জ্যোতিকা

জ্যোতিকা সাৰাৱানন (Jyothika Saravanan); জন্ম ১৮ অক্টোবৰ ১৯৭৭) হৈছে এগৰাকী ভাৰতীয় অভিনেত্ৰী যিয়ে প্ৰধানকৈ তামিল ভাষা ভাষাৰ চলচ্চিত্ৰত অভিনয় কৰিছে ৷^১ ইয়াৰোপৰি তেখেতে তেলুগু ভাষা, মালয়ালম ভাষা, কন্নড় ভাষা, হিন্দী ভাষা ছবিত অভিনয় কৰিছে৷ জ্যোতিকাই এতিয়ালৈকে তিনিটা ফিল্মফেয়াৰ-দাক্ষিণাত্য, তিনিটা তামিলনাডু ৰাজ্যিক চলচ্চিত্ৰ বঁটা, চাৰিটা দিনকৰণ বঁটা, আন্তৰ্জাতিক তামিল চলচ্চিত্ৰ বঁটাৰ লগতে একাধিক বঁটা-সন্মান, মনোনয়ন আৰু স্বীকৃতি অৰ্জন কৰিবলৈ সক্ষম হৈছে৷ তেখেত কালাইমামনি বঁটাৰো এগৰাকী প্ৰাপক৷ ^২ দ্য টাইমছ অৱ ইণ্ডিয়াৰ মতে তেখেত দক্ষিণ ভাৰতৰ শ্ৰেষ্ঠ অভিনেত্ৰীসকলৰ অন্যতম৷ ^৩৪

১৯৯৭ চনত মুক্তিপ্ৰাপ্ত হিন্দী ভাষাৰ চলচ্চিত্ৰ দোলী ছাজা কে ৰখনাৰ জৰিয়তে জ্যোতিকাই বলিউডত অভিষেক ঘটায় ৷ ছবিখনৰ পৰিচালক আছিল প্ৰিয়দৰ্শন ৷ আনহাতে ১৯৯৯ চনত মুক্তি লাভ কৰা ভাল্লি হৈছে তেখেতে অভিনয় কৰা প্ৰথমখন তামিল ভাষাৰ ছবি৷ ২০০৩ চনত জ্যোতিকাই প্ৰথমখন তেলেগু ভাষাৰ ছবি টাগোৰত অভিনয় কৰে ৷ তেখেতৰ বিপৰীত চৰিত্ৰত অভিনয় কৰিছিল চিৰঞ্জীৱিয়ে ৷ ভাল্লিৰ বাবে ১৯৯৯ চনত জ্যোতিকাই শ্ৰেষ্ঠ নৱাগত অভিনেত্ৰীৰ শিতানত প্ৰথমটো ফিল্মফেয়াৰ-দাক্ষিণাত্য বঁটা লাভ কৰে ৷ ^৫ ২০০০ চনত জ্যোতিকাক কুশী নামৰ চলচ্চিত্ৰত আগবঢ়োৱা প্ৰদৰ্শনৰ বাবে শ্ৰেষ্ঠ তামিল অভিনেত্ৰীৰ ফিল্মফেয়াৰ বঁটাৰে সন্মানীত কৰা হয় ৷ তেখেতৰ আন কেইখনমান সফল আৰু সমাদৃত ছবিৰ নাম হৈছে পেৰাঝগান (২০০৪), চন্দ্ৰমুখী (২০০৫), মোঝী (২০০৭)৷ এইকেইখন ছবিয়ে তামিল ছবিৰ উদ্যোগত তেখেতৰ জনপ্ৰিয়তা বঢ়াই তোলে ৷

২০০৬ চনৰ ১১ ছেপ্টেম্বৰত জ্যোতিকাই তামিল ছবিৰ জনপ্ৰিয় অভিনেতা সুৰিয়াৰ লগত দাম্পত্য জীৱন আৰম্ভ কৰে আৰু ছবি উদ্যোগ সাময়িকভাৱে ত্যাগ কৰে ৷ সেইছোৱা সময়ত তেখেত কেৰিয়াৰৰ উচ্চস্থানত আছিল৷ ^৬ সুৰিয়াৰ লগত জ্যোতিকাই সাতখন ছবিত অভিনয় কৰিছে ৷ ২০১৫ চনত জ্যোতিকাই ৩৬ ভায়াধিনিলে নামৰ ছবিখনৰ যোগেদি প্ৰত্যাৱৰ্তন কৰে, যিখন ছবিৰ জৰিয়তে তেখেতে ফিল্মফেয়াৰ সমালোচকৰ বঁটা-শ্ৰেষ্ঠ অভিনেত্ৰীৰ সন্মান লাভ কৰে৷ ^৭.^৮৯ ইয়াৰ পিছত জ্যোতিকাই কেইবাখনো নাৰীকেন্দ্ৰিক ছবি মাগালিৰ মাট্টুম (২০১৭), নাচিয়াৰ (২০১৮), কাট্ৰিন মোঝি (২০১৮), ৰাটচাচি (২০১৯), পোনমগল ভান্ধাল (২০২০) আদি ৷ ^১০১১

প্ৰাৰম্ভিক আৰু ব্যক্তিগত জীৱন

জ্যোতিকাৰ পিতৃ এগৰাকী পাঞ্জাবী আৰু মাতৃ এগৰাকী মহাৰাষ্ট্ৰীয়ান৷ ^১২১৩ তেখেতৰ পিতৃ চন্দেৰ ছাদানাহ এগৰাকী ছবি প্ৰযোজক আৰু মাতৃ হৈছে সীমা ছাদানাহ৷ অভিনেত্ৰী নাগমা তেখেতৰ অৰ্ধ-ভগ্নী৷

মুম্বাইৰ লাৰ্ণাছ একাডেমিৰ পৰা জ্যোতিকাই পঢ়াশালীয়া শিক্ষা গ্ৰহণ কৰে ৷ পৰৱৰ্তী সময়ত মুম্বাইতে থকা নিথিবাই কলেজৰ পৰা মনোবিজ্ঞানত স্নাতক ডিগ্ৰী লাভ কৰে ৷

২০০৬ চনৰ ১১ ছেপ্টেম্বৰত জ্যোতিকাৰ অভিনেতা সুৰিয়াৰ সৈতে বৈবাহিক জীৱন আৰম্ভ হয় ৷ ^১৪ দম্পতীটোৰ দুটি সন্তান আছে ৷ কন্যা সন্তা দিয়া (জন্ম-১০ আগষ্ট, ২০০৭)^১৫ আৰু পুত্ৰ সন্তান দেৱ (জন্ম ৭ জুন ২০১০) ^১৬

সমাজসেৱা

স্বামী সুৰিয়াৰ আগাৰাম সংস্থাৰ সৈতে সংযুক্ত হৈ জ্যোতিকাই ২০২০ চনৰ আগষ্ট মাহত থাঞ্জাভুৰ চৰকাৰী চিকিৎসালয়লৈ ২৫ লাখ টকাৰ বৰঙণি আগবঢ়ায়৷ ^১৭ ইয়াৰ লগতে জ্যোতিকাই চিকিৎসা-সম্বন্ধীয় সঁজুলি আৰু বিচনাও যোগান ধৰে ৷ চিকিৎসালয়খনৰ অৱস্থা শোচনীয় বুলি মন্তব্য দিয়াৰ পাছত জ্যোতিকা সমালোচিত হৈছিল৷ ^১৮