য়িয়ুন লি

য়িয়ুন লি (Yiyun Li, জন্ম:৪ নৱেম্বৰ, ১৯৭২) হৈছে আমেৰিকাত অধ্যাপনা কৰি থকা চীনত জন্মা এগৰাকী লেখক। অলেখ পুৰস্কাৰ আৰু প্ৰশংসাৰে তেওঁৰ গল্প আৰু উপন্যাসে ইতিমধ্যে স্বীকৃতি লাভ কৰিছে। ইয়াৰ ভিতৰত তেওঁৰ উপন্যাস ‘আ থাউজেণ্ড য়েৰচ্‌ অৱ গুড প্ৰেয়াৰ্চ্‌’ লৈ আগবঢ়োৱা ‘পেন/হেমিংৱে এৱাৰ্ড আৰু গাৰ্ডিয়েন ফাৰ্ষ্ট বুক এৱাৰ্ড’,^১২ ‘হোৱেৰ ৰিজনচ্‌ এণ্ড’লৈ ২০২০ চনৰ ‘পেন/জিন ষ্টেইন বুক এৱাৰ্ড’^৩ আৰু ‘দ্য বুক অৱ গুচ’লৈ ২০২৩ চনত কল্প সাহিত্যৰ বাবে আগবঢ়োৱা ‘পেন/ফল্কনাৰ বঁটা’ উল্লেখযোগ্য।^৪ য়িয়ুন লিৰ ‘ৱেডনেচ ডেজ চাইল্ড’ শীৰ্ষক চুটি গল্প সংকলনটিয়ে ‘পুলিৎজাৰ বঁটা’ৰ চূড়ান্ত মনোনয়ন লাভ কৰিছিল।^৫ তেওঁ ব্ৰুকলিন স্থিত সাহিত্য আলোচনী আ পাব্লিক স্পেচৰ সম্পাদক।^৬

সংক্ষিপ্ত জীৱনী

চীনৰ বেইজিঙত লিৰ জন্ম হৈছিল আৰু তাতে তেওঁ ডাঙৰ-দীঘল হৈছিল।^৭৮ তেওঁৰ মাকে এগৰাকী শিক্ষয়িত্ৰী হিচাপে আৰু পিতৃয়ে পাৰমাণৱিক পদাৰ্থবিজ্ঞানী হিচাপে কাম কৰিছিল।^৯ ডিয়েৰ ফ্ৰেণ্ড ফ্ৰম মাই লাইফ আই ৰাইট টু ইউ ইন ইউৰ লাইফত লিয়ে নিজৰ প্ৰাৰম্ভিক জীৱনত মাকৰ দ্বাৰা নিৰ্যাতিত হোৱাৰ কিছুমান মুহূৰ্তৰ কথা অন্তৰ্ভুক্ত কৰিছে।^১০

১৯৯১ চনত লিয়ে কলেজীয়া শিক্ষা গ্ৰহণ কৰাৰ আগতে নিজৰ দায়িত্বৰ অংশ হিচাপে জিনিয়াঙত থকা পিপলছ লিবাৰেচন আৰ্মী^৭ত এক বছৰ বাধ্যতামূলক সেৱা আগ বঢ়াইছিল।^১১ ১৯৯৬ চনত পেকিং বিশ্ববিদ্যালয়ৰপৰা বিজ্ঞান শাখাত স্নাতক ডিগ্ৰী লাভ কৰাৰ পিছত তেওঁ আমেৰিকালৈ গুচি যায়।^১ ২০০০ চনত আইৱা বিশ্ববিদ্যালয়ৰপৰা ইমিউনলজি বিষয়ত তেওঁ স্নাতকোত্তৰ ডিগ্ৰী লাভ কৰে।^১২ ২০০৫ চনত তেওঁ আইৱা বিশ্ববিদ্যালয়ৰ অধীনত অনুষ্ঠিত আইৱা লেখক সন্থাৰ কৰ্মশালাত সৃষ্টিশীল সাহিত্য (ক্ৰিয়েটিভ ননফিকচন) আৰু কল্পকাহিনীত ফাইন আৰ্টচৰ স্নাতকোত্তৰ ডিগ্ৰী লাভ কৰে।

য়িয়ুনৰ গল্প আৰু ৰচনাসমূহ ‘নিউ য়ৰ্কাৰ’‘’^১৩, ‘দ্য পেৰিছ ৰিভিউ’,‘হাৰপাৰচ্‌ আলোচনী’ আৰু ‘জট্ৰুপচ্‌: অল ষ্টৰি’ত প্ৰকাশ পাইছে। ‘আ থাউজেণ্ড য়েৰচ্‌ অৱ গুড প্ৰেয়াৰ্চৰ (চুটি গল্প সংকলন)’ৰ দুটা গল্প পৰিচালক ৱেইন ৱাঙ আৰু লিৰ দ্বাৰা চলচ্চিত্ৰলৈ ৰূপান্তৰিত কৰা হৈছিল।

