লীলা মিশ্ৰা

লীলা মিশ্ৰা (১ জানুৱাৰী ১৯০৮ – ১৭ জানুৱাৰী ১৯৮৮) আছিল এগৰাকী ভাৰতীয় অভিনেত্ৰী। তেওঁ পাঁচ দশকজুৰি দুইশতাধিক হিন্দী চলচ্চিত্ৰত অভিনয় কৰিছিল। তেওঁ বিশেষকৈ কাকী (খুৰী) বা মাউছী (মাহী) ধৰণৰ চৰিত্ৰত অভিনয় কৰাৰ বাবে জনপ্ৰিয় হৈছিল।

তেওঁ বিশেষভাৱে পৰিচিত হৈ পৰে সুপ্ৰসিদ্ধ চলচ্চিত্ৰ শোলে (১৯৭৫)ত কৰা “মাউছী” চৰিত্ৰটোৰ বাবে। ইয়াৰ উপৰিও তেওঁ দিল সে মিলেঁ দিল (১৯৭৮), বাতোঁ বাতোঁ মে (১৯৭৯) আদি চলচ্চিত্ৰত অভিনয় কৰে। ৰাজেশ খান্না অভিনীত পলকোঁ কি ছাঁও মে, মাঁ কা আঁচল, মেহবুবা, আৰু অমৰ প্ৰেম আদি ছবিতো তেওঁ গুৰুত্বপূৰ্ণ চৰিত্ৰত অভিনয় কৰিছিল।

ৰাজশ্ৰী প্ৰডাক্‌ছনছৰ জনপ্ৰিয় চলচ্চিত্ৰসমূহ যেনে গীত গাতা চল (১৯৭৫), নদিয়া কে পাৰ (১৯৮২) আৰু অবোধ (১৯৮৪)তো তেওঁ স্মৰণীয় অভিনয় আগবঢ়ায়।^১২৩

তেওঁৰ অভিনয় জীৱনৰ সৰ্বোৎকৃষ্ট অভিনয় বুলি বিবেচিত হৈছে নানী মা (১৯৮১) চলচ্চিত্ৰত কৰা অভিনয়, যাৰ বাবে তেওঁ ৭৩ বছৰ বয়সত শ্ৰেষ্ঠ অভিনেত্ৰী বঁটা লাভ কৰিছিল।

ব্যক্তিগত জীৱন

লীলা মিশ্ৰাৰ বিবাহ হৈছিল ৰাম প্ৰসাদ মিশ্ৰাৰ সৈতে, যিজন নীৰৱ চলচ্চিত্ৰ যুগত কৰ্মৰত এজন চৰিত্ৰ অভিনেতা আছিল। তেওঁ অত্যন্ত কম বয়সতে, প্ৰায় বাৰ বছৰ বয়সতে বিবাহ পাশত আৱদ্ধ হৈছিল। সতৰ বছৰ বয়সলৈকে তেওঁৰ দুগৰাকী কন্যা সন্তান হৈছিল। লীলা মিশ্ৰাৰ জন্মস্থান আছিল জেইচ, ৰায়বেৰেলী অঞ্চলত, আৰু তেওঁ লগতে তেওঁৰ স্বামী দুয়োয়ে জমিদাৰ পৰিয়ালৰ আছিল।^৪

কৰ্মজীৱন

লীলা মিশ্ৰাক প্ৰথমে চিনাক্ত কৰিছিল মামা শিণ্ডে নামৰ এজন ব্যক্তিয়ে, যিজনে দাদাচাহেব ফাল্কেৰ নাচিক চিনিটোনত কাম কৰিছিল। তেওঁ লীলা মিশ্ৰাৰ স্বামীক পতিয়ন নিয়াই তেওঁক চলচ্চিত্ৰত অভিনয় কৰাবলৈ অনুৰোধ কৰে। সেই সময়ত চলচ্চিত্ৰ উদ্যোগত মহিলা অভিনেত্ৰীৰ অত্যন্ত অভাৱ আছিল, যাৰ ফলস্বৰূপে পাৰিশ্ৰমিকৰ ক্ষেত্ৰতো ইয়াৰ প্ৰতিফলন দেখা গৈছিল। নাসিকত শ্বুটিঙৰ সময়ত ৰাম প্ৰসাদ মিশ্ৰাক মাহে ১৫০ টকা দিয়া হৈছিল, আনহাতে লীলা মিশ্ৰাক মাহে ৫০০ টকাৰ প্ৰস্তাৱ দিয়া হৈছিল। তথাপি, কেমেৰাৰ আগত দুয়োয়ে সন্তোষজনক প্ৰদৰ্শন কৰিব নোৱাৰাত তেওঁলোকৰ চুক্তি বাতিল কৰা হয়।

