নয়নমণি

নয়নমণি (Nayanmoni) ৰাজেন্দ্ৰ চলচ্চিত্ৰৰ বেনাৰত নিৰ্মিত আৰু ১৯৮৪ চনত মুক্তিপ্ৰাপ্ত এখন পূৰ্ণদৈৰ্ঘ্যৰ ৰঙীন অসমৰ চলচ্চিত্ৰ। ছবিৰ কাহিনী, পৰিচালনা আৰু প্ৰযোজনা সুপ্ৰভা দেৱীৰ। মূল চৰিত্ৰত অভিনয় কৰিছে নিপন গোস্বামী আৰু বিদ্যা ৰাৱে। এইখনে মহিলা পৰিচালকে পৰিচালনা কৰা প্ৰথম অসমীয়া ছবি।^১ পৰিচালক সুপ্ৰভা দেৱীৰ স্বামী দ্বিজেন্দ্ৰ নাৰায়ণ দেৱ অসমীয়া ছবিৰ এজন পৰিচালক আৰু বিতৰক আছিল। স্বামীৰ সৈতে বহুকেইখন অসমীয়া ছবিৰ প্ৰযোজনা কৰা দেৱীয়ে স্বামীৰ মৃত্যুৰ পিছত নয়নমণিৰ যোগে চলচ্চিত্ৰ পৰিচালনাৰ জগতত খোজ দিছিল।^২৩

ছবিৰ চিত্ৰনাট্য ৰচক তথা সহযোগী পৰিচালক গুণসিন্ধু হাজৰিকাই এই ছবিৰ কামত ব্যস্ত হৈ থকা অৱস্থাতে কলকাতাত এক দুৰ্ঘটনাত পতিত হৈ চিৰদিনৰ বাবে দৃষ্টিশক্তি হেৰুৱাইছিল।^১

কাহিনীৰ সাৰাংশ

পৰাগ আৰু অৰূপ দুই ভাই ককাই। পৰাগৰ পত্নী জীনু। অৰূপে ভাল পায় মইনা ওৰফে নয়নমণিক। মাকৰ সন্মতিত দুয়োৰো বিয়া হ’ল আৰু দাম্পত্য জীৱনৰ আৰম্ভণি কৰিলে। মৰম, স্নেহ, পৰিচৰ্যাৰে নয়নমণিয়ে শাহুৱেকক বুৰাই ৰাখিলে। কিন্তু জায়েক জীনুৰ নয়নমণিৰ এই সুখ সহ্য নহ’ল। শাহুৱেকৰ পৰা তাইক আঁতৰাই পঠিয়াবলৈ কূট-কৌশল ৰচনা কৰিলে। লাহেলাহে শাহুৱেকে তাইক বেয়া পোৱা হৈ আহিল আৰু এদিন তাই ঘৰ এৰি গিৰিয়েক আৰু সন্তান দুটি লৈ ভাড়াঘৰত থাকিবলৈ বাধ্য হ’ল।

সময় গৈ থাকে। অৰূপৰ মৃত্যু হয়। অকলশৰীয়া নয়নমণিয়ে অশেষ কষ্টৰে সন্তান দুটি তুলি-তালি ডাঙৰ দীঘল কৰে। অৱশেষত পৰাগ, জীনু আৰু শাহুৱেক অনুতপ্ত হয় আৰু সকলোৱে মাথোন নয়নমণিক বিচাৰিলে।^১

অভিনয় শিল্পী

• নিপন গোস্বামী
• বিদ্যা ৰাও (অভিনেত্ৰী)
• ঈশান বৰুৱা
• বন্দনা শৰ্মা
• গিৰিজা দাস
• গৌৰী বৰুৱা
• ৰবীন ডেকা
• উপকূল বৰদলৈ
• ৰুণু দাস
• ৰেখা দাস
• ক্ষিতিন বৰবৰা
• মীনা কুমাৰী দুৱৰা
• ডৰীন হাজৰিকা
• ডেভিছ হাজৰিকা আদি^১

কলা-কুশলী

• চিত্ৰনাট্য, সহযোগী পৰিচালক- গুণসিন্ধু হাজৰিকা
• শব্দগ্ৰহণ- কালি-মহাদেৱ
• কলা নিৰ্দেশনা- ফটিক বৰুৱা^১

সঙ্গীত

ছবিৰ সঙ্গীত পৰিচালনা জীতু-তপনৰ। গীত গাইছে বলীউডৰ প্ৰতিষ্ঠিত কণ্ঠশিল্পী সুমন কল্যাণপুৰ আৰু ভূপিন্দৰে।^৪১