প্ৰিয়ংকা মোহন

প্ৰিয়ংকা অৰুল মোহন (Priyanka Arul Mohan; জন্ম: ২০ নৱেম্বৰ ১৯৯৪) এগৰাকী ভাৰতীয় অভিনেত্ৰী। তেওঁ মূলতঃ তামিল আৰু তেলেগু চলচ্চিত্ৰত অভিনয় কৰে। তেওঁ কন্নড় ছবি অন্ধ কাথে হেল্লা (২০১৯)ৰ জৰিয়তে চলচ্চিত্ৰ জগতত খোজ পেলায়। পিছলৈ তেলেগু ছবি গেং লিডাৰ (২০১৯) আৰু তামিল ছবি ডক্টৰ (২০২১), ডন (২০২২) আৰু এথাৰকুম থুনিন্ধৱন (২০২২) আদিত নায়িকাৰ চৰিত্ৰত অভিনয় কৰে।

প্ৰাৰম্ভিক জীৱন

১৯৯৪ চনৰ ২০ নৱেম্বৰত প্ৰিয়ংকা অৰুল মোহনে জন্মগ্ৰহণ কৰিছিল।^১ মুদাবিদ্ৰীৰ আলভাছ পিইউ কলেজৰ পৰা তেওঁ স্কুলীয়া শিক্ষা লাভ কৰিছিল।^১২ তেওঁ বেংগালুৰুৰ পিইএছ বিশ্ববিদ্যালয়ৰ পৰা বায়’লজিকেল ইঞ্জিনিয়াৰিং অধ্যয়ন কৰিছিল।^৩ বৰ্তমান তেওঁ চেন্নাইত থাকে।^৪

কৰ্মজীৱন

২০১৯ চনত গিৰীশ জীৰ দ্বাৰা পৰিচালিত কন্নড় ছবি অন্ধ কাথে হেল্লাত অভিনয়েৰে প্ৰিয়ংকাই ছবিজগতত অভিষেক ঘটায়।^৫ পিছলৈ বিক্ৰম কুমাৰৰ দ্বাৰা পৰিচালিত তেলেগু বোলছবি নানি'জ গেং লিডাৰতো তেওঁ অভিনয় কৰে।^৬ দ্য নিউজ মিনিটৰ কৃষ্ণা শ্ৰীপদাই তেওঁৰ অভিনয় সন্দৰ্ভত লিখিছে, "এগৰাকী পৰিচালকে এগৰাকী নায়িকাৰ ভিতৰত বিচৰা প্ৰায় সকলোখিনিয়েই প্ৰিয়ংকাৰ আছে।" ^৭ পিংকভিলাৰ হৰিচৰণ পুদিপেদ্দীয়ে মন্তব্য কৰে যে "নৱাগত অভিনেত্ৰী প্ৰিয়ংকা অৰুল মোহনে পৰ্দাত দুৰ্দান্ত প্ৰদৰ্শন কৰিছে।" ^৮ দ্বিভাষিক ছবি মায়ান আৰু টিক টকৰ ইংৰাজী সংস্কৰণৰ বাবেও তেওঁ শ্বুটিং কৰিছিল; অৱশ্যে দুয়োখন ছবি মুক্তি পাওঁতে পলম হ'ল।^৯১০

২০২১ চনত নেলছন দিলীপকুমাৰৰ পৰিচালনাত নিৰ্মিত শিৱকাৰ্তিকেয়নৰ ডক্টৰ নামৰ ছবিৰে তেওঁ তামিল ছবিজগততো খোজ পেলায়।^১১ ছবিখনৰ লগতে তেওঁৰ অভিনয়ো সমালোচকৰ দ্বাৰা প্ৰশংসিত হয়। এই ছবিখনে বক্স অফিচত বিশ্বব্যাপী ১০০ কোটি টকা উপাৰ্জন কৰি ব্যৱসায়িক ক্ষেত্ৰত এক বৃহৎ সফলতা লাভ কৰে।^১২ তেওঁ শ্ৰেষ্ঠ নৱাগতা অভিনেত্ৰীৰ শিতানত সাইমা বঁটা লাভ কৰে।^১৩ ২০২২ চনত সুৰিয়া অভিনীত, পৰিচালক পাণ্ডিৰাজৰ ছবি এথাৰকুম থুনিন্ধৱনত নায়িকাৰ চৰিত্ৰত অভিনয় কৰে। এইখন তেওঁৰ দ্বিতীয়খন তামিল ছবি।^১৪ মুভি ক্ৰ'ৰ অশ্বিন ৰামে তেওঁৰ অভিনয়ৰ পৰ্যালোচনা কৰি কয় যে, "ছবিখনত প্ৰিয়ংকা মোহনৰ চৰিত্ৰটি এক ছাৰপ্ৰাইজৰ দৰে আৰু লগতে তেওঁৰ চৰিত্ৰটিয়ে ছবিখনত গুৰুত্বপূৰ্ণ ভূমিকাও পালন কৰে।" ^১৫ পিংকভিলাই লিখিছিল, "কাহিনীভাগত প্ৰিয়ংকাৰ চৰিত্ৰটিৰ বিশেষ কাম নাই যদিও ছবিখনত গ্লেমাৰৰ ড’জ যোগ কৰিছে।" ^১৬ ডক্টৰ ছবিখনৰ পিছত পুনৰ তেওঁ শিৱকাৰ্তিকেয়নৰ সৈতে ডন নামৰ ছবি এখনত নায়িকাৰ চৰিত্ৰত অভিনয় কৰিছিল।^১৭১৮ ছবিখনে সমালোচক তথা দৰ্শকৰ পৰা বেছিভাগেই ইতিবাচক সমালোচনা লাভ কৰিছিল।^১৯ অ'টিটি প্লে'ৰ এছ শুভকীৰ্তনাই লিখিছিল, "প্ৰিয়ংকা মোহনে আকাংক্ষিত ধৰণেই অভিনয় কৰে।" ^২০ ইয়াৰ পিছতে তেওঁ ধনুষৰ বিপৰীতে কেপ্তেইন মিলাৰ আৰু নানীৰ বিপৰীতে চাৰিপোধা চানিভাৰাম'' নামৰ ছবি দুখনত অভিনয় কৰে।^২১

তেওঁৰ আগন্তুক ছবিসমূহৰ ভিতৰত জয়ম ৰবিৰ বিপৰীতে অভিনীত তথা এম. ৰাজেশ পৰিচালিত তামিল ছবি ব্ৰাদাৰ উল্লেখযোগ্য।^২২ তাৰ পিছত পৱন কল্যাণৰ বিপৰীতে দে কল হিম অ’ জি ছবিত অভিনয়েৰে তেওঁ পুনৰ তেলেগু চলচ্চিত্ৰলৈ ঘূৰি আহিব।

চলচ্চিত্ৰপুঞ্জী

বঁটা আৰু মনোনয়ন