সন্তোষ (২০২৪ চলচ্চিত্ৰ)

সন্তোষ (Santosh) সন্ধ্যা সূৰীৰ দ্বাৰা ৰচিত তথা পৰিচালিত, ২০২৪ চনত মুক্তিপ্ৰাপ্ত, হিন্দী ভাষাৰ এখন অপৰাধমূলক নাট্য চলচ্চিত্ৰ। ছবিখন যুক্তৰাজ্য, ভাৰত, জাৰ্মানী আৰু ফ্ৰান্সৰ এক আন্তঃৰাষ্ট্ৰীয় সহ-প্ৰযোজনা। উত্তৰ ভাৰতৰ গ্ৰামীণ অঞ্চলৰ পটভূমিত নিৰ্মিত এই ছবিখনত অভিনেত্ৰী শ্বাহানা গোস্বামীয়ে এগৰাকী বিধৱা তিৰোতাৰ চৰিত্ৰত অভিনয় কৰিছে; যিয়ে তেওঁৰ প্ৰয়াত স্বামীৰ আৰক্ষী কনিষ্টবলৰ চাকৰিটো উত্তৰাধিকাৰী সূত্ৰে লাভ কৰে।^১২

২০২৪ চনৰ ২০ মে’ তাৰিখে ৭৭তম কান চলচ্চিত্ৰ মহোৎসৱৰ আন চাৰ্টেইন ৰিগাৰ্ড বিভাগত ছবিখনৰ ৱৰ্ল্ড প্ৰিমিয়াৰ অনুষ্ঠিত হৈছিল,^৩৪ য’ত ছবিখনে সমালোচকসকলৰ পৰা ইতিবাচক সমালোচনা লাভ কৰিছিল। ২০২৫ চনৰ ১০ জানুৱাৰী তাৰিখে ছবিখনে ভাৰতৰ ছবিগৃহত মুক্তি লাভ কৰে।^৫ এই ছবিখনক, নেচনেল ব’ৰ্ড অৱ ৰিভিউৰ দ্বাৰা, ২০২৪ চনৰ শীৰ্ষ ৫খন আন্তঃৰাষ্ট্ৰীয় চলচ্চিত্ৰৰ ভিতৰত অন্যতম হিচাপে নিৰ্বাচিত কৰা হয়^৬ আৰু ব্ৰিটিছ লেখক, পৰিচালক তথা প্ৰযোজকৰ দ্বাৰা অসাধাৰণ আত্মপ্ৰকাশৰ শিতানত ৭৮তম বাফটা বঁটাৰ বাবেও মনোনীত হয়।^৭ ইয়াৰ উপৰিও ছবিখন ডিচেম্বৰৰ চৰ্টলিষ্টত স্থান লাভ কৰিছিল আৰু ৯৭তম একাডেমী বঁটা প্ৰদান অনুষ্ঠানত, শ্ৰেষ্ঠ আন্তঃৰাষ্ট্ৰীয় পূৰ্ণদৈৰ্ঘ্যৰ চলচ্চিত্ৰৰ বাবে যুক্তৰাজ্যৰ এণ্ট্ৰি হিচাপে নিৰ্বাচিত হৈছিল।^৮

কাহিনী

ছবিখনত, এগৰাকী ২৮ বছৰীয়া বিধৱা তিৰোতাৰ কাহিনী চিত্ৰিত হৈছে। তিৰোতাগৰাকীয়ে তেওঁৰ প্ৰয়াত স্বামীৰ আৰক্ষী বিষয়াৰ চাকৰিটো লাভ কৰাৰ পিছত এগৰাকী কণমানি ছোৱালীৰ হত্যাকাণ্ডৰ গোচৰৰ তদন্ত কৰিবলগীয়া হয়।

অভিনয় শিল্পী

• সন্তোষ ছাইনীৰ চৰিত্ৰত শ্বাহানা গোস্বামী
• গীতা শৰ্মাৰ চৰিত্ৰত সুনীতা ৰাজৱাৰ
• বেনিৱালৰ চৰিত্ৰত সঞ্জয় বিষ্ণোই
• বিক্ৰমৰ চৰিত্ৰত কুশল দুবে
• ঠাকুৰৰ চৰিত্ৰত নৱল শুক্লা
• প্ৰিয়াৰ চৰিত্ৰত প্ৰতিভা অৱস্থী

প্ৰযোজনা

২০২৩ চনৰ আগষ্ট–অক্টোবৰ মাহত, ভাৰতৰ লক্ষ্ণৌ আৰু ইয়াৰ আশে-পাশে প্ৰায় ৪৫ দিনলৈকে প্ৰধান চিত্ৰগ্ৰহণ কাৰ্যসূচী চলিছিল।^৯

মুক্তি

২০২৪ চনৰ মে’ মাহত ৭৭তম কান চলচ্চিত্ৰ মহোৎসৱত ছবিখনৰ প্ৰিমিয়াৰ হয়। এই ছবিখন মামী মুম্বাই চলচ্চিত্ৰ মহোৎসৱ, ২০২৪-ৰ বাবেও নিৰ্বাচিত হৈছিল, য’ত ই দক্ষিণ এছিয়া প্ৰতিযোগিতা বিভাগৰ অংশ আছিল।^১০ ২০২৫ চনৰ ১০ জানুৱাৰী তাৰিখে, ছবিখনে ভাৰতৰ চিত্ৰগৃহত মুক্তি পায়।^১১

সঁহাৰি

ৰিভিউ এগ্ৰিগেটৰ ৱেবছাইট ৰটেন টমেটোছত, ছবিখনে ৫২ গৰাকী সমালোচকৰ পৰ্যালোচনাৰ ১০০%ই ইতিবাচক সমালোচনা লাভ কৰে; যʼত গড় ৰেটিং আছিল ৭.৫/১০। ৱেবছাইটটোৰ ঐক্যমত বিভাগত এনেদৰে লিখা আছে: "শ্বাহানা গোস্বামীয়ে সন্তোষৰ চৰিত্ৰত অবিস্মৰণীয় তীব্ৰতাৰে সৈতে অভিনয় কৰিছে, যি এটি উৎকণ্ঠাপূৰ্ণ প্ৰক্ৰিয়াগত নাটক হিচাপে সমাজৰ সামাজিক স্তৰক লৈ কঠিন প্ৰশ্ন উত্থাপন কৰে।" ^১২ ওজনযুক্ত গড় ব্যৱহাৰ কৰা ৱেবচাইট, মেটাক্ৰিটিকে ছবিখনক ১৬ গৰাকী সমালোচকৰ ভিত্তিত ১০০ৰ ভিতৰত ৭৫ নম্বৰ দিছিল, যিয়ে এক "সাধাৰণতে অনুকূল" সমালোচনাৰ কথা সূচায়।^১৩

বঁটা-সন্মান