কীৰ্তি কুলহাৰী

কীৰ্তি কুলহাৰী (Kirti Kulhari) হৈছে এগৰাকী ভাৰতীয় অভিনেত্ৰী আৰু মডেল৷ কীৰ্তিয়ে সাধাৰণতে হিন্দী ভাষা ভাষাৰ ছবিত অভিনয় কৰে৷ ২০০২ চনত মুক্তিপ্ৰাপ্ত উড়িয়া ভাষাৰ ছবি ধৰিণীৰ জৰিয়তে কীৰ্তিয়ে অভিনয়ৰ জগতত পদাৰ্পণ কৰে৷ ২০১০ চনত কীৰ্তিয়ে খিচিড়ী:দ্য মুভি নামৰ হিন্দী ছবিখনত অভিনয় কৰে৷ এইখনেই হৈছে তেখেতে অভিনয় কৰা হিন্দী ভাষাৰ প্ৰথমখন ছবি৷ ২০১১ চনত কীৰ্তিক শেইটান ছবিত দেখা যায়৷ ^১ পৰৱৰ্তী সময়ত কীৰ্তিয়ে বহুকেইখন সফল আৰু সমাদৃত ছবি; পিংক (২০১৬), উৰি:দ্য ছাৰ্জিকেল ষ্ট্ৰাইক (২০১৯) আৰু মিছন মংগল (২০১৯)ত অভিনয় কৰে৷ ২০১৯ চনত অভিনয় কৰা দুয়োখন ছবিয়েই সৰ্বাধিক উপাৰ্জনকাৰী ভাৰতীয় ছবিৰ তালিকাভূক্ত হয়৷^২

ব্যক্তিগত জীৱন

১৯৮৫ চনৰ ৩০ মে'ত কীৰ্তিৰ ৰাজস্থানৰ ঝুনঝুনুত জন্ম হয়৷ অৱশ্যে কীৰ্তি প্ৰতিপালিত হয় মুম্বাইতহে৷ ^৩ ২০১৬ চনত কীৰ্তিয়ে শাহীল ছেহগালৰ লগত বৈবাহিক জীৱন আৰম্ভ কৰে৷^৪৫

কীৰ্তিৰ পিতৃ খায়ালী ৰাম কুলহাৰী হৈছে এগৰাকী অৱসৰপ্ৰাপ্ত ভাৰতীয় নৌসেনা বিষয়া আৰু মাতৃ শ্ৰৱাণী কুলহাৰী এগৰাকী গৃহিণী৷কীৰ্তিয়ে মুম্বাইৰ কেজি ছোমায়া কলেজৰ পৰা সাংবাদিকতা আৰু গণমাধ্যম বিভাগত স্নাতকোত্তৰ ডিগ্ৰী অৰ্জন কৰে৷ কীৰ্তিৰ এগৰাকী ভ্ৰাতৃ আৰু দুগৰাকী ভগ্নী আছে৷^৬

কৰ্মজীৱন

২০১০ চনত কীৰ্তিয়ে হিন্দী ভাষাৰ ছবি খিচিড়ী:দ্য মুভিত অভিনয় কৰে৷ ^৭ ছবিখনত ২০১০ চনত অক্টোবৰত মুক্তি হৈছিল৷ ইয়াৰ পিছত তেখেতে শ্বেইটান নামৰ ছবিখনত অভিনয় কৰে৷^৮ ছবিখন ২০১১ চনৰ জুনত মুক্তি হয়৷ বহুকেইটা বঁটা আৰু সন্মান জয় কৰা আৰু মনোনীত হোৱা এই ছবিখনৰ পৰিচালক আছিল বেজয় নামবিয়াৰ৷ ছবিখনত কাল্কী কেকলাঁ, শিৱ পণ্ডিত, গুলছন দেৱায়া, ৰাজীৱ খাণ্ডেলৱাল আদিৰ দৰে প্ৰতিভাৱান শিল্পীয়ে অভিনয় কৰিছে৷ ^৯

২০১৬-বৰ্তমানলৈকে

২০১৬ চনত কীৰ্তিয়ে পিংক নামৰ ছবিখনত অভিনয় কৰে৷ দৰ্শক আৰু সমালোচকৰ পৰা প্ৰচুৰ প্ৰশংসা আদায় কৰা এই ছবিখনত কীৰ্তিয়ে অমিতাভ বচ্চন আৰু তাপ্‌সী পন্নু সৈতে অভিনয় কৰে৷ ছবিখন ব্যৱসায়িক দিশতো সফল হয়৷ ২০১৭ চনত কীৰ্তিক দেখা যায় ইন্দু সৰকাৰ নামৰ এখনি ৰাজনৈতিক থ্ৰিলাৰধৰ্মী ছবিত৷ মধুৰ ভাণ্ডেৰকাৰে পৰিচালনা কৰা ছবিখনত কীৰ্তিয়ে কেন্দ্ৰীয় চৰিত্ৰত অভিনয় কৰে৷ ২০১৮ চনত কীৰ্তিয়ে ইৰফান খানৰ সৈতে ব্লেকমেইল নামৰ ছবিখনত অভিনয় কৰে৷

২০১৯ চনত কীৰ্তিক দেখা যায় আন এখন সফল ছবি উড়ি:দ্য ছাৰ্জিকেল ষ্ট্ৰাইকত৷ চিৰাত কৌৰ নামেৰে এগৰাকী ভাৰতীয় বায়ু সেনা বিষয়াৰ চৰিত্ৰ ৰূপায়ণ কৰা কীৰ্তিৰ অভিনয়ে দৰ্শক আৰু সমালোচকৰ মন জয় কৰে৷ ছবিখন বক্স অফিচত অভাৱনীয় সাফল্য অৰ্জন কৰে৷ একেটা বৰ্ষতে কীৰ্তিয়ে এমাজন প্ৰাইম ভিডিঅ'ত সম্প্ৰচাৰিত হোৱা ৱেব ছিৰিজ ফ'ৰ ম'ৰ ছটছ প্লিজত এটা গুৰুত্বপূৰ্ণ ভূমিকাত অৱতীৰ্ণ হয়৷ আনহাতে নেটফ্লিক্সযোগে সম্প্ৰচাৰিত হোৱা বাৰ্ড অৱ ব্লাড নামৰ ছিৰিজটোতো কীৰ্তিক দেখা যায়৷ ২০১৯ চনৰ ১৫ আগষ্টত মুক্তি লাভ কৰা মিছন মংগল হৈছে কীৰ্তিয়ে অভিনয় কৰা আন এখন সফল আৰু সমাদৃত ছবি৷ ছবিখনৰ বিষয় হৈছে-ভাৰতৰ মংগল অভিযান৷

২০২০ চনৰ আগষ্ট মাহত, কীৰ্তিয়ে ৰিভু দাসগুপ্তাৰ দ্বাৰা পৰিচালিত ছবি দ্য গাৰ্ল অন দ্য ট্ৰেইনত এগৰাকী আৰক্ষী বিষয়াৰ ভূমিকাত অৱতীৰ্ণ হয়৷ ^১০ ছবিখনত পৰিনীতি চোপ্ৰা, অদিতি ৰাও হায়দৰী, অভিনাশ তিৱাৰী আদিয়ে অভিনয় কৰিছে৷^১১

বঁটা-বাহন