বৈভৱ সূৰ্যবংশী

বৈভৱ সূৰ্যবংশী (Vaibhav Suryavanshi,জন্ম: ২৭ মাৰ্চ ২০১১) এজন ভাৰতীয় ক্ৰিকেটাৰ। তেওঁ বিহাৰৰ হৈ ঘৰুৱা ক্ৰিকেট আৰু ৰাজস্থান ৰয়েলছৰ হৈ ইণ্ডিয়ান প্ৰিমিয়াৰ লীগ খেলে। বাওঁহতীয়া বেটছমেন হিচাপে ২০২৪ চনৰ জানুৱাৰী মাহত তেওঁ প্ৰথম শ্ৰেণীৰ খেলত অভিষেক ঘটায়। তেওঁ ভাৰতীয় লিষ্ট এ আৰু ইণ্ডিয়ান প্ৰিমিয়াৰ লীগত অভিষেক ঘটোৱা আটাইতকৈ কম বয়সীয়া ক্ৰিকেটাৰ।

প্ৰাৰম্ভিক জীৱন

২০১১ চনৰ ২৭ মাৰ্চত ভাৰতৰ বিহাৰৰ সমষ্টিপুৰ জিলাৰ তাজপুৰত সূৰ্যবংশীৰ জন্ম হৈছিল। চাৰি বছৰ বয়সৰ পৰাই তেওঁ ক্ৰিকেট খেলিবলৈ আৰম্ভ কৰে। প্ৰথমতে পিতৃয়ে তেওঁৰ প্ৰশিক্ষক হিচাপে কাম কৰিছিল। তাৰ পিছত ন বছৰ বয়সত সমষ্টিপুৰৰ এখন ক্ৰিকেট একাডেমীত তেওঁ যোগদান কৰে। তেওঁৰ পিতৃৰ নাম সঞ্জীৱ সূৰ্যবংশী। পিতৃয়ে তেওঁক সমষ্টিপুৰৰ পৰা পাটনাস্থিত ক্ৰিকেট একাডেমীলৈ অনা-নিয়া কৰিছিল। ক্ৰিকেটত সহযোগিতাৰ বাবে তেওঁ কৃষিভূমিও বিক্ৰী কৰি দিছিল। ^{১ ২}

যুৱ কেৰিয়াৰ

বৈভৱ সূৰ্যবংশীয়ে ১২ বছৰীয়া হিচাপে বিহাৰৰ ১৯ বছৰ অনূৰ্ধ্ব দলৰ হৈ ভিনু মানকাড় ট্ৰফী খেলিছিল।^৩৪

২০২৪ চনৰ জানুৱাৰী মাহত তেওঁ ১২ বছৰ আৰু ২৮৪ দিন বয়সত মুম্বাইৰ বিৰুদ্ধে বিহাৰৰ হৈ প্ৰথম শ্ৰেণীৰ অভিষেক ঘটায়।^৫৬ ইয়াৰ জৰিয়তে তেওঁ বিহাৰৰ হৈ ৰঞ্জী ট্ৰফী খেলা দ্বিতীয়জন কনিষ্ঠ ক্ৰিকেটাৰ হিচাপে পৰিগণিত হয় আৰু সামগ্ৰিকভাৱে চতুৰ্থ সৰ্বকনিষ্ঠ ক্ৰিকেটাৰ হিচাপে পৰিগণিত হয়।^৭ যুৱৰাজ সিঙৰ অভিলেখ (১৫ বছৰ আৰু ৫৭ দিন) অতিক্ৰম কৰি তেওঁ আধুনিক যুগৰ আটাইতকৈ কম বয়সীয়া খেলুৱৈ হিচাপে পৰিগণিত হয়। ১৯৪২-৪৩ চনৰ ছিজনত ক্ৰিকেটাৰ আলিমুদ্দিনে-এ ১২ বছৰ আৰু ৭৩ দিনত ক্ৰিকেটত অভিষেক কৰি এটা অভিলেখ কৰি থৈছিল। ^৮

২০২৪ চনৰ নৱেম্বৰ মাহত তেওঁ ৰাজস্থানৰ বিৰুদ্ধে বিহাৰৰ হৈ অভিষেক ঘটোৱাৰ সময়ত ১৩ বছৰ আৰু ২৪১ দিন বয়সত টি-২০ ক্ৰিকেটত অভিষেক ঘটোৱা আটাইতকৈ কম বয়সীয়া খেলুৱৈ হিচাপে পৰিগণিত হয়।^৯১০

২০২৪ চনৰ ডিচেম্বৰ মাহত তেওঁ 'লিষ্ট এ' ক্ৰিকেট খেলা আটাইতকৈ কম বয়সীয়া ভাৰতীয় খেলুৱৈ হিচাপে পৰিগণিত হয়। তেওঁ ১৩ বছৰ ২৬৯ দিন বয়সত মধ্যপ্ৰদেশৰ বিৰুদ্ধে ২০২৪–২৫ চনৰ বিজয় হাজাৰে ট্ৰফীত বিহাৰৰ হৈ খেলিছিল।^১১১২

