ছালমা আৰাস্তু

ছালমা আৰাস্তু (Salma Arastu; জন্ম: ১৯৫০)^১ এগৰাকী শিল্পী যাৰ কৰ্মৰাজি তেওঁৰ সাংস্কৃতিক পটভূমি আৰু অভিজ্ঞতাৰদ্বাৰা অনুপ্ৰাণিত। ভাৰতৰ ৰাজস্থানৰ এটা সিন্ধী ভাষা পৰিয়ালত জন্মগ্ৰহণ কৰা ছালমা হিন্দু ধৰ্মত ডাঙৰ-দীঘল হৈছিল। পৰৱৰ্তী সময়ত তেওঁ ইছলাম গ্ৰহণ কৰে আৰু ১৯৮৬ চনত আমেৰিকা যুক্তৰাষ্ট্ৰলৈ গুচি যায়।^২

কেলিফৰ্ণিয়াৰ অ’কলেণ্ডলৈ যোৱাৰ আগতে তেওঁ ১৯৮৭ চনৰপৰা ২০০৬ চনলৈ পেঞ্চিলভেনিয়াৰ বেথলেহেমত বাস কৰিছিল আৰু তাতেই কাম কৰিছিল।^৩ তেওঁ চিত্ৰকলা, ভাস্কৰ্য, কবিতা আৰু কেলিগ্ৰাফী সৃষ্টি কৰাৰ লগতে আমেৰিকান মুছলমান সম্প্ৰদায়ৰ বাবে গ্ৰীটিং কাৰ্ড তৈয়াৰ কৰে।^৪৫

আৰাস্তুৱে আন্তঃৰাষ্ট্ৰীয় পৰ্যায়ত তেওঁৰ চিত্ৰসমূহ প্ৰদৰ্শন কৰিছে।^৬ তেওঁৰ কৰ্মৰাজি মিছৌৰীৰ চেইণ্ট লুইছৰ মিউজিয়াম অৱ কণ্টেম্পৰাৰী ৰিলিজিয়াছ আৰ্টত সংৰক্ষিত হৈ আছে।^৭ ইয়াৰ উপৰি তেওঁৰ কৰ্ম নিউয়ৰ্কৰ ৯/১১ মেম’ৰিয়েল মিউজিয়ামৰ স্থায়ী সংগ্ৰহতো অন্তৰ্ভুক্ত।^৮ ইয়াৰ উপৰি তেওঁ নিজৰ কামৰ বাবে কেইবাটাও অনুদান লাভ কৰিছে।^৯১০ আৰাস্তুৱে বৰোদাৰ মহাৰাজ ছায়াজীৰাও বিশ্ববিদ্যালয়ৰপৰা ললিত কলাত স্নাতকোত্তৰ ডিগ্ৰী লাভ কৰিছিল।^১১১২

কৰ্মৰাজি

আৰাস্তুৰ শিল্পকলা ভাৰতীয় ঐতিহ্য আৰু ইছলামিক আধ্যাত্মিকতা—এই উভয়ৰে চিত্ৰকল্প, ভাস্কৰ্য আৰু সাহিত্যৰদ্বাৰা প্ৰভাবিত।^১৩ তেওঁ উল্লেখ কৰিছে যে পৃথিৱীৰ বিভিন্ন সংস্কৃতিৰ সৈতে হোৱা তেওঁৰ অভিজ্ঞতাই তেওঁৰ শৈল্পিক শৈলীক সমৃদ্ধ কৰিছে। ইৰান আৰু কুৱেইটত বাস কৰি কাম কৰি থকাৰ সময়তে তেওঁ ইছলামিক কলা আৰু আৰবী কেলিগ্ৰাফীৰ সান্নিধ্যলৈ আহিছিল।^১৩

