মণি ৰত্নম

মণি ৰত্নম (Mani Ratnam; জন্ম: জুন ২, ১৯৫৬) এগৰাকী ভাৰতীয় চলচ্চিত্ৰ পৰিচালক, প্ৰযোজক আৰু চিত্ৰনাট্যকাৰ। তেখেত মূলতঃ তামিল ভাষাৰ চলচ্চিত্ৰৰ লগতে কেইখনমান হিন্দী, তেলেগু, মালয়ালম আৰু কানাড়া ছবিৰ কাম কৰিছে।^১

তেওঁ সাতটা ৰাষ্ট্ৰীয় চলচ্চিত্ৰ বঁটা, চাৰিটা ফিল্মফেয়াৰ বঁটা, ছটা ফিল্মফেয়াৰ এৱাৰ্ড চাউথ,^২ আৰু সমগ্ৰ বিশ্বৰ বিভিন্ন চলচ্চিত্ৰ মহোৎসৱত অসংখ্য বঁটা লাভ কৰিছে। ২০০২ চনত ভাৰত চৰকাৰে তেওঁক চলচ্চিত্ৰ ক্ষেত্ৰলৈ আগবঢ়োৱা অৱদানৰ স্বীকৃতি হিচাপে পদ্মশ্ৰী বঁটাৰে সম্বৰ্ধনা জনায়।

চলচ্চিত্ৰৰ লগত জডি়ত পৰিয়ালত জন্ম গ্ৰহণ কৰাৰ পিছতো মণিৰত্নমে সৰুতে ছবিৰ প্ৰতি কোনো আগ্ৰহ গঢ়ি তুলিব পৰা নাছিল।^৩ মেনেজমেণ্টৰ স্নাতকোত্তৰ শিক্ষা সম্পূৰ্ণ কৰাৰ পিছত তেওঁ পৰামৰ্শদাতা হিচাপে নিজৰ কেৰিয়াৰ আৰম্ভ কৰে।^৩ ১৯৮৩ চনত কানাড়া ছবি পল্লৱ অনু পল্লৱীৰ জৰিয়তে তেওঁ চলচ্চিত্ৰ জগতত প্ৰৱেশ কৰে। তেলেগু আৰু মালয়ালম চিনেমাত কাম কৰাৰ পিছত তেওঁ মৌনা ৰাগম (১৯৮৬) ছবিৰে তেওঁৰ ডাঙৰ অগ্ৰগতি লাভ কৰে, এই ছবিখনে‍ তেওঁক তামিল চিনেমাৰ এগৰাকী আগশাৰীৰ চলচ্চিত্ৰ নিৰ্মাতা হিচাপে প্ৰতিষ্ঠা কৰে আৰু তেওৈঁল প্ৰথম ফিল্মফেয়াৰ শ্ৰেষ্ঠ পৰিচালক বঁটা কঢিয়াই আনে।

তেওঁৰ প্ৰতিখন ছবিতে নিজস্ব সুকীয়া শৈলী আছে, সুন্দৰ চিত্ৰায়নৰ গীত আৰু অনন্য বেক-লাইটিং তেওঁৰ চিনেমাৰ গুৰুত্বপূৰ্ণ দিশ।

প্ৰাৰম্ভিক জীৱন

১৯৫৬ চনৰ ২ জুনত তামিলনাডুৰ মাদুৰাইত চলচ্চিত্ৰ নিৰ্মাণৰ সৈতে ওতপ্ৰোতভাৱে জড়িত তামিল ব্ৰাহ্মণ পৰিয়ালৰ দ্বিতীয় সন্তান হিচাপে জন্মগ্ৰহণ কৰিছিল মণিৰত্নমে।^৪৫৬ তেখেতৰ পিতৃ এছ গোপালৰত্নম এজন চলচ্চিত্ৰ বিতৰক আছিল আৰু তেওঁ ভেনাছ পিকচাৰ্ছৰ বাবে‍ কাম কৰিছিল^৭ আনহাতে তেওঁৰ খুড়াক "ভেনাচ" কৃষ্ণমূৰ্তি আছিল এজন চলচ্চিত্ৰ প্ৰযোজক। তেওঁৰ ডাঙৰ ভাতৃ জি ভেংকটেশ্বৰনে‍ (মৃত্যু ২০০৩) তেওঁৰ কিছু ছবি প্ৰযোজনা কৰিবলৈ আগবাঢ়ি গৈছিল।^৭৮৯ জি ভেংকটেশ্বৰৰ দৰে তেওঁৰ কনিষ্ঠ ভাতৃ জি শ্ৰীনিবাসনেও (মৃত্যু ২০০৭ তেওঁৰ কিছু ছবিৰ সহ-প্ৰযোজনা কৰিছিল।^১০

মণি ৰত্নম মাদ্ৰাজ (বৰ্তমান চেন্নাই)ত ডাঙৰ-দীঘল হৈছিল,^১১ ভাই-ভনী আৰু ভতিজাকহঁতৰ সৈতে। চলচ্চিত্ৰৰ লগত জডি়ত পৰিয়ালত ডাঙৰ-দীঘল হোৱাৰ পিছতো বয়োজ্যেষ্ঠসকলে নিষিদ্ধ বুলি গণ্য কৰাৰ বাবে শিশুসকলক ছবি চাবলৈ দিয়া নহৈছিল।^১২

