ৰাষ্ট্ৰীয় চিকিৎসক দিৱস

ৰাষ্ট্ৰীয় চিকিৎসক দিৱস হৈছে ব্যক্তি তথা সমাজলৈ চিকিৎসক সকলৰ অৱদানক স্বীকৃতি প্ৰদান কৰি উদযাপন কৰা এক দিৱস বিশেষ। দিনটো চিহ্নিত কৰিবলৈ উদযাপিত স্মৰণীয় অনুষ্ঠানৰ তাৰিখটো ৰাষ্ট্ৰভেদে পৃথক হ'ব পাৰে। কিছুমান দেশত দিনটো বন্ধৰ দিন হিচাপে চিহ্নিত কৰা হয়, যদিও স্বাস্থ্যসেৱা উদ্যোগৰ ৰোগী আৰু হিতাধিকাৰীসকলে তথা স্বাস্থ্য সেৱা সংগঠনবোৰে উদযাপন কৰে।

সমগ্ৰ ভাৰতত, চিকিৎসক তথা পশ্চিমবংগৰ দ্বিতীয়জন মুখ্যমন্ত্ৰী, ড° বিধান চন্দ্ৰ ৰয়ক সন্মান জনোৱাৰ উদ্দেশ্যে ১ জুলাই তাৰিখে ৰাষ্ট্ৰীয় চিকিৎসক দিৱস পালন কৰা হয়।^১ ১৮৮২ চনৰ ১ জুলাইত তেওঁৰ জন্ম হৈছিল আৰু ১৯৬২ চনত ৮০ বছৰ বয়সত একেটা তাৰিখতে তেওঁৰ মৃত্যু হয়।

ইতিহাস

১৯৩৩ চনৰ ২৮ মাৰ্চ তাৰিখে জৰ্জিয়াৰ ৱিণ্ডাৰত প্ৰথম চিকিৎসক দিৱস পালন কৰা হৈছিল। সেই উপলক্ষে চিকিৎসক আৰু তেওঁলোকৰ পত্নী সকললৈ শুভেচ্ছা সূচক কাৰ্ড মেইল কৰা হৈছিল লগতে মৃত চিকিৎসকৰ কবৰত ফুল অৰ্পণ কৰা হৈছিল।^২

আমেৰিকা যুক্তৰাষ্ট্ৰৰ চিনেট আৰু হাউচ অফ ৰিপ্ৰেজেণ্টেটিভছৰ এছ.জে. আৰ.ই.এছ. #৩৬৬, ৰাষ্ট্ৰপতি বুশে ৩০ অক্টোবৰ, ১৯৯০ তাৰিখে স্বাক্ষৰ কৰি গৃহীত কৰিছিল (ৰাজহুৱা আইন ১০১-৪৭৩), আৰু ৩০ মাৰ্চ তাৰিখটো চিকিৎসক দিৱস হিচাপে উদযাপন কৰিবলৈ ৰাষ্ট্ৰীয় বন্ধ হিচাপে মনোনীত কৰিছিল।^৩৪

বিশ্বৰ প্ৰেক্ষাপট

অষ্ট্ৰেলিয়াত, ৰাষ্ট্ৰীয় চিকিৎসক দিৱস উদযাপনৰ দিন ভিন্ন। তেওঁলোকৰ মাজত সাধাৰণতে ৩০ মাৰ্চ তাৰিখেটো বহুল ভাৱে প্ৰচলিত।^৫৬৭ কুৱেইটত, ৰাষ্ট্ৰীয় চিকিৎসক দিৱস ৩ মাৰ্চত উদযাপন কৰা হয়। ^৮ ব্ৰাজিলত, এই দিৱস উদযাপিত হয় ১৮ অক্টোবৰত। এই দিনটো বন্ধৰ দিন হিচাপেও পালন কৰা হয়, ইয়াৰোপৰি উক্ত দিনটোত কেথলিক গীৰ্জাই ছেইণ্ট লুকৰ জন্মদিন উদযাপন কৰে।^৯ কানাডাত ৰাষ্ট্ৰীয় চিকিৎসক দিৱস ১ মে'ত উদযাপন কৰা হয়। কানাডাত চিকিৎসা সেৱা আৰম্ভ কৰা প্ৰথম মহিলা চিকিৎসক এমিলি ষ্ট'ৱেৰ স্বীকৃতিস্বৰূপে কানাডিয়ান মেডিকেল এছ'চিয়েশ্যনে এই তাৰিখটো বাছনি কৰিছিল।^১০ কিউবাত, কাৰ্লোছ জুয়ান ফিনলেৰ জন্মদিন উদযাপন ৰ বাবে ৩ ডিচেম্বৰত ৰাষ্ট্ৰীয় চিকিৎসক দিৱস হিচাপে কিউবা বাসীয়ে বন্ধ হিচাপে এই দিনটো উদযাপন কৰে।^১১ প্ৰতি বছৰে ২৪ অক্টোবৰত ইণ্ডোনেছিয়াত ৰাষ্ট্ৰীয় চিকিৎসক দিৱস উদযাপন কৰা হয়।^১২ দিনটো ইণ্ডোনেচিয়ান ডাক্তৰ্ছ এছ'চিয়েচন (আইডিআই)ৰ জন্মদিন উদযাপনৰ সৈতেও চিহ্নিত কৰা হৈছিল।^১৩ ইৰানত, আভিচেন্নাৰ জন্মদিন(ইৰানী মাহ: চহৰীভাৰ ১ম=২৩ আগষ্ট)টো চিকিৎসকসকলৰ বাবে ৰাষ্ট্ৰীয় দিৱস হিচাপে স্মৰণ কৰা হয়।^১৪১৫ মালয়েছিয়াত, প্ৰতি বছৰে ১০ অক্টোবৰত চিকিৎসক দিৱস পালন কৰা হয়। এই দিনটো প্ৰথমবাৰৰ বাবে ফেডাৰেচন অফ প্ৰাইভেট মেডিকেল প্ৰেক্টিচনাৰ এছ'চিয়েচন, মালয়েছিয়াৰ দ্বাৰা ২০১৪ চনত উদযাপন কৰা হৈছিল।^১৬ তুৰস্কত, ১৯১৯ চনৰ পৰা প্ৰতি বছৰে ১৪ মাৰ্চত ঔষধ দিৱস হিচাপে পালন কৰা হয়।^১৭ ভিয়েটনামে ১৯৫৫ চনৰ ২৮ ফেব্ৰুৱাৰীত প্ৰথম চিকিৎসক দিৱস পালন কৰিছিল। পৰৱৰ্তী সময়ত এই দিৱস ২৭ ফেব্ৰুৱাৰীত উদযাপন কৰা হয় বা কেতিয়াবা এই তাৰিখৰ আটাইতকৈ ওচৰৰ তাৰিখ নিৰ্বাচন কৰা হয়।^১৮ নেপালে নেপালী তাৰিখ ২০ ফালগুন(৪ মাৰ্চ)ত নেপালী ৰাষ্ট্ৰীয় চিকিৎসক দিৱস উদযাপন কৰে। নেপাল মেডিকেল এছ'চিয়েচন স্থাপনৰ পিছৰে পৰা নেপালে প্ৰতি বছৰে এই দিনটো চিকিৎসক দিৱস হিচাপে আয়োজন কৰি আহিছে।^১৯