২০০৫ চনৰ পৰা ২০০৮ চনলৈকে লিয়ে স্বামী আৰু তেওঁলোকৰ দুটি ল’ৰাৰ সৈতে কেলিফৰ্ণিয়াৰ অকলেণ্ডত বাস কৰিছিল। সেই সময়ছোৱাত তেওঁ মিলচ্‌ কলেজত অধ্যাপনা কৰিছিল।^১৪ ২০০৮ চনত তেওঁ অকলেণ্ডৰ পৰা ওলাই আহি ডেভিছৰ কেলিফৰ্ণিয়া বিশ্ববিদ্যালয়ৰ ইংৰাজী বিভাগত অধ্যাপক হিচাপে যোগদান কৰে।^১৪ ২০১৭ চনৰ পৰা তেওঁ প্ৰিন্সটন বিশ্ববিদ্যালয়ত সৃষ্টিশীল লেখা বিষয়ত (ক্ৰিয়েটিভ ৰাইটিং) অধ্যাপনা কৰি আহিছে।^১৪

২০১২ চনত লি হতাশাত ভুগিছিল আৰু দুবাৰকৈ আত্মহত্যাৰ চেষ্টা কৰিছিল।^১৫১০ সুস্থ হৈ চিকিৎসালয় এৰি অহাৰ পিছত তেওঁ কল্পকাহিনী লেখাৰ প্ৰতি আগ্ৰহ হেৰুৱাই পেলাইছিল আৰু গোটেই বছৰ ধৰি কেইবাখনো জীৱনী, স্মৃতিগ্ৰন্থ, ডায়েৰী আৰু জাৰ্নাল পঢ়াত মনোনিৱেশ কৰিছিল। লিৰ মতে, আনৰ জীৱনৰ বিষয়ে পঢ়িবলৈ পোৱাটো হ’ল একধৰণৰ মানসিক সকাহ।^১৫ ২০১৭ চনত প্ৰকাশিত তেওঁৰ স্মৃতিকথা ডিয়েৰ ফ্ৰেণ্ড^১৫ আছিল তেওঁৰ সেই মানসিক হতাশাৰ সময়খিনিত লাভ কৰা অভিজ্ঞতাৰ ফচল। কিতাপখন প্ৰকাশৰ কেইমাহমানৰ পিছত তেওঁৰ ১৬ বছৰীয়া পুত্ৰ ভিনচেণ্টে নিজকে হত্যা কৰে।^১০১২ ২০১৯ চনৰ উপন্যাস হোৱেৰ ৰিজনচ্‌ এণ্ড আছিল পুত্ৰশোকৰ ফলশ্ৰুতি।^১৬''^১৭

২০২২ চনত ঝুম্পা লাহিড়ীৰ পিছত লিয়ে প্ৰিন্সটন বিশ্ববিদ্যালয়ৰ সৃষ্টিশীল লেখন কাৰ্যসূচীৰ সঞ্চালক হিচাপে নিযুক্তি লাভ কৰে। এই ভূমিকাত তেওঁ বিশ্ববিদ্যালয়খনৰ উচ্চাকাংক্ষী লেখকসকলৰ বাবে এক সজীৱ সম্প্ৰদায় গঢ়ি তোলাত গুৰুত্ব আৰোপ কৰিছিল।^১৮

২০২৪ চনৰ ১৬ ফেব্ৰুৱাৰীত, প্ৰিন্সটন টাউনশ্বিপত লিৰ ১৯ বছৰীয়া পুত্ৰ জেমছক এখন ৰেলে মাৰাত্মকভাৱে খুন্দিয়ায়।^১৯ লিৰ ব্যক্তিগত জীৱনত ঘটিত ই আছিল আন এটি অপ্ৰত্যাশিত ঘটনা। মিডলএক্স কাউণ্টি মেডিকেল একজামিনাৰ অফিচে এই মৃত্যুক আত্মহত্যা বুলি ৰায় দিছিল।^২০

গ্ৰন্থপঞ্জী

উপন্যাস

• লি, য়িয়ুন. (২০০৯). দ্য ভেগ্ৰেণ্টচ্‌. ৰেণ্ডম হাউচ. ISBN 978-1-4000-6313-0
• লি, য়িয়ুন. (২০১৪). কাইণ্ডাৰ ডেন চলিটিউড. ৰেণ্ডম হাউচ. ISBN 978-1-4000-6814-2
• লি, য়িয়ুন. (২০১৯). হোৱেৰ ৰিজনচ্‌ এণ্ড. ৰেণ্ডম হাউচ. ISBN 978-1-984817-37-2
• লি, য়িয়ুন. (২০২০). মাষ্ট আই গ’. ৰেণ্ডম হাউচ. ISBN 978-0-399-58912-6
• লি, য়িয়ুন. (২০২২). দ্য বুক অৱ গুছ. Farrar, Straus and Giroux. ISBN 978-0-374-60634-3

স্মৃতিকথা

লি, য়িয়ুন (২০১৭), ডিয়েৰ ফ্ৰেণ্ড, ফ্ৰম মাই লাইফ আই ৰাইট টু ইউ ইন ইৱৰ লাইফ; ৰেণ্ডম হাউচ

চুটি কল্প সাহিত্য

সংকলন লি, য়িয়ুন (২০০৫), আ থাউজেণ্ড য়েৰচ্‌ অৱ গুড প্ৰেয়াৰ্চ; ৰেণ্ডম হাউচ

• (২০১০), গল্ড বয়, এমাৰেল্ড গাৰ্ল; ৰেণ্ডম হাউচ
• (২০২৩), ৱেডনেচ ডেচ্‌ চাইল্ড; Farrar, Straus and Giroux.

চুটি গল্প