ৰাধাকান্ত সন্দিকৈ

ৰাধাকান্ত সন্দিকৈ এজন সমাজকৰ্মী, চাহ খেতিয়ক আৰু বিখ্যাত সাহিত্যিক কৃষ্ণকান্ত সন্দিকৈৰ পিতৃ৷ তেখেতৰ স্মৃতিতে গুৱাহাটীস্থিত ৰাধাকান্ত সন্দিকৈ ছোৱালী কলেজৰ প্ৰতিষ্ঠা কৰা হয়৷^১

জন্ম আৰু বংশ পৰিচয়

তেখেতৰ জন্ম হয় ১৮৫৭ চনত শিৱসাগৰ আৰু যোৰহাটৰ মাজতে অৱস্থিত চেটীয়া গাঁৱত৷ পিতৃৰ নাম বোপাৰাম সন্দিকৈ আৰু মাতৃৰ নাম বৰকুকৈ৷ তেখেতৰ পত্নীৰ নাম নাৰায়ণী সন্দিকৈ৷ ^২৩ সন্দিকৈৰ বিবাহৰ চন হৈছে ১৮৯৭৷ তেওঁলোকৰ সন্তানকেইজনৰ নাম হ’ল ক্ৰমে- কৃষ্ণকান্ত সন্দিকৈ, চন্দ্ৰকান্ত সন্দিকৈ লক্ষ্মীকান্ত সন্দিকৈ, ইন্দ্ৰকান্ত সন্দিকৈ আৰু একমাত্ৰ কন্যাৰ নাম অন্নদা সন্দিকৈ৷^১ পত্নী নাৰায়ণী সন্দিকৈ অসমৰ আন এগৰাকী পণ্ডিত লোক পদ্মনাথ গোহাঞি বৰুৱাৰ ভগ্নী আছিল৷

শিক্ষা

তেখেতে শিৱসাগৰ হাইস্কুলৰপৰা ১৮৮১ চনত এণ্ট্ৰেন্স পৰীক্ষাত উত্তীৰ্ণ হৈ কলিকতাৰ চিটি কলেজত বি.এ শ্ৰেণীত নামভৰ্তি কৰে৷ সন্দিকৈয়ে কলিকতা বিশ্ববিদ্যালয়ৰপৰা ১৮৮৩-৮৪ চনত এফ্-এ পৰীক্ষাত উত্তীৰ্ণ হয়৷

চাকৰি জীৱন

বি.এ পৰীক্ষা দিয়াৰ আগতেই অসম চৰকাৰে সন্দিকৈক ছিলঙৰ ডি. এল আৰ. অৰ্থাৎ ডাইৰেক্টৰ অৱ্ লেণ্ড ৰেকৰ্ডছৰ অফিচত কেৰাণীৰ পদত অধিষ্ঠিত কৰে৷ তেওঁ এই পদত পাঁচ বছৰমান চাকৰি জীৱন অতিবাহিত কৰে৷ পৰৱৰ্তী সময়ত একেটা কাৰ্যালয়তে তেখেতে চাব্ ডেপুটি হাকিম পদলৈ উন্নীত হয়৷ ১৯০২ চনত তেখেতে একষ্ট্ৰা এছিছটেণ্ট কমিছনাৰলৈ প্ৰমোচন পায়৷ পৰৱৰ্তী ১৯০২ চনত তেখেতে এছিছটেণ্ট ছেটলমেণ্ট অফিচাৰ হিচাপে প্ৰমোচন পায়৷ যোৰহাট চহৰত ৰাধাকান্ত সন্দিকৈ আৰু জগন্নাথ বৰুৱাই প্ৰথম বিদেশৰপৰা বাইচাইকেল কিনি আনে৷^১

সাহিত্যকৃতি

• মুলাগাভৰু,১৯২৪

সামাজিক অৱদান

তেখেতৰ নেতৃত্বতেই অসম সাহিত্য সভাৰ মূল গৃহ চন্দ্ৰকান্ত সন্দিকৈ ভৱন, পুৰাতত্ত্ব বিভাগৰ কাৰ্যালয় নাৰীয়ণী সন্দিকৈ ভৱন আৰু ৰাধাকান্ত সন্দিকৈ ছোৱালী কলেজৰ প্ৰতিষ্ঠা হয়৷ অসমৰ কেইবাটাও ৰাজহুৱা অনুষ্ঠানৰ উন্নতিকল্পে মুক্তহস্তে দান-বৰঙনি আগবঢ়োৱা হেতুকে জনসাধাৰণে কৃতজ্ঞতাৰ চিনস্বৰূপে ৰাধাকান্ত সন্দিকৈ ডাঙৰীয়াক "দানবীৰ" উপাধিৰে বিভূষিত কৰিছিল।^৪

মৃত্যু

১৯৫২ চনৰ ২৬ জানুৱাৰী তাৰিখ, শনিবাৰে ৰাতি ডেৰ বজাত সন্দিকৈৰ মৃত্যু হয়৷^১