চেহান কৰুণাতিলকা

চেহান কৰুণাতিলকা (Shehan Karunatilaka; জন্ম: ১৯৭৫) শ্ৰীলংকাৰ এগৰাকী লেখক। তেওঁ কলম্বোত ডাঙৰ-দীঘল হৈছিল, নিউজিলেণ্ডত পঢ়া-শুনা কৰিছিল আৰু লণ্ডন, আমষ্টাৰডাম আৰু ছিংগাপুৰত থাকি কাম কৰিছিল। তেওঁৰ ২০১০ চনৰ প্ৰথম উপন্যাস ‘চাইনামেন: দ্য লিজেণ্ড অৱ প্ৰদীপ মেথিউ’ৱে ‘কমনৱেলথ বুক প্ৰাইজ’, ‘ডি এছ চি পুৰস্কাৰ’ তথা ‘গ্ৰেটিয়ান পুৰস্কাৰ’ লাভ কৰিছিল আৰু ৱাইজডেনৰ দ্বাৰা সৰ্বকালৰ দ্বিতীয় সৰ্বশ্ৰেষ্ঠ ক্ৰিকেট বিষয়ক কিতাপ (cricket book) হিচাপে বিবেচিত হৈছিল। তেওঁৰ তৃতীয় উপন্যাস ‘দ্য চেভেন মুনচ্‌ অৱ মালি আলমেইদা’ই ২০২২ চনৰ ১৭ অক্টোবৰত বুকাৰ বঁটা লাভ কৰিছিল।^১২৩

জীৱনপঞ্জী

১৯৭৫ চনত দক্ষিণ শ্ৰী লংকাৰ গালেত চেহান কৰুণাতিলকাৰ জন্ম হৈছিল।^৪ তেওঁ ডাঙৰ দীঘল হৈছিল কলম্বোত।^৫ তেওঁ শ্ৰীলংকাৰ কলুপিটিয়াৰ এছ থমাছ প্ৰিপেৰেটৰী স্কুল আৰু তাৰ পিছত নিউজিলেণ্ডত হোৱাংআনুই কলেজিয়েট স্কুল আৰু মাচি বিশ্ববিদ্যালয়ত শিক্ষা লাভ কৰিছিল।^৪৬ তেওঁৰ পৰিয়ালে তেওঁ বিজনেচ এডমিনিষ্ট্ৰেচন পঢ়াটো বিচাৰিছিল; কিন্তু পৰিয়ালৰ ইচ্ছাৰ বিপৰীতে গৈ চেহানে ইংৰাজী সাহিত্য অধ্যয়ন কৰি এই বিষয়ত স্নাতক ডিগ্ৰী লাভ কৰিছিল।^৭৮

২০১০ চনত তেওঁৰ প্ৰথম উপন্যাস প্ৰকাশ কৰাৰ আগতে, তেওঁ মেককেন, আইৰিছ আৰু বিবিডিঅ’ত বিজ্ঞাপনৰ কাম কৰিছিল আৰু দ্য গাৰ্ডিয়ান, নিউজউইক, ৰোলিং ষ্ট’ন, জি কিউ, নেচনেল জিঅ’গ্ৰাফিক, কণ্ডে নাষ্ট, ৱাইজডেন, দ্য ক্ৰিকেটাৰ আৰু ইকনমিক টাইমচ্‌ৰ বাবে লিখিছিল। তেওঁ শ্ৰীলংকাৰ ৰক বেণ্ড ‘ইণ্ডিপেণ্ডেণ্ট স্কোৱেৰ’ আৰু ‘পাৱাৰকাট চাৰ্কাছ’ আৰু ‘ব্ৰাছ মাংকি বেণ্ড’ৰ সৈতে বাছ (bass) বজাইছিল।

উপন্যাস

দ্য পেইণ্টাৰ আছিল কৰুণাতিলকাৰ কিতাপৰ প্ৰথম পাণ্ডুলিপি। ২০০০ চনত গ্ৰেটিয়ান পুৰস্কাৰৰ বাবে এই পাণ্ডুলিপিটো তালিকাভুক্ত কৰা হৈছিল^৯ যদিও ই কেতিয়াও কিতাপ আকাৰে প্ৰকাশ হোৱা নাছিল।

তেওঁৰ প্ৰথম উপন্যাস চাইনামেন: দ্য লেজেণ্ড অৱ প্ৰদীপ মেথিউত (২০১০ চনত স্ব-প্ৰকাশিত),^১০ ক্ৰিকেটৰ আলমত শ্ৰী লংকাৰ ইতিহাসৰ বিষয়ে লিখা হৈছিল।^১১ কিতাপখন আছিল, এজন সুৰাসক্ত সাংবাদিকে ১৯৮০ ৰ দশকৰ এজন নিৰুদৃষ্ট শ্ৰীলংকাৰ ক্ৰিকেটাৰক অনুসন্ধান কৰি বিচাৰি উলিওৱাৰ কাহিনী।

কৰুণাতিলকাই বিভিন্ন শিৰোনামৰ সৈতে তেওঁৰ দ্বিতীয় খন উপন্যাস লিখিছিল আৰু কিতাপখনৰ বিভিন্নটা সংস্কৰণ প্ৰকাশ পাইছিল। ২০১৫ চনত গ্ৰেটিয়ান পুৰষ্কাৰৰ বাবে প্ৰথম খচৰা তালিকাভুক্ত কৰাৰ সময়ত উপন্যাসখনৰ শিৰোনাম আছিল ডেভিল ডান্স।^১২ পেংগুইন ইণ্ডিয়াই ২০২০ চনত চেটচ্‌ উইথ দ্য ডেড নাম দি কিতাপখন ভাৰতবৰ্ষত মুকলি কৰিছিল।^১৩১৪

২০২২ চনৰ আগষ্টত প্ৰকাশিত চেহানৰ দ্য চেভেন মুনচ্‌ অৱ মালি আলমেইদাই ২০২২ বৰ্ষৰ বুকাৰ বঁটা লাভ কৰিছিল। একে বছৰৰে ১৭ অক্টোবৰত লণ্ডনৰ ৰাউণ্ড হাউচৰ এক অনুষ্ঠানত এই বঁটা ঘোষণা কৰা হৈছিল।^{১৫১৬১৭১৮১৯}