প্ৰসন্ন কুমাৰ ডেকা

প্ৰসন্ন কুমাৰ ডেকা অসমৰ এগৰাকী বিশিষ্ট সাহিত্যিক, অধ্যাপক৷ তেখেত শিশু সাহিত্যিক হিচাপেও পৰিচিত৷ তেখেতে ভালেসংখ্যক অসমীয়া উপন্যাস, গল্প, শিশু সাহিত্য, প্ৰবন্ধ আদি ৰচনা কৰি অসমীয়া সাহিত্যলৈ অৱদান আগবঢ়ায় থৈ গৈছে৷ ১৯৯৫ চনত অসম চৰকাৰে তেওঁৰ অৱদানৰ স্বীকৃতিস্বৰূপে তেওঁলৈ সাহিত্যিক পেন্সন আগবঢ়ায়৷^১

জন্ম আৰু বংশ পৰিচয়

তেখেতৰ জন্ম হৈছিল ১৯২৮ চনৰ ১১ ফেব্ৰুৱাৰী তাৰিখ বৰপেটা জিলাৰ সৰ্থেবাৰী নগৰৰ যমথেৰ চুপা অঞ্চলত৷ পিতৃৰ নাম ৰামদাস ডেকা আৰু মাতৃৰ নাম শোভন প্ৰিয়া ডেকা৷

শিক্ষা জীৱন

• ১৯৩৫-৪৯ঃ প্ৰাথিমক শিক্ষা-সৰ্থেবাৰী মজলীয়া বিদ্যালয়
• ১৯৪০-৪৮ঃ সৰ্থেবাৰী হাইস্কুল
• ১৯৪৮ঃ প্ৰৱেশিকা পৰীক্ষাত তৃতীয় বিভাগত উত্তীৰ্ণ
• ১৯৪৮-৫০ঃ কটন কলেজত আই.এ. অধ্যয়ন আৰু দ্বিতীয় বিভাগত উত্তীৰ্ণ
• ১৯৫০-৫২ঃ কটন কলেজত অসমীয়া বিষয়ত স্নাতক ডিগ্ৰীৰ বাবে অধ্যয়ন কৰে যদিও অনুতীৰ্ণ হয়৷
• ১৯৫৬ঃ বি.বৰুৱা কলেজৰপৰা অনাৰ্ছ নোহোৱাকৈ স্নাতক ডিগ্ৰী লাভ
• ১৯৬৩ঃ শিক্ষকপৰীক্ষাৰ্থী হিচাপে দ্বিতীয় শ্ৰেণীত এম.এ পৰীক্ষাত উত্তীৰ্ণ

কৰ্মজীৱন

১৯৫৪ চনত সৰ্থেবাৰী হাইস্কুলত ডেৰ বছৰৰ বাবে চাকৰি কৰে আৰু পৰৱৰ্তী সময়ত হাউলী নৰ্মাল স্কুলত শিক্ষকতা কৰে৷ ১৯৫৫-১৬ চনত গুৱাহাটী উচ্চ ন্যায়ালয়ত নিম্নবৰ্গৰ সহায়ক পদত কিছুকাল চাকৰি কৰাৰ পাছত ১৯৫৬ চনৰপৰা ৬৩ চনলৈকে সৰ্থেবাৰী হাইস্কুলত পুনৰ চাকৰি কৰে৷ ১৯৬৩ চনৰপৰা ১৯৯০ চনলৈকে টিহু কলেজত অসমীয়া বিভাগত অধ্যাপনা কৰে আৰু ১৯৯০ চনত মুৰব্বী অধ্যাপক হিচাপে অৱসৰ গ্ৰহণ কৰে৷ ১৯৯০ চনত টিহুৰ সৰ্বেশ্বৰ দাস কণিষ্ঠ মহাবিদ্যালয়ৰ প্ৰতিষ্ঠাপক অধ্যক্ষৰ দায়িত্ব গ্ৰহণ কৰে আৰু সৰ্থেবাৰী বি.এড কলেজৰ অধ্যক্ষৰ পদো এবছৰৰ বাবে গ্ৰহণ কৰে৷^১

