লিচি

লিচি (ইংৰাজী ভাষা: Lissy) এগৰাকী ভাৰতীয় অভিনেত্ৰী, যিয়ে মূলতঃ মালয়ালম ভাষা চলচ্চিত্ৰৰ লগতে কেইখনমান তেলুগু ভাষা, হিন্দী ভাষা, তামিল ভাষা আৰু কন্নড় ভাষা ছবিত অভিনয় কৰিছে। ১৯৮২ চনত ইথিৰি নেৰাম ওথিৰি কাৰ্যম ছবিৰ জৰিয়তে তেওঁ চলচ্চিত্ৰ জগতত আত্মপ্ৰকাশ কৰে। তেওঁৰ উল্লেখযোগ্য চৰিত্ৰসমূহৰ ভিতৰত ওদৰুথাম্মাভা আলৰিয়াম (১৯৮৪), মুথাৰামকুন্নু পি.অ'. (১৯৮৫), বোয়িং বোয়িং (১৯৮৫), থালাবাত্তম (১৯৮৬), বিক্ৰম (১৯৮৬) আৰু চিত্ৰম (১৯৮৮) অন্যতম।

প্ৰাৰম্ভিক জীৱন আৰু শিক্ষা

লিচিৰ জন্ম হৈছিল কোচিৰ পুক্কাত্তুপাড়ীত এটা চিৰো-মালাবাৰ কেথলিক পৰিয়ালত। তেওঁ নেল্লিকাট্টীল পাপাচান (ভাৰ্গীছ)^১ আৰু আলেয়াম্মাৰ একমাত্ৰ সন্তান আছিল। তেওঁ সৰু থাকোঁতেই মাক-দেউতাকৰ বিবাহ বিচ্ছেদ হয় আৰু মাতৃয়েই তেওঁক ডাঙৰ-দীঘল কৰে।^২ তেওঁ কোচিৰ চেন্ট টেৰেছাছ কনভেণ্ট গাৰ্লছ স্কুল আৰু তাৰ পিছত কোচিৰ চেন্ট টেৰেছাছ কলেজত শিক্ষা গ্ৰহণ কৰে।^৩

লিচি এগৰাকী মেধাৱী ছাত্ৰী আছিল আৰু স্কুলীয়া শিক্ষাৰ সময়ত উৎকৃষ্ট নম্বৰ লাভ কৰিছিল। ১৫ বছৰ বয়সত প্ৰাক-বিশ্ববিদ্যালয় ডিগ্ৰীৰ বাবে পঢ়ি থকা সময়তেই তেওঁ চলচ্চিত্ৰত কেৰিয়াৰ আৰম্ভ কৰে। কেৰিয়াৰত মনোনিৱেশ কৰিবলৈ তেওঁ পঢ়াশুনা আধাতে এৰিবলগীয়া হৈছিল।^৪ পৰৱৰ্তী সময়ত তেওঁ শৈক্ষিক যাত্ৰা পুনৰ আৰম্ভ কৰে আৰু দূৰৱৰ্তী শিক্ষাৰ জৰিয়তে আন্নামালাই বিশ্ববিদ্যালয়ৰ পৰা মনোবিজ্ঞান বিষয়ত স্নাতকোত্তৰ ডিগ্ৰী লাভ কৰে।

কেৰিয়াৰ

১৯৮০ চনৰ আৰম্ভণিতে তেওঁ চলচ্চিত্ৰ জগতত খোজ পেলায়। মালয়ালম ছবিৰ লগতে লিচিয়ে কেইবাখনো তামিল আৰু তেলুগু ছবিতো অভিনয় কৰিছিল। চিত্ৰম, থালাবাত্তম, ওদৰুথাম্মাভা অলৰিয়াম, মুথাৰামকুন্নু পি.অ'. আৰু বোয়িং বোয়িং ছবিত কৰা অভিনয়ৰ বাবে লিচিক আটাইতকৈ বেছি স্মৰণ কৰা হয়। মনম মেগাজিনক দিয়া এক সাক্ষাৎকাৰত তেওঁ উল্লেখ কৰা অনুসৰি, কামাল হাছানৰ প্ৰযোজনাৰ ছবি বিক্ৰমত তেওঁৰ নায়িকা হিচাপে কমল হাছনেই তেওঁক তামিল ছবিত পৰিচিত কৰাইছিল।^৫

ব্যক্তিগত জীৱন

প্ৰখ্যাত চলচ্চিত্ৰ পৰিচালক প্ৰিয়দৰ্শনৰ সৈতে প্ৰেমৰ সম্পৰ্কৰ অন্তত ১৯৯০ চনৰ ১৩ ডিচেম্বৰত তেওঁলোকৰ বিবাহ সম্পন্ন হয়।^৬ বিবাহৰ পিছত তেওঁ অভিনয় জীৱন ত্যাগ কৰে আৰু ধৰ্মীয় কাৰণত লক্ষ্মী নাম গ্ৰহণ কৰে।^৭ পুত্ৰ সিদ্ধাৰ্থৰ জন্মৰ পিছত তেওঁ কেথলিক ধৰ্মৰ পৰা হিন্দু ধৰ্মলৈ ধৰ্মান্তৰিত হয়।^৮

লিচিয়ে ২০১৪ চনৰ ১ ডিচেম্বৰত চেন্নাইৰ এখন পাৰিবাৰিক আদালতত বিবাহ বিচ্ছেদৰ আৱেদন দাখিল কৰে^৯ আৰু ২৬ বছৰীয়া বৈবাহিক জীৱনৰ অন্তত ২০১৬ চনৰ ১ ছেপ্টেম্বৰত তেওঁলোকৰ বিবাহ বিচ্ছেদ হয়।^১০

চলচ্চিত্ৰপঞ্জী

মালয়ালম

তেলেগু

তামিল

কন্নড়

হিন্দী

বাহ্যিক সংযোগ

• Lizzy at MSI (archive copy)