আৰাস্তুৰ কামত আশা, মানৱতাৰ মাজত একতা অন্বেষণ, পৃথিৱী আৰু আত্মাৰ দৰে বিষয়-বস্তু অন্তৰ্ভুক্ত হৈ থাকে।^১৪ তেওঁৰ শিল্পকৰ্মই এক "পাৰিপাৰ্শ্বিক চেতনা" বহন কৰে বুলি তেওঁ দাবী কৰে, যাৰ উদাহৰণ তেওঁৰ "মাইচেলিয়াল ফ্ল’" আৰু "টিনি ক্ৰিয়েচাৰ্ছ: আৱাৰ ইনভিজিবল চাস্কেইনাৰ্ছ" শৃংখলাত পোৱা যায়। এই শৃংখলাবোৰত তেওঁ জীৱসমূহৰ মাজৰ সহজীৱিতাৰ বিষয়ে অন্বেষণ কৰিছে আৰু বিয়োজক হিচাপে অণুজীৱৰ ভূমিকাৰ প্ৰতি দৃষ্টি আকৰ্ষণ কৰিছে।

আৰাস্তুৱে কেলিফৰ্ণিয়াৰ অ’কলেণ্ডৰ ইষ্ট বে ক’মিউনিটি ফাউণ্ডেশ্যনৰপৰা "ফাণ্ড ফৰ আৰ্টিষ্টছ" (২০২০, ২০১৪, ২০১২) আৰু ২০১৫ তথা ২০১৬ চনত বাৰ্কলে চহৰৰপৰা ব্যক্তিগত শিল্পী অনুদান লাভ কৰিছে।

তেওঁৰ কৰ্মৰাজিৰ বিষয়ে ইছলামিক হৰাইজন্স জাৰ্নেল,^১৫ টিক্কুন,^১৬ ইণ্ডিয়া-ৱেষ্ট,^১৭ আৰু পাৰফৰমেন্স আৰ্ট জাৰ্নেলত^১৮ চৰ্চা কৰা হৈছে।

প্ৰদৰ্শনী

আৰাস্তুৰ কৰ্মৰাজি কেইবাখনো দলীয় আৰু একক প্ৰদৰ্শনীত প্ৰদৰ্শিত হৈছে, যাৰ ভিতৰত আছে:

• ২০১৫: মিউজিয়াম অৱ কণ্টেম্পৰৰী ৰিলিজিয়াছ আৰ্ট, চেইণ্ট লুই বিশ্ববিদ্যালয়, মিজুৰী^{১৯২০২১}
• ২০০৬ ছেপ্টেম্বৰ: আৰ্টজাজ গেলেৰী, ফিলাডেলফিয়া, পেঞ্চিলভেনিয়া^২২
• ২০০৫ ছেপ্টেম্বৰ: দ্য হোপ হৰ্ণ গেলেৰী, স্ক্ৰেণ্টন বিশ্ববিদ্যালয়, পেঞ্চিলভেনিয়া^২৩
• ২০০৫ ফেব্ৰুৱাৰী: ৰেডফৰ্ড বিশ্ববিদ্যালয় কলা সংগ্ৰহালয়, ৰেডফৰ্ড, ভাৰ্জিনিয়া
• ২০০৩: ব্লেক কালচাৰেল চেণ্টাৰ, লাফায়েট কলেজ, ইষ্টন, পেঞ্চিলভেনিয়া^২৪
• ১৯৯৮: ডি আৰ্ট মেজিক, ইষ্টন, পেঞ্চিলভেনিয়া^২৫

অধিক পঢ়ক

• Moore, Kathleen M; Haddad, Y; Smith, J. (2006). Muslim Women in America: The Challenge of Islamic Identity Today. Oxford University Press. ISBN 0-19-517783-5
• O'Brien, Jodi A. (2006). The Production Of Reality: Essays and Readings on Social Interaction (4th ed). Pine Forge Press. ISBN 1-4129-1519-8

বাহ্যিক সংযোগ

• ছালমা আৰাস্তুৰ ৱেবছাইট
• ছালমা আৰাস্তুৰ ভিডিঅ' ষ্টেটমেণ্ট
• ৱাননেছ প্ৰজেক্টছ