বেলকনিত ভগৱান

বেলকনিত ভগৱান ( God on the Balcony) হৈছে অসমীয়া (দ্ব্যৰ্থতা দূৰীকৰণ পৃষ্ঠা) ভাষাত নিৰ্মিত আৰু বিশ্বজিৎ বৰাৰ দ্বাৰা পৰিচালিত, লিখিত আৰু সম্পাদিত এখন ড্ৰামাভিত্তিক চলচ্চিত্ৰ৷ ২০২০ চনৰ নৱেম্বৰ মাহত কলিকতা আন্তঃৰাষ্ট্ৰীয় চলচ্চিত্ৰ মহোৎসৱত চলচ্চিত্ৰখনৰ প্ৰথমটো প্ৰিমিয়াৰ হয়৷ ^১ মইনা প্ৰডাকচনৰ বেনাৰত ছবিখনৰ প্ৰযোজনা কৰিছে নুৰুল ছুলতানে৷ উল্লেখ্য যে, ছবিখন দেশ-বিদেশৰ একাধিক চলচ্চিত্ৰ মহোৎসৱত এতিয়ালৈকে প্ৰদৰ্শিত হৈছে৷ ^২ কলিকতা আন্তঃৰাষ্ট্ৰীয় চলচ্চিত্ৰ মহোৎসৱত চলচ্চিত্ৰখনৰ পৰিচালকে ভাৰতীয় ভাষাৰ শিতানত শ্ৰেষ্ঠ পৰিচালকৰ বঁটা লাভ কৰে৷ ২০২১ বৰ্ষৰ ৪ জুলাইৰ পৰা ১১ জুলাইলৈ লণ্ডনত অনুষ্ঠিত হোৱা ৰেইনবো চলচ্চিত্ৰ মহোৎসৱত ছবিখনে বিশেষ বঁটা লাভ কৰে৷ ^৩

এটা বাস্তৱ ঘটনাৰ ওপৰত আধাৰিত ছবিখনত হৰিশ খান্না, প্ৰণামী বৰা, পৰিনন্ধী জীমা চুলতানাই অভিনয় কৰিছে৷ ছবিখনে ২০২২ বৰ্ষৰ ৭ অক্টোবৰত ছবিগৃহত মুক্তিলাভ কৰে।^৪

সংক্ষিপ্ত কাহিনী

অসম, ভাৰতৰ এখনি পিছপৰা গাঁৱৰ পটভূমিত ছবিখন নিৰ্মাণ কৰা হৈছে৷ ছবিখনৰ কাহিনীভাগ খগেন নামৰ কৃষকজনক কেন্দ্ৰ কৰি আৱৰ্তিত হয়৷ খগেনৰ পত্নীৰ এটা দুৰ্ঘটনাত মৃত্যু হৈছে৷ এম্বুলেন্স নথকাত খগেনে মৃত পত্নীৰ নিথৰ দেহটো চাইকেলতে কঢ়িয়াই নিবলৈ যত্নপৰ হয়৷ শিলগুটি দিয়া পথবোৰেৰে মৃত পত্নী আৰু কনিষ্ঠ জীয়েকজনীৰ সৈতে ঘৰলৈ উভতি আহোঁতে খগেনে দুজন সংবাদদাতাক লগ পায়৷ ইয়াৰ পিছতে তেওঁলোকৰ যাত্ৰাটোৱে এটা ভিন্ন ৰূপ লয়৷ ^৫

উল্লেখ্য যে, ছবিখনৰ কাহিনীটো এটা বাস্তৱ ঘটনাৰ ওপৰত আধাৰিত৷ ওড়িশাৰ দাৰিদ্ৰ-পীড়িত ব্যক্তি দন মাঝীয়ে চৰকাৰৰ নিৰ্লিপ্ততাৰ বাবে নিজৰ পত্নীৰ দেহটো প্ৰায় দহ কিলোমিটাৰ পৰ্যন্ত নিজৰ কান্ধত কঢ়িয়াই নিছিল৷ ^৬

কলা-কুশলী

ছবিখনৰ কলা-কুশলীসকলৰ নাম ^৭ তলত উল্লেখ কৰা হ'ল -

অভিনয়ত

আনসকল কুশলী

চলচ্চিত্ৰ মহোৎসৱত

বেলকনিত ভগৱান এতিয়ালৈকে একাধিক চলচ্চিত্ৰ মহোৎসৱত প্ৰদৰ্শিত হৈছে৷ তাৰে কেইখনমান তলত উল্লেখ কৰা হ'ল-