স্কুলীয়া শিক্ষা সমাপ্ত কৰাৰ লগে লগে তেওঁ মাদ্ৰাজ বিশ্ববিদ্যালয়ৰ অন্তৰ্গত ৰামকৃষ্ণ মিছন বিবেকানন্দ মহাবিদ্যালয়ৰ পৰা বাণিজ্য শাখাত স্নাতক ডিগ্ৰী লাভ কৰে। পিছলৈ তেওঁ মুম্বাইৰ জামনালাল বাজাজ ইনষ্টিটিউট অৱ মেনেজমেণ্ট ষ্টাডিজৰ পৰা বিত্তীয় বিষয়ত স্নাতকোত্তৰ ডিগ্ৰী লাভ কৰে।^৮ ১৯৭৭ চনত স্নাতকোত্তৰ শিক্ষা সমাপ্ত কৰাৰ পিছত তেওঁ মাদ্ৰাজৰ এটা প্ৰতিষ্ঠানত মেনেজমেণ্ট কনচালটেণ্ট হিচাপে নিযুক্তি লাভ কৰে, আৰু তাত কিছুদিন কাম কৰে।^৮

ব্যক্তিগত জীৱন

১৯৮৮ চনৰ ২৬ আগষ্টত ৰত্নমে অভিনেত্ৰী সুহাসনীৰ সৈতে বিবাহপাশত আৱদ্ধ হয়।^১৩ দম্পতীহালৰ এটি‍ পুত্ৰ আছে।^১৪ পৰিয়ালটো চেন্নাইৰ আলৱাৰপেটত বাস কৰে, য’ৰ পৰা তেওঁ নিজৰ প্ৰডাকচন কোম্পানী মাদ্ৰাজ টকিছ চলায়।^১৫১৬

১৯৯৫ চনত মণিৰত্নমক তেওঁৰ ছবি বম্বে য'ত এজন হিন্দু পুৰুষৰ সৈতে‍ এগৰাকী মুছলমান মহিলাৰ ৰোমাঞ্চ চিত্ৰিত কৰাক বিৰোধিতা কৰি ইছলামিক উগ্ৰপন্থী বুলি আৰক্ষীয়ে সন্দেহ কৰা আক্ৰমণকাৰীয়ে ঘৰতে বনোৱা বোমা নিক্ষেপ কৰি আক্ৰমণ কৰাৰ পিছত তেওঁ আহত হয় আৰু চিকিৎসালয়ত ভৰ্তি হয়।^১৭

বঁটা আৰু সন্মান

বিশ্বৰ বিভিন্ন চলচ্চিত্ৰ মহোৎসৱ যেনে টৰন্টো আন্তঃৰাষ্ট্ৰীয় চলচ্চিত্ৰ মহোৎসৱ, বুছান আন্তৰ্জাতিক চলচ্চিত্ৰ মহোৎসৱ, টকিঅ’ ফিল্মেক্স আৰু বাৰ্মিংহাম আন্তঃৰাষ্ট্ৰীয় চলচ্চিত্ৰ মহোৎসৱত তেওঁৰ ছবিসমূহ পুৰ্বদৃষ্টিৰে সুপৰিচিত হৈ উঠে৷^১৮ তেওঁৰ ছবিসমূহ ভেনিচ চলচ্চিত্ৰ মহোৎসৱ, ৰটাৰডেম চলচ্চিত্ৰ মহোৎসৱ, মণ্ট্ৰিয়েল বিশ্ব চলচ্চিত্ৰ মহোৎসৱ আৰু পাম স্প্ৰিংছ আন্তঃৰাষ্ট্ৰীয় চলচ্চিত্ৰ মহোৎসৱ আদি বহু চলচ্চিত্ৰ মহোৎসৱত নিয়মিতভাৱে প্ৰদৰ্শিত হৈ আহিছে৷^১৮ তেওঁৰ দুখন ছবি ৰোজা আৰু বম্বেয়ে ৰাষ্ট্ৰীয় সংহতিৰ শ্ৰেষ্ঠ বৈশিষ্ট্যপূৰ্ণ ছবিৰ নাৰ্গিছ দত্ত বঁটা লাভ কৰিছে। প্ৰথমখন ১৮ সংখ্যক মস্কো আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ চলচ্চিত্ৰ শাখাৰ বাবেও মনোনীত হৈছিল।^১৯ ২০১০ চনত ৬৭ সংখ্যক ভেনিচ আন্তঃৰাষ্ট্ৰীয় চলচ্চিত্ৰ মহোৎসৱত মণিক জেগাৰ-লেক’ল্টৰ গ্ল’ৰী টু দ্য ফিল্মমেকাৰেৰে সন্মানিত কৰা হয়।^২০২১ ২০১৫ চনৰ জুলাই মাহত আন্তঃৰাষ্ট্ৰীয় চিনেমালৈ আগবঢ়োৱা সন্মানীয় অৱদানৰ বাবে বাগৰি ফাউণ্ডেশ্যন লণ্ডন ইণ্ডিয়ান ফিল্ম ফেষ্টিভেলত ছান মাৰ্ক লাইফটাইম এচিভমেণ্ট বঁটাৰে সন্মানিত হয়।^২২ প্ৰায় একে সময়তে নিউয়ৰ্ক চহৰৰ মিউজিয়াম অৱ দ্য মুভিং ইমেজত মণিক বিশেষ শ্ৰদ্ধাঞ্জলি জনোৱা হয়। তেওঁৰ ছবি ৰোজা, বম্বে, আৰু দিল ছে সংগ্ৰহালয়ত পুৰ্বদৃষ্টি হিচাপে প্ৰদৰ্শিত হৈছিল।^২৩