২০২৩ চনত সূৰ্যবংশীয়ে ইণ্ডিয়া বি অনূৰ্ধ্ব-১৯ দলৰ হৈ চতুৰ্ভুজ শৃংখলাত খেলিছিল আৰু দুটা অৰ্ধশতককে ধৰি ছটা ইনিংছত ১৭৭ ৰান সংগ্ৰহ কৰিছিল।^৪

২০২৪ চনৰ ছেপ্তেম্বৰ মাহত তেওঁ ১৯ বছৰ অনূৰ্ধ্বৰ ভাৰতৰ হৈ অষ্ট্ৰেলিয়াৰ ১৯ বছৰ অনূৰ্ধ্বৰ বিৰুদ্ধে খেলত অভিষেক ঘটায়।^১৩ ১৯ বছৰ অনূৰ্ধ্বৰ টেষ্টত অভিষেক ঘটোৱাৰ সময়ত তেওঁ ৫৮ বলৰ শতক অৰ্জন কৰিছিল, যিটো ভাৰতৰ ১৯ বছৰ অনূৰ্ধ্বৰ খেলুৱৈৰ বাবে আটাইতকৈ দ্ৰুততম আছিল। তাৰ পিছত তেওঁ ১০৪ ৰানত ৰান আউট হৈছিল।^১৪১৫ ১৯ বছৰৰ তলৰ আন্তঃৰাষ্ট্ৰীয় ক্ৰিকেটৰ এইটো আছিল দ্বিতীয় দ্ৰুততম শতক।^১৬

২০২৪ চনৰ এচিচি ১৯ অনূৰ্ধ্ব এছিয়া কাপত সূৰ্যবংশীয়ে ইউএইৰ ১৯ বছৰ অনূৰ্ধ্বৰ বিৰুদ্ধে ৪৬টা বলত ৭৬ ৰান সংগ্ৰহ কৰে।^১৭ তাৰ পিছত ছেমি ফাইনেলত শ্ৰীলংকাৰ বিৰুদ্ধে ৩৬টা বলত ৬৭ ৰান সংগ্ৰহ কৰে।^১৮

ফ্ৰেঞ্চাইজি কেৰিয়াৰ

২০২৪ চনৰ নৱেম্বৰ মাহত সূৰ্যবংশী ইণ্ডিয়ান প্ৰিমিয়াৰ লীগৰ চুক্তিত স্বাক্ষৰ কৰা আটাইতকৈ কম বয়সীয়া খেলুৱৈ হিচাপে পৰিগণিত হয়, যেতিয়া ৰাজস্থান ৰয়েলছে তেওঁক ১৩ বছৰ বয়সত ১.১ কোটি টকা(১ লাখ ৩০ হাজাৰ মাৰ্কিন ডলাৰ)ৰ বিনিময়ত ক্ৰয় কৰে।^১৯

২০২৫ চনৰ ১৯ এপ্ৰিলত ১৪ বছৰ ২৩ দিন বয়সত লক্ষ্ণৌ ছুপাৰ জায়েণ্টছৰ বিৰুদ্ধে ৰাজস্থান ৰয়েলছৰ হৈ আই পি এলত অভিষেক ঘটোৱা সূৰ্যবংশী আই পি এলৰ ইতিহাসৰ সৰ্বকনিষ্ঠ খেলুৱৈ হিচাপে পৰিগণিত হয়।^২০ উল্লেখযোগ্য যে এই প্ৰতিযোগিতাখনৰ জন্মবৰ্ষ ২০০৮ চনৰ পিছত জন্ম হোৱা তেওঁ প্ৰথমজন আই পি এল খেলুৱৈ।^২১

২০২৫ চনৰ ২৮ এপ্ৰিলত গুজৰাট টাইটানছৰ বিৰুদ্ধে খেলখনত ১৪ বছৰ ৩২ দিন বয়সতে শতক অৰ্জন কৰি সূৰ্যবংশী আই পি এলৰ ইতিহাসত শতক অৰ্জন কৰা সৰ্বকনিষ্ঠ খেলুৱৈ, আৰু দ্ৰুততম শতক অৰ্জন কৰা দ্বিতীয় সৰ্বকনিষ্ঠ খেলুৱৈ হিচাপে পৰিগণিত হয়। উল্লেখযোগ্য যে তেওঁ আছিল এই অভিলেখ গঢ়া দ্ৰুততম ভাৰতীয়। তেওঁ গঢ়া আন অভিলেখসমূহ হৈছে^২২:

• আই পি এলত অৰ্ধশতক কৰা কনিষ্ঠতম খেলুৱৈ।
• টি২০ত ৫০+ ৰাণ কৰা কনিষ্ঠতম খেলুৱৈ।

বয়সৰ বিবাদ

সূৰ্যবংশীৰ আনুষ্ঠানিক জন্ম তাৰিখৰ সত্যতাক লৈ সন্দেহৰ অৱতাৰণা হোৱা দেখা যায়।^২৩ ২০২৩ চনত দিয়া এক সাক্ষাৎকাৰত সূৰ্যবংশীয়ে উল্লেখ কৰিছিল যে তেওঁৰ ১৪ বছৰীয়া জন্মদিন ২০২৩ চনৰ ২৭ ছেপ্তেম্বৰত, যাৰ পৰা অনুমেয় যে তেওঁ চৰকাৰী বয়সতকৈ প্ৰায় ডেৰ বছৰ ডাঙৰ।^২৪