তাৰ পিছত তেওঁলোকলৈ অহা পৰৱৰ্তী সুযোগটো আছিল কলহাপুৰৰ মহাৰাজাৰ মালিকানাধীন এখন কোম্পানীৰ দ্বাৰা প্ৰস্তুত কৰা চলচ্চিত্ৰ ভিখাৰিণী। কিন্তু সংলাপ কওঁতে সহ-অভিনেতাক আলিঙ্গন কৰিব লগা দৃশ্যটোত অভিনয় কৰিবলৈ অস্বীকাৰ কৰাৰ বাবে লীলা মিশ্ৰাই এই সুযোগটোও হেৰুৱাব লগা হয়।

পিছলৈ তেওঁ হোনহাৰ নামৰ আন এখন চলচ্চিত্ৰত একে ধৰণৰ সমস্যাৰ সন্মুখীন হয়। এই ছবিখনত তেওঁ শাহু মোদকৰ বিপৰীতে নায়িকা হিচাপে অভিনয় কৰাৰ কথা আছিল আৰু আলিঙ্গনৰ দৃশ্যত অভিনয় কৰিবলৈ কোৱা হৈছিল, যাক তেওঁ দৃঢ়ভাৱে অস্বীকাৰ কৰে। আইনীভাৱে কোম্পানীটো দুৰ্বল অৱস্থাত থাকিবলৈ তেওঁক ছবিখনৰ পৰা বাদ দিব নোৱাৰিলে। ফলত তেওঁক মোদকৰ মাতৃৰ চৰিত্ৰটো দিয়া হয়, যিটো চৰিত্ৰই দৰ্শকৰ মাজত তৎক্ষণাৎ জনপ্ৰিয়তা লাভ কৰে। ইয়াৰ ফলতেই মাত্ৰ ১৮ বছৰ বয়সতেই তেওঁ মাতৃ চৰিত্ৰত অভিনয় আৰম্ভ কৰে।^৪

উল্লেখযোগ্য চলচ্চিত্ৰ

কৰ্মজীৱনৰ আৰম্ভণিতেই লীলা মিশ্ৰাই সংগীতপ্ৰধান সফল চলচ্চিত্ৰ অনমোল ঘড়ী (১৯৪৬), ৰাজ কাপুৰৰ আৱাৰা (১৯৫১) আৰু নৰ্গিছ–বলৰাজ সাহনী অভিনীত লাজৱন্তী (১৯৫৮) আদিত অভিনয় কৰে। লাজৱন্তী ছবিখন ১৯৫৯ চনৰ কাঁ চলচ্চিত্ৰ মহোৎসৱত সৰ্বশ্ৰেষ্ঠ চলচ্চিত্ৰ শাখাত পাম দ’অৰ বঁটাৰ বাবে মনোনীত হৈছিল।^৫

তেওঁ প্ৰথম ভোজপুৰী চলচ্চিত্ৰ গংগা মাইয়া তোহে পিয়াৰী চঢ়াইবো (১৯৬২)-তো অভিনয় কৰিছিল, য’ত কুমকুম, হেলেন আৰু নাজিৰ হুছেইনো অভিনীত হৈছিল।^৬৭

তেওঁৰ অভিনয় চৰিত্ৰসমূহ মাতৃ, সদয় অথবা কুটিল পেহী, লগতে হাস্যৰসাত্মক চৰিত্ৰলৈকে বিস্তৃত আছিল।

মৃত্যু

১৯৮৮ চনৰ ১৭ জানুৱাৰী তাৰিখে, বোম্বাইত হৃদৰোগত আক্ৰান্ত হৈ লীলা মিশ্ৰাৰ মৃত্যু হয়। সেই সময়ত তেওঁৰ বয়স আছিল আশী বছৰ।

বাহ্যিক সংযোগ

• Leela Mishra at বলিউড হাংগামা
• Leela Mishra Filmography at Upperstall