দৈজিং উৎসৱ

দৈজিং উৎসৱ (Dwijing Festival) বা আই নদী উৎসৱ হৈছে চিৰাং জিলাৰ আই নদীৰ পাৰত হাগ্ৰামা দলঙৰ কাষত অনুষ্ঠিত এক বাৰ্ষিক নদী উৎসৱ।^১২৩ উৎসৱটো প্ৰতিবছৰে ১২ দিন ধৰি (২৭ ডিচেম্বৰৰ পৰা ৭ জানুৱাৰীলৈকে) উদ্‌যাপন কৰা হয়।^২৪

শব্দৰ উৎস

“দৈজিং” শব্দটো বড়ো ভাষাৰপৰা আহিছে, য’ত দৈ মানে “পানী” আৰু জিং মানে “নদীৰপাৰ”।^২ আই নদীৰ পাৰত এই উৎসৱ উদ্‌যাপন কৰা হয়, যাৰ সৈতে স্থানীয় লোকসকলে গভীৰ সাংস্কৃতিক সংযোগ ৰাখে।^৫

ইতিহাস

দৈজিং উৎসৱৰ আৰম্ভণি অসম পৰ্যটন বিভাগ, অসম পৰ্যটন বিকাশ নিগম আৰু বড়োলেণ্ড টুৰিজমৰ যৌথ উদ্যোগত ২০১৬ চনত হৈছিল।^১৬৭ উৎসৱৰ মূল উদ্দেশ্য আছিল নদী পৰ্যটনক উৎসাহিত কৰা আৰু বড়োলেণ্ডৰ সংস্কৃতি আৰু পৰম্পৰাক বিশ্বৰ আগত দাঙি ধৰা।^১ চতুৰ্থ তথা শেষবাৰ এই উৎসৱ ২০১৯–২০ চনৰ শীত কালত অনুষ্ঠিত হৈছিল।

উৎসৱ

এই উৎসৱ হাগ্ৰামা দলঙৰ ওচৰত অনুষ্ঠিত হয়, যিখন অসমৰ আটাইতকৈ দীঘল গ্ৰাম্য নদী দলং।^১ ইয়াত জনজাতীয় বাণিজ্য, খাদ্য-সংস্কৃতি, ক্ৰীড়া, অভিযানমূলক কাৰ্যকলাপ, নদী ৰাফটিং, হেলিকপ্টাৰ ভ্ৰমণ আৰু সাংস্কৃতিক অনুষ্ঠানাদি অনুষ্ঠিত হয়।^৮ বলিউডৰ বহুজন খ্যাতনামা শিল্পীয়ে ইয়াত পৰিৱেশন কৰিছে।^১ এই উৎসৱে স্থানীয় লোকসকলৰ জীৱন-যাত্ৰা উন্নত কৰা, নতুন কৰ্মসংস্থান সৃষ্টি কৰা আৰু অৰ্থনৈতিকভাৱে অঞ্চলটো বিকাশ কৰাৰ উদ্দেশ্যও বহন কৰে।^৯