সাহিত্যিক অৱদান

১৯৪০ চনৰ পৰাই তেওঁ সাহিত্য চৰ্চা আৰম্ভ কৰে৷ অসমীয়া উপন্যাস, গল্প, শিশু সাহিত্য, প্ৰবন্ধ আদি ৰচনা কৰি অসমীয়া সাহিত্যলৈ অৱদান আগবঢ়ায়৷ ১৯৫৮ চনত তেওঁৰ অগতানুগতিক পত্ৰ উপন্যাস ‘প্ৰিয়তমাসু’ প্ৰকাশ পায়৷ তাৰোপৰি ‘ৰামধেনু’, ‘গৰীয়সী’, ‘প্ৰান্তিক’ আদি আলোচনী আৰু ‘আমাৰ অসম’, ‘আজিৰ অসম’, ‘অসম বাণী’ আদি কাকতত ডেকাৰ ভালেমান লেখা প্ৰকাশ পাইছে৷ ১৯৭৬ চনত টিহুত অনুষ্ঠিত অসম সাহিত্য সভা ৰ স্মৃতিগ্ৰন্থখন তেওঁৰ সম্পাদনাত প্ৰকাশ পায়৷^১ তাৰোপৰি ১৯৯৫ চনত সৰ্থেবাৰীত অনুষ্ঠিত অসম সাহিত্য সভাৰ ৬১সংখ্যক অধিৱেশনত তেওঁ আদৰণী সমিতিৰ সভাপতিৰূপে কাৰ্যনিৰ্বাহ কৰে৷

শিশু সাহিত্য

• সাধুকথাৰ পুথি
• জীৱন আৰু জেউতি
• জীৱনৰ জীয়া কাহিনী
• মাক আৰু মৰম
• জোন আৰু জুৰি
• জাৰ্মান দেশৰ সাধু
• দেৱদূতী জোৱান ডাৰ্ক

জীৱনী

• মহাপুৰুষ শ্ৰী শ্ৰীভক্তদাস আতৈ
• সৰা শেৱালিৰ সুবাস

পত্ৰোপন্যাস

• প্ৰিয়তমাসু, পত্ৰোপন্যাস, ১৯৫৮

জ্ঞান বিজ্ঞান

• মনোৰম মৰুভূমি
• দেৱদূতী জোৱান আৰ্ক
• ৰচনা প্ৰৱাহ,ব্যাকৰণসহ
• চকা-পইচাৰ কাহিনী

অনুবাদ

• ক’লী সুন্দৰী টিউলীপ, আলেকজেণ্ডাৰ ডুমাৰৰ ইংৰাজী উপন্যাসৰপৰা

কবিতা পুথি

• মন বাকৰিৰ ববচা বনৰ পাত আৰু ফুল

অন্যান্য

• সাহিত্য উপকৰণ

সম্পাদনা

• মাধৱদেৱৰ চোৰধৰা আৰু পিম্পৰা গুচোৱা নাটৰ সম্পাদনা
• অসম সাহিত্য সভাৰ টিহু অধিৱেশনৰ স্মৃতিগ্ৰন্থ, ১৯৭৬
• কোহিৰাম দাস জন্ম শতবাৰ্ষিকী স্মৃতিগ্ৰন্থ, ১৯৮২
• 'জিৰণি' নামৰ মাহেকীয়া আলোচনী, ১৯৯৩-৯৪

মৃত্যু

২০১৪ চনৰ ৮ আগষ্টৰ দিনা সৰ্থেবাৰীৰ নিজা বাসভৱনৰ সমীপৰ পুখুৰীত পৰি আকস্মিকভাৱে প্ৰসন্ন কুমাৰ ডেকাৰ মৃত্যু হয়৷ মৃত্যুৰ সময়ত তেওঁৰ বয়স হৈছিল ৮৬ বছৰ৷^১

বঁটা আৰু সন্মান

• ১৯৯৫ চনত অসম চৰকাৰৰ সাহিত্যিক পেন্সন