দিগন্ত ওজা

দিগন্ত ওজা (Diganta Oza) হৈছে এগৰাকী অসমীয়া সাংবাদিক, সম্পাদক, সাহিত্যিক। ‘অসমীয়া সমাজ জীৱনৰ বিৱৰ্তন’, ‘প্ৰথম মহাসমৰ’ আদি তেখেতৰ দ্বাৰা লিখা দুখন অন্যতম প্ৰাসংগিক গ্ৰন্থ৷ তেখেত ‘অসম শিশু সাহিত্য কোষ’ৰ ৪১ টা খণ্ডৰ সহযোগী সম্পাদক আছিল আৰু তেখেতৰ নেতৃত্বতেই ‘অসম আন্দোলনৰ তথ্যকোষ’৬টা খণ্ডত প্ৰকাশ হৈছে৷^১ তেখেতে প্ৰাগ নিউজৰ মুখ্য কাৰ্যবাহী সম্পাদক হিচাপে ২০২২ চনলৈকে কাৰ্যনিৰ্বাহ কৰিছিল৷ তেখেত ২০২২ চনত ‘ডাঙৰ মানুহৰ সাধু’ শীৰ্ষক গ্ৰন্থৰ বাবে ২০২২ বৰ্ষৰ সাহিত্য অকাডেমিৰ ‘শিশু সাহিত্য বঁটা’ লাভ কৰিছে৷^২ তেখেত ২০২৫ চনৰ ফেব্ৰুৱাৰী মাহৰ পৰা ‘সমীক্ষণ’ আলোচনীৰ মুখ্য সম্পাদক হিচাপে কৰ্মৰত হৈ থকাৰ লগতে 'অসম লাইভ 24' নামৰ ছেটেলাইট চেনেলৰ কনছাল্টিং এডিটৰ ৰূপে কৰ্মৰত৷

জন্ম আৰু বংশ পৰিচয়

অসমৰ বিশ্বনাথ জিলাৰ বিশ্বনাথ চাৰিআলিত ১৯৭২ চনত জন্ম৷ পিতৃৰ নাম ৰমেন ওজা, মাতৃৰ নাম ৰেণু ওজা৷

শিক্ষা

চাৰিআলি একাডেমিৰ পৰা হাইস্কুল শিক্ষান্ত পৰীক্ষাত উত্তীৰ্ণ আৰু বিশ্বনাথ কলেজৰ পৰা উচ্চতৰ মাধ্যমিক সম্পূৰ্ণ কৰি ওজাই উচ্চ শিক্ষাৰ বাবে গুৱাহাটীলৈ আহে৷ তেওঁ গুৱাহাটী বিশ্ববিদ্যালয়ৰ পৰা স্নাতক উত্তীৰ্ণ হয় আৰু পৰৱৰ্তী সময়ত গুৱাহাটী বিশ্ববিদ্যালয়ৰ পৰাই অসমীয়া বিষয়ত স্নাতকোত্তৰ ডিগ্ৰী লাভ কৰে৷

কৰ্মজীৱন

ছাত্ৰ অৱস্থাতেই ওজাই ১৯৯৩ চনত অসমীয়া দৈনিক কাকত ‘আজিৰ সংবাদ’ৰ (অধুনালুপ্ত ) নিবন্ধ সম্পাদকৰূপে কৰ্মজীৱনৰ পাতনি মেলে৷ পৰৱৰ্তীকালত ‘আমাৰ অসম’ৰ উপ-বাৰ্তা সম্পাদক (১৯৯৭-২০০২) আৰু ‘জনসাধাৰণ’ৰ সহযোগী সম্পাদক (২০০৩-২০০৬)ৰ দায়িত্ব পালন কৰি ‘অসমীয়া প্ৰতিদিন’ত সহকাৰী সম্পাদকৰূপে ২০০৭ৰ জানুৱাৰীত যোগ দিয়ে৷ এমাহৰ পাছতে সেই কাকতগোষ্ঠীৰ পৰা প্ৰকাশিত সাহিত্য আলোচনী ‘সাতসৰী (আলোচনী)’ৰ কাৰ্যবাহী সম্পাদকৰ দায়িত্ব গ্ৰহণ কৰে৷ ২০১৫ৰ মে’ মাহলৈ সেই পদতে থাকি আলোচনীখনক নতুন চিন্তাৰ বাৰ্তাবাহক কৰাত ভূমিকা লয়৷ ২০১৫ৰ জুন মাহত তেওঁ টেলিভিছন চেনেল প্ৰাগ নিউজত যোগ দিয়ে৷ তেওঁ প্ৰাগ নিউজৰ মুখ্য কাৰ্যবাহী সম্পাদক হিচাপে কাৰ্যনিৰ্বাহ কৰিছিল৷ দিগন্ত ওজা ১৯৯৬ চনত প্ৰকাশিত অসমীয়া ভাষাৰ প্ৰথমখন সম্পূৰ্ণ কিতাপ বিষয়ক আলোচনী ‘গ্ৰন্থ’ৰো আছিল সম্পাদক আৰু প্ৰকাশক৷ তেওঁ কিছু দিনৰ বাবে ‘বাৰ্তা এন.ই’ৰ মুখ্য সম্পাদক আছিল। বৰ্তমান তেওঁ 'সমীক্ষণ' মাহেকীয়া আলোচনীৰ মুখ্য সম্পাদকৰ লগতে 'অসম লাইভ 24' নামৰ ছেটেলাইট চেনেলৰ কনছাল্টিং এডিটৰ৷