ভাৰতত

• ২৪তম কলিকতা আন্তঃৰাষ্ট্ৰীয় চলচ্চিত্ৰ মহোৎসৱ, প্ৰিমিয়াৰ, (নৱেম্বৰ, ২০২০)
• ২৫তম তিতা কেৰেলা আন্তঃৰাষ্ট্ৰীয় চলচ্চিত্ৰ মহোৎসৱ (১১ ফেব্ৰুৱাৰী, ২০২১)
• ১৯তম পুনে আন্তঃৰাষ্ট্ৰীয় চলচ্চিত্ৰ মহোৎসৱ৷ ^৬

বিদেশত

• ১৯সংখ্যক ঢাকা আন্তঃৰাষ্ট্ৰীয় চলচ্চিত্ৰ মহোৎসৱ (জানুৱাৰী, ২০২১)
• ২৪সংখ্যক ছাংহাই আন্তঃৰাষ্ট্ৰীয় চলচ্চিত্ৰ মহোৎসৱ
• ২১সংখ্যক নিউইয়ৰ্ক ভাৰতীয় চলচ্চিত্ৰ মহোৎসৱ
• ১৮সংখ্যক ভাৰতীয় চলচ্চিত্ৰ মহোৎসৱ, ষ্টুটগাৰ্ট, জাৰ্মানী
• ২০সংখ্যক ইমাজিন ইণ্ডিয়া আন্তঃৰাষ্ট্ৰীয় চলচ্চিত্ৰ মহোৎসৱ, মাদ্ৰিদ, স্পেইন (মে', ২০২১)^৬
• লাছা আন্তঃৰাষ্ট্ৰীয় চলচ্চিত্ৰ মহোৎসৱ, ব্ৰাজিল৷ ^৮
• ২২ সংখ্যক ৰেইনব' চলচ্চিত্ৰ মহোৎসৱ, লণ্ডন ৷ ^৩

বঁটা-সন্মান

• ২০২০ চনত কলিকতাত অনুষ্ঠিত হোৱা আন্তঃৰাষ্ট্ৰীয় চলচ্চিত্ৰ মহোৎসৱত ছবিখন প্ৰদৰ্শিত হয় আৰু পৰিচালক বিশ্বজিৎ বৰাই ভাৰতীয় ছবিৰ শিতানত শ্ৰেষ্ঠ পৰিচালকৰ বঁটা লাভ কৰে৷ ^৯
• ২০২১ বৰ্ষত লণ্ডনত ৰেইনবো চলচ্চিত্ৰ সমাজৰ দ্বাৰা আয়োজিত ২২ সংখ্যক "ৰেইনবো চলচ্চিত্ৰ মহোৎসৱ"ত ছবিখন প্ৰদৰ্শিত হয় আৰু বিশেষ বঁটা লাভ কৰে৷ উক্ত মহোৎসৱ ৪ জুলাইৰ পৰা ১১ জুলাইলৈ অনুষ্ঠিত হৈছিল৷ ^৩

সমালোচনা

ছবিখনৰ প্ৰসংগত লেবাননত থকা চলচ্চিত্ৰ সমালোচক জোছেফ কৰ্কমাজে মন্তব্য কৰে যে-...The filmmaker portraits in his movie, a socio-economic context of a region, his own, that is a microcosm of an entire country that is struggling to develop.^১০

আনহাতে 'স্ক্ৰল ডট ইন'ত নন্দিনী ৰামনাথে মন্তব্য কৰিছে যে-ছবিখনৰ ব্যাপক সমাদৰৰ লগত বোধহয় ক'ভিড-১৯ৰ ভয়াৱহ প্ৰভাৱ কিছুমান সংপৃক্ত হৈ আছে৷ কিয়নো মহামাৰীয়ে উন্নত আৰু অনুন্নত দেশৰ মাজত থকা স্বাস্থ্যসেৱাৰ পাৰ্থক্যবোৰ উন্মোচিত কৰিছে৷^১১

বাহ্যিক সংযোগ

বেলকনিত ভগৱানৰ ট্ৰেইলাৰ