মনু ভাকৰ

মনু ভাকৰ এগৰাকী ভাৰতীয় শ্বুটাৰ। তেওঁ ২০১৮ চনত মেক্সিকোৰ গুৱাদালাজাৰাত অনুষ্ঠিত আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত মহিলাৰ শ্বুটিং প্ৰতিযোগিতাত ভাৰতক প্ৰতিনিধিত্ব কৰি দুটা সোণৰ পদক লাভ কৰিছিল। আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত সোণৰ পদক লাভ কৰা তেওঁ কনিষ্ঠতম ভাৰতীয় শ্বুটাৰ।^১ ২০১৮ চনৰ অষ্ট্ৰেলিয়াৰ গোল্ডকষ্টত অনুষ্ঠিত কমনৱেলথ গেমছত মনু ভাকৰে পোন প্ৰথমবাৰৰ বাবে অৱতীৰ্ণ হৈ ১৬ বছৰ বয়সতে সোণৰ পদক লাভ কৰিছিল।^২৩ ২০১৮ চনৰ আৰ্জেণ্টিনাৰ ৰাজধানী বিউনছ আইৰেছত অনুষ্ঠিত হোৱা যুৱ অলিম্পিকত তেওঁ সোণৰ পদক লাভ কৰে। ইয়াৰ লগতে তেওঁ যুৱ অলিম্পিকত সোণৰ পদক লাভ কৰা প্ৰথম গৰাকী ভাৰতীয় মহিলাত পৰিগণিত হয়। ২০১৯ চনত ভাৰতৰ নতুন দিল্লীত অনুষ্ঠিত হোৱা আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত তেওঁ পুনৰাই সোণৰ পদক লাভ কৰে। ২০২৪ চনত পেৰিছত অনুষ্ঠিত হোৱা গ্ৰীষ্মকালীন অলিম্পিকত তেওঁ দুটা ব্ৰঞ্জৰ পদক লাভ কৰে। প্ৰতিযোগিতাখনত প্ৰথমে তেওঁ মহিলাৰ ১০ মিটাৰ এয়াৰ পিষ্টল ইভেণ্টত ব্ৰঞ্জৰ পদক লাভ কৰে, ফলত তেওঁ ভাৰতৰ পৰা যিকোনো অলিম্পিকত পদক লাভ কৰা প্ৰথমগৰাকী মহিলা শ্বুটাৰ হিচাপে পৰিগণিত হয়।^৪ ইয়াৰ পিছত তেওঁ ১০ মিটাৰ এয়াৰ পিষ্টল মিশ্ৰিত শাখাত শ্বুটাৰ সৰবজ্যোত সিঙৰ সৈতে ব্ৰঞ্জৰ পদক লাভ কৰে।^৫ ইয়াৰ ফলত তেওঁ অলিম্পিকত ২টা পদক লাভ কৰা প্ৰথমগৰাকী ভাৰতীয় মহিলা আৰু ভাৰতৰ স্বাধীনতাৰ পিছত অলিম্পিকত ২টা পদক লাভ কৰা প্ৰথমগৰাকী ভাৰতীয় হিচাপে পৰিগণিত হয়।

প্ৰাৰম্ভিক জীৱন

২০০২ চনৰ ১৮ ফেব্ৰুৱাৰী তাৰিখে হাৰিয়ানাৰ ঝজ্জৰ জিলাৰ গৰীয়া গাঁৱত মনু ভাকৰৰ জন্ম হৈছিল।^৬ তেওঁৰ পিতৃ ৰাম কিচন ভাকৰ মাৰ্চেণ্ট নেভীত মুখ্য অভিযন্তা হিচাপে কৰ্মৰত।^৬ তেওঁ ১৪ বছৰ বয়সৰ লৈকে আন আন খেল যেনে মণিপুৰৰ মাৰ্চিয়েল আৰ্ট হুয়েন লাংলন, বক্সিং‌, টেনিছ আৰু স্কেটিং খেলিছিল। এই গোটেইবোৰ খেলতেই তেওঁ ৰাষ্ট্ৰীয় ক্ৰীড়া মহোৎসৱত পদক লাভ কৰিছিল।^৬ পিছলৈ তেওঁ শ্বুটিঙৰ প্ৰতি আকৰ্ষিত হয়।

