰ এক বিশাল সংকলন আছে, যাৰ ফলত তেওঁ ভাৰতৰ অন্যতম জনপ্ৰিয় আধ্যাত্মিক বক্তা হিচাপে পৰিগণিত হৈছে।^৮

বঁটা আৰু সন্মান

জয়া কিশোৰীয়ে এতিয়ালৈকে লাভ কৰা বঁটা-সন্মানসমূহ এনেধৰণৰ-

• ২০১৬ চনত আৰ এছ এছৰ মুৰব্বী শ্ৰী মোহন ভাগৱতৰ পৰা "আদৰ্শ যুৱ অধ্যাত্মিক গুৰু বঁটা" লাভ কৰে।^৯
• উদয়পুৰৰ নাৰায়ণ সেৱা সংস্থাৰ দ্বাৰা "সমাজ ৰতন বঁটা"ৰে সন্মানিত।.^১০
• সংস্কাৰ চেনেল, মুম্বাইৰ দ্বাৰা "২০১৩-১৪ চনৰ সংস্কাৰ শিল্পী" হিচাপে স্বীকৃতি দিয়া হৈছে।^১১
• ফেম ইণ্ডিয়া মেগাজিনে 'যুৱ আধ্যাত্মিক আইকন' হিচাপে উদযাপন কৰে।^১২
• জাতিলৈ আগবঢ়োৱা অমূল্য অৱদানৰ বাবে "মহিলা যুগ বঁটা" লাভ কৰে।^১২
• পেঞ্চিল ডট কমৰ দ্বাৰা বিশ্বজুৰি অন্যতম প্ৰেৰণাদায়ক মহিলা হিচাপে স্বীকৃতিপ্ৰাপ্ত।
• আইকনিক গোল্ড এৱাৰ্ডত "আইকনিক উইমেন মটিভেচনেল স্পীকাৰ অৱ দ্য ইয়েৰ ২০২১" বঁটা।^১৩
• ২০২১ চনৰ লোকমত ডিজিটেল প্ৰভাৱশালী বঁটাত "শ্ৰেষ্ঠ আধ্যাত্মিক প্ৰভাৱশালী" হিচাপে নিৰ্বাচিত।^১৪
• গ্ল'বেল ডিজিটেল ডিটক্স ডে' উপলক্ষে "শ্ৰেষ্ঠ প্ৰেৰণাদায়ক বক্তা ২০২১" উপাধিৰে সন্মানিত।^১৩
• ২০২২ চনৰ মে' মাহত গ্ল'বেল এক্সেলেন্স এৱাৰ্ডছ (জিইএ)ত "বছৰৰ আটাইতকৈ প্ৰেৰণাদায়ক মহিলা (আধ্যাত্মিক)" বঁটা লাভ কৰে।^১৫
• ২০২৪ চনৰ ৮ মাৰ্চত প্ৰধানমন্ত্ৰী নৰেন্দ্ৰ মোদীয়ে তেওঁক ৰাষ্ট্ৰীয় ক্ৰিয়েটৰ বঁটাৰে সন্মানিত কৰে।^১৬১৭

বাহ্যিক সংযোগ

• আনুষ্ঠানিক ৱেবছাইট