সাহিত্যৰাজি

চিন্তামূলক গদ্য

• অসমীয়া সমাজ জীৱনৰ বিৱৰ্তন, ভবানী বুকছ ২০১১, (অসমৰ সমাজ ইতিহাস সম্পৰ্কীয় monographic গ্ৰন্থ)
• প্ৰথম মহাসমৰ, জ্যোতি প্ৰকাশন, ২০১৪^৩
• সন্ধিক্ষণত মানুহ, গ্ৰন্থ, ২০০৬
• জীৱনৰ গদ্য, আঁক-বাক, ২০০৭
• সাঁচিপাতৰ পৰা লেপটপলৈ, পাঞ্চজন্য, ২০১১^৪
• সাহিত্যৰ দৃষ্টি আৰু সৃষ্টি, অসম পাবলিচিং কোম্পানী, ২০১৪
• 'প্ৰাচীন সভ্যতা', ২০২৪, অসম প্ৰকাশন পৰিষদ

উপন্যাস

• জেহাদী, গ্ৰন্থ, ২০০১; ভবানী বুকছ, ২০১০

শিশু সাহিত্য

• ডাঙৰ মানুহৰ সাধু, বান্ধৱ, ২০২০

ক্ৰীড়া

• বাইশ গজৰ যুঁজাৰু, অসম পাবলিচিং কোম্পানী, ২০২৪^৫

জীৱনী

• 'পৃথিৱী ৰক্ষাৰ ৰণুৱা', ২০২৪, বনলতা-ডিব্ৰুগড়

বিজ্ঞান

• 'আমাৰ বেলিটো', ২০২৩, অসম প্ৰকাশন পৰিষদ
• 'আমাৰ জোনবাই', ২০২৩, অসম প্ৰকাশন পৰিষদ
• 'আমাৰ পৃথিৱী', ২০২৩, অসম প্ৰকাশন পৰিষদ
• 'আমাৰ সৌৰজগত', ২০২৩, অসম প্ৰকাশন পৰিষদ
• 'বিশ্বব্ৰহ্মাণ্ড কিমান বিশাল, ২০২৩, অসম প্ৰকাশন পৰিষদ
• 'ইমান যে উদ্ভিদ', ২০২৪, অসম প্ৰকাশন পৰিষদ^৬
• 'ইমান যে প্ৰাণী', ২০২৪, অসম প্ৰকাশন পৰিষদ^৭

সম্পাদনা

• অসমীয়া সাহিত্যৰ e-সঁফুৰা, খণ্ড-১ (অতিথি সম্পাদক, সাহিত্য ডট অৰ্গৰ নিৰ্বাচিত লেখাৰ ছপাৰূপ), ভাষা সাহিত্য সন্মিলনী, অসম, ২০১২
• অসম আন্দোলনৰ তথ্যকোষ, অসম চুক্তি ৰূপায়ণ বিভাগ, ২০২০
• অসম শিশু সাহিত্য কোষ, সহযোগী সম্পাদক, কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ পৰা প্ৰকাশিত ৪১টা খণ্ডৰ শিশু সাহিত্য সম্পৰ্কীয় কোষ।
• হৰেন্দ্ৰনাথ বৰুৱাৰ সম্পাদকীয় আৰু অন্যান্য, ২০২৪, হৰেন্দ্ৰনাথ বৰুৱা স্মৃতি ন্যাস, গুৱাহাটী

বঁটা আৰু সন্মান

• ২০০৯ বৰ্ষত ‘সন্ধিক্ষণত মানুহ’ শীৰ্ষক গ্ৰন্থৰ বাবে ‘মুনীন বৰকটকী’ বঁটা৷^৮
• অনন্তৰাম দাস স্মৃতি বঁটা, ২০২০৷ ^৯
• সাহিত্য অকাডেমিৰ ‘শিশু সাহিত্য বঁটা’, ২০২২