কৰ্মজীৱন

মনুৰ দেউতাকৰ ১৫০০০০ টকা বিনিয়োগৰ পিছত^৬ তেওঁ প্ৰতিযোগিতামূলক শ্বুটিং বাছনি কৰিছিল। ২০১৭ চনত তেওঁ প্ৰথমবাৰৰ বাবে আন্তৰ্জাতিক স্তৰৰ এছিয়ান জুনিয়ৰ চেম্পিয়নশ্বিপত ৰূপৰ পদক অৰ্জন কৰিছিল। ২০১৭ চনত কেৰালাত অনুষ্ঠিত ৰাষ্ট্ৰীয় ক্ৰীড়া মহোৎসৱত তেওঁ ৯টা সোণৰ পদক লাভ কৰিছিল।^৭ তেওঁ কেইবাবাৰো বিশ্বকাপত পদক বিজয়ী হীনা সিন্ধুক হেৰুৱাইছিল আৰু হীনাৰ ৰাষ্ট্ৰীয় ৰেকৰ্ড ভংগ কৰিছিল।^৬

২০১৮ চনৰ মেক্সিকোৰ গুৱাদালাজাৰাত অনুষ্ঠিত আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত তেওঁ মহিলাৰ ১০ মিটাৰ এয়াৰ পিষ্টল শাখাত সোণৰ পদক অৰ্জন কৰে।^৮ ১৬ বছৰত আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত সোণৰ পদক অৰ্জন কৰি মনু এই প্ৰতিযোগিতাত সোণৰ পদক লাভ কৰা কনিষ্ঠতম ভাৰতীয়ত পৰিগণিত হল।^১৯ একে প্ৰতিযোগিতাৰ ১০ মিটাৰ এয়াৰ পিষ্টল মিশ্ৰিত শাখাত মনু আৰু ঔম প্ৰকাশ মিঠাৰৱলে সোণৰ পদক লাভ কৰে।^{১০১১১২১৩}

মনুয়ে ২০১৮ চনত অষ্ট্ৰেলিয়াৰ গোল্ডকষ্টত অনুষ্ঠিত কমনৱেলথ গেমছত ১০ মিটাৰ এয়াৰ পিষ্টল শাখাত সোণৰ পদক লাভ কৰে। ২৪০.৯ পইণ্ট অৰ্জন কৰি এক নতুন কমনৱেলথ ৰেকৰ্ড স্থাপন কৰে।^{১৪১৫১৬}

২০১৮ চনত ইণ্ডোনেছিয়াৰ ৰাজধানী জাকাৰ্টাত অনুষ্ঠিত এছিয়ান গেমছত ২৫ মিটাৰ এয়াৰ পিষ্টল ইভেণ্টত ৫৯৩ পইণ্টৰে অগ্ৰগতি লাভ কৰে যদিও মূল প্ৰতিযোগিতাত তেওঁ ষষ্ঠ স্থান লাভ কৰিছিল।

২০১৮ চনত আৰ্জেণ্টিনাৰ ৰাজধানী বিউনছ আইৰেছত অনুষ্ঠিত যুৱ অলিম্পিকত তেওঁ ২৩৬.৫ পইণ্টৰে ১০ মিটাৰ এয়াৰ পিষ্টল ইভেণ্টৰ শীৰ্ষত থাকে। তেওঁ এই প্ৰতিযোগিতাত ভাৰতৰ ধ্বজাবাহক আছিল। ১৬ বছৰীয়া মনু যুৱ অলিম্পিকত সোণৰ পদক লাভ কৰা প্ৰথম গৰাকী ভাৰতীয় মহিলাত পৰিগণিত হয়।

২০১৯ চনৰ ফেব্ৰুৱাৰী মাহত ভাৰতৰ নতুন দিল্লীত অৱস্থিত আন্তৰ্জাতিক শ্বুটিং স্পৰ্টছ ফেডাৰেচন বিশ্বকাপত তেওঁ মহিলাৰ ১০ মিটাৰ এয়াৰ পিষ্টল মিশ্ৰিত শাখাত সোণৰ পদক অৰ্জন কৰে।^১৭১৮

২০২৪ চনত পেৰিছত অনুষ্ঠিত হোৱা গ্ৰীষ্মকালীন অলিম্পিকত তেওঁ দুটা ব্ৰঞ্জৰ পদক লাভ কৰে। তেওঁ মহিলাৰ ১০ মিটাৰ এয়াৰ পিষ্টল ইভেণ্টত ব্ৰঞ্জৰ পদক^৪ আৰু ১০ মিটাৰ এয়াৰ পিষ্টল মিশ্ৰিত শাখাত ব্ৰঞ্জৰ পদক লাভ কৰে।^৫