মোনাল গজ্জৰ

মোনাল গজ্জৰ (Monal Gajjar) এগৰাকী ভাৰতীয় অভিনেত্ৰী আৰু মডেল যিয়ে প্ৰধানকৈ গুজৰাটী ভাষা আৰু তেলুগু ভাষা চলচ্চিত্ৰৰ লগতে কেইখনমান তামিল ভাষা ছবিত অভিনয় কৰে। তেওঁ ২০১২ চনৰ তেলুগু ভাষা চলচ্চিত্ৰ সুদিগাডুৰ জৰিয়তে অভিনয় জীৱনৰ পাতনি মেলে। তেওঁ ২০২১ চনত সতীশ কৌশিক পৰিচালিত হিন্দী ভাষা চলচ্চিত্ৰ কাগজতো অভিনয় কৰিছে, যিখন ভাৰতীয় চৰকাৰী ব্যৱস্থাৰ ওপৰত এক ব্যংগধৰ্মী ছবি।

জীৱন আৰু কৰ্মজীৱন

গজ্জৰৰ জন্ম হৈছিল ১৩ মে'ত^১ গুজৰাটৰ আহমেদাবাদৰ এটা গুজৰাটী ভাষা পৰিয়ালত।^২৩ বাণিজ্য শাখাত স্নাতক ডিগ্ৰী লাভ কৰি থকাৰ সময়তে তেওঁ আই.এন.জি বৈশ্য বেংকত কাম কৰিবলৈ আৰম্ভ কৰে।^৪ নিজৰ যোগ গুৰুৰ পৰামৰ্শ অনুসৰি গজ্জৰে ২০১১ চনত ৰেডিঅ' মিৰ্চিৰদ্বাৰা আয়োজিত 'মিৰ্চি কুইন বি' সৌন্দৰ্য প্ৰতিযোগিতাত অংশগ্ৰহণ কৰে^৪ আৰু বিজয়ীৰ খিতাপ অৰ্জন কৰে।^৫ পিছলৈ তেওঁ 'মিছ গুজৰাট' খিতাপো লাভ কৰিছিল।^৬

প্ৰথমখন ছবি মুক্তি পোৱাৰ আগতেই গজ্জৰে তামিল আৰু তেলুগু ভাষা ছবিসহ পাঁচখন ছবিত অভিনয়ৰ বাবে চুক্তিবদ্ধ হৈছিল। তেওঁ ড্ৰাকুলা ২০১২ ছবিৰ জৰিয়তে মালয়ালম ভাষা চলচ্চিত্ৰত আত্মপ্ৰকাশ কৰে।^৭ তেওঁ আশা ভোঁচলেৰ ছবিতো এটা বিশেষ চৰিত্ৰত অভিনয় কৰিছে। তেওঁৰ প্ৰথম দুখন তামিল ছবি ৱানভাৰায়ন ৱাল্লাভাৰায়ন^৮ আৰু চিকাৰাম থোডু একেদিনাই মুক্তি পাইছিল।

চিকাৰাম থোডুত কৰা অভিনয়ৰ বাবে গজ্জৰে ভাল পৰ্যালোচনা লাভ কৰিছিল। IndiaGlitz.com-ৰ পৰ্যালোচনাত কোৱা হৈছিল যে মোনালক দেখিবলৈ ধুনীয়া হোৱাৰ লগতে তেওঁৰ অভিনয়ো সুন্দৰ।^৯ ৱানভাৰায়ন ৱাল্লাভাৰায়নৰ বাবেও তেওঁ প্ৰশংসা লাভ কৰিছিল। Behindwoods.com-ৰ পৰ্যালোচনাত কোৱা হৈছিল যে মোনাল গজ্জৰ দেখিবলৈ অতি ধুনীয়া আৰু তামিলনাডুৰ পৰৱৰ্তী গ্লেমাৰ চেন্সেশ্যন হোৱাৰ সকলো গুণ তেওঁৰ মাজত আছে। তেওঁ ছবিখনত দৰ্শনীয় অভিনয় কৰিছে।^১০

২০২০ চনৰ ছেপ্টেম্বৰ মাহত গজ্জৰে তেলুগু ভাষা ৰিয়েলিটী শ্ব' বিগ বছ ৪-ত অন্যতম প্ৰতিযোগী হিচাপে অংশগ্ৰহণ কৰে।^১১ ডিচেম্বৰ মাহত চূড়ান্ত সপ্তাহৰ আগতে তেওঁ এই অনুষ্ঠানৰপৰা বাহিৰ